Gəncəliyev ermənilərin Qarabağda əhval-ruhiyyəsini yoxladı

Bakı/10.04.21/Turan: Qarabağ Azərbaycanlıları İcmasının sədri Tural Gəncəliyevin Xankəndində təşkilatın nümayəndəliyinin yaradılması üçün yer axtarması barədə Feysbuk-da yerləşdirilən məlumatı azərbaycanlılar və ermənilər tərəfindən böyük emosiya və mülahizələr doğurub. O tərəfdən ermənilər daha çox təhqiramiz fikirlərlə cavab veriblər, separatçıların başçılarından biri olan Balayan mətbuatda anti-Azərbaycan siyasi bəyanatı dərc edib.

Gəncəliyevin çıxışından sonra Azərbaycanda hətta siyasətçilərdən biri Azərbaycan Silahlı Qüvvələrinin bu ilin may ayında antiterror əməliyyatına başlayacağı proqnozu verib.

Qarabağ Azərbaycanlıları İcmasında Turan-ın suallarına Media və kommunikasiya üzrə məsul Əhməd Mahmudov cavab verib.

“Tural Gəncəliyevin azərbaycanlı icması üçün ofis axtarmaq haqqında şəxsi Feysbuk statusu erməni-Qarabağ ictimaiyyətinin azərbaycanlıların Qarabağa qayıtmaq niyyətinə reaksiyasının yoxlanması olub. Ermənilərin sosial şəbəkələrdə yazdıqlarını nəzərdən keçirərkən biz başa düşdük ki, təəssüf ki, xeyirxah rəylərlə yanaşı, reaksiyaların əksəriyyəti kəskin mənfi olub”, deyə Mahmudov bildirib.

Sosial şəbəkələrə müraciət etməklə yanaşı, Qarabağ Azərbaycanlıları İcmasının rəhbərliyi konfranslarda bəyanatlarla çıxış edir, digər onlayn və əyani müzakirələrdə iştirak edir. Ermənilərin əhval-ruhiyyəsi barədə məlumat Milli Məclisin Dağlıq Qarabağdan olan deputatı Tural Gəncəliyevə işləmək üçün faydalıdır.

“Erməni istəyindən asılı olmayaraq, yaxın gələcəkdə azərbaycanlılar Qarabağın bütün yaşayış məntəqələrinə və Xankəndinə qayıdacaqlar, İcmamızın ofisi Xannəndində qurulacaq. Terrorla məşğul olanlar və Azərbaycan Konstitusiyasına qarşı çıxanlar istisna olmaqla, biz ermənilərlə sülh şəraitində yaşayacağıq”, deyə Mahmudov bildirib.

Şuşa şəhərinin işğaldan azad olunmasından sonra Şuşada beşmərtəbəli binaların dağıdılması ilə bağlı suala cavab verən icmanın nümayəndəsi sovet Azərbaycanında, bizim fəhlə və mühəndislərimizin əməyi ilə tikilmiş köhnə “Xruşovkaların” söküldüyünü bildirib. Ötən dövr ərzində, xüsusən ermənilərin bu mənzillərdə yaşadığı illərdə evlər təmir edilməyib, yararsız vəziyyətə düşüb və insanlar üçün təhlükəli hesab edilib.

“Prezident Əliyev Şuşaya iki dəfə səfər edib. O, son səfər zamanı şəhərin simasını onun tarixi statusuna uyğun olan normal vəziyyətə gətirmək barədə göstəriş verib. “Xruşovkalar” ermənilər tərəfindən tikilməyib, onlar mədəni, tarixi, memarlıq irsinin obyektləri deyillər və buna görə də ermənilərin bu məsələ ilə bağlı çıxışları əsassızdır”, deyə təşkilatın nümayəndəsi qeyd edib.

Bakıda da köhnə, yaşayış üçün yararsız sovet binaları sökülür, deyə o əlavə edib.

Mahmudov xatırladıb ki, Şuşanı Pənahəli xanın əmri ilə 1750-ci ildə azərbaycanlılar tikiblər. Şəhərin ilk sakinləri 162 azərbaycanlı ailəsi olub. Şəhərin gerçək tarixi irsi ermənilər tərəfindən dağıdılıb, bu fakt şəhərin “İskəndər” raketləri ilə atəşə tutulması ilə təsdiqlənir. -0-