Media-icmal 10.10.2016

Ilham Əliyev liderliyinin alternativsizliyi, aqrar sahədəki durum, daşınmaz əmlak bazarının problemləri bugünkü medianın aparıcı mövzusudur.

İlham Əliyev alternativsizliyi

“Azərbaycan” qəzeti. “Ümummilli etimadın alternativsiz ünvanı” sərlövhəli

(http://www.azerbaijan-news.az/index.php?mod=3&id=107237) məqalədə müəllif xalqın Heydər Əliyev siyasi kursuna və prezident  İlham Əliyev liderliyinə  sədaqətini dəyərləndirir.

Müəllif sonuncu,  2013-cü il prezident seçkilərini xatırladır və  bu seçkinin mahiyyətini izah edir: “Bir neçə saat əvvəl bitmiş seçkinin nəticələri xalq-lider vəhdətinin ən parlaq ifadəsi olduğu kimi, bu müraciətin mahiyyəti də İlham Əliyevin fəaliyyət fəlsəfəsinin - “Biz yalnız Azərbaycan dövlətinin və xalqının maraqlarına xidmət edirik”, “Biz xalqın xidmətçisiyik”, “Bizim üçün yeganə istinadgah yalnız xalqdır, onun inamı və etimadıdır” amalının dəyişməzliyini nümayiş etdirdi…”.

Müəllif bu seçkilərdə İlham Əliyevin 84% səs qazanmasını onun liderliyinə alternativin olmaması kimi dəyərləndirir. Müəllifə görə, bu ölkədə onun qarşısına rəqib kimi çıxmağa, onunla seçki yarışına girməyə hazır olan bir ciddi siyasətçi də yox idi və indi də yoxdur! Müəllif  bu seçkilərdə müxalifətin mövqeyini bir ovuc avantüristin  mövqeyi hesab edir: “Bir ovuc siyasi avantürist isə ancaq bir məqsəd uğrunda çarpışırdı: necə edək ki, seçicilər məntəqələrə gəlməsinlər, nə hiylə qarışdıraq ki, “stəkanda fırtına yaratmağa” bəhanə tapaq, kimin ətəyindən yapışaq ki, bu seçkilərdən sonra bizi siyasi arxivin zibil qabından siyasi masa üzərinə çıxarsınlar?”

Müəllif düşünür ki, vətəndaş həmin seçkilərə prezident seçkiləri kimi yanaşmayıb, bu ümumxalq referendumu, Heydər Əliyev siyasi kursuna, İlham Əliyev missiyasına xalqın etimad səsverməsi, özünü siyasi səhnədə hərdən büruzə verən xaos, böhran kabusuna və onun daşıyıcılarına xalqın sonuncu qətiyyətli “yox”u idi: “Prezidentə yeni etimad mandatı verən 9 oktyabr seçiminin rəsmi qalibi prezident İlham Əliyev, əsl qalibi isə Azərbaycan dövləti və xalqı idi!”.

Daha sonra isə müəflif bu fonda 2003-13-cü illərdə keçirilmiş prezident seşkilərinə ümumi dəyərləndirmə verir. Müəllifə görə, 2003-cü ilin seçkilərinə İ. Əliyev xilaskar missiyanın və alternativsiz siyasi kursun təmsilçisi, böyük ümidlər bəslənən namizəd kimi gedib. 2008-ci ilin seçkilərinə İlham Əliyev verdiyi vədləri artıqlaması ilə gerçəkləşdirən, ona bəslənən ümidləri tam doğruldan prezident kimi qatılıb, 2013-cü ilin seçkilərində isə İ.Əliyev tarixin ən güclü, ən möhtəşəm, ən inkişaf edən Azərbaycanının şəriksiz lideri, xalqının öz taleyini onilliklər boyu etibar etməyə hazır olduğu rəhbər kimi iştirak edib.

Hədəfi məlum olmayan hökumət

“Azadlıqinfo” saytı isə “Azərbaycan hökuməti nə istədiyini bilmir” sərlövhəli (http://www.azadliq.info/159791.html) məqalədə ölkədəki iqtisadi durumu ekspert Vahid Məhərrəmli ilə müzakirə edir. 

Məqalədə xatırladılır ki, prezident İlham Əliyev Nazirlər Kabinetinin 2016-cı ilin 9 ayının sosial-iqtisadi inkişafının yekunlarına  və qarşıda duran vəzifələrinə dair bu günlərdə keçirilən iclasında Azərbaycanın taxıl idxalından asılı olduğunu etiraf edib.

Bu faktdan irəli gələrək ekspert düşünür ki, burada problem idarəetmədədir: “Yeganə problem idarəetmədir, başqa problem yoxdur. Ölkənin torpaq-iqlim şəraiti, su resursu imkan verir ki, Azərbaycan özünü ərzaq buğdası ilə təmin etsin”.

V.Məhərrəmli hesab edir ki, düzğün idarəetmə sistemi qurulsa Azərbaycan özünü taxılla və digər dənli bitkilərlə təmin edə bilər: “Yeganə lazım olan odur ki, məhsuldarlığı artırıb maya dəyərini aşağı salasan. Bunun üçün ölkəyə gətirilən mineral gübrənin təsiri zəifdir və məhsuldarlığa pis təsir edir. Su resursu kifayət qədər ola-ola fermer bəzən taxılını suvarmağa su tapmır. Problem idarəçilikdədir”.

Ekspert prezidentin kənd təsərrüfatı ilə bağlı toxunduğu digər məsələlərə də toxunur. Ekspertə görə, Azərbaycan hökuməti aqrar sahədə hələ də prioritetləri müəyyən edə bilməyib: “Nə istəyirlər, hələ də anlaya bilmirəm. Hökumət hər şeylə məşğul olmaq istəyir, amma belə olmur. Bir neçə sahə üzrə ixtisaslaşırsan və ixracını da o üzrə istiqamətləndirirsən. Həm baramaçılıq, həm pambıqçılıq, həm fındıqçılıq, həm heyvandarlıq, həm zeytunluğu inkişaf etdirmək istəyirlər. Hər hektardan 500-600 kq. yığmaqla dünya bazarına çıxmaq olmaz. Türkiyə, İspaniyada hər hektardan 4-5 min ton məhsul əldə edirlər, onlarla necə rəqabətə girəcəksən?..”

Digər tərəfdən ekspertə görə, bu sahədə hökumətin aqrar strategiyası görünmür, hədəflər aydın şəkildə müəyyən edilmir və problem də elə danışılan bu müstəvidədir: “Hökumət hədəfini aydın müəyyənləşdirə bilmir. Azərbaycanda münbit şərait var, nəyə yönəltsən nəticə əldə edərsən, amma prioritet olmalıdır. Dünya təcrübəsində ölkələr müəyyən məhsulların istehsalı üzrə ixtisaslaşırlar, bəzi məhsulları artıq istehsal edib ixraca yönəldirlər”, - ekspert vurğulayır.

Durğunluq yaşayan əmlak bazarı

Exo” qəzetində isə  “Azərbaycan daşınmaz əmlak bazarı iki eniş, iki yüksəliş yaşadı” sərlövhəli (http://ru.echo.az/?p=41959 ) məqalə oxumaq olar.

Müəllif məqalədə ekspertlərlə ölkənin daşınmaz əmlak bazarındakı durumu araşdırır. Müəllif 2015-ci ildə ölkədə iki devalvasiyanın olduğunu və bunun ölkənin bütün iqtisadi həyatı kimi daşınmaz əmlak bazarına da ciddi təsir etdiyini deyir.

“Manatın dəyərdən düşməsi əmlak bazarına da ciddi təsir edib. Əksər alqı-satqılar pozulub, daşınmaz əmlakın qiyməti isə manatın kursundan asılıdır”. Bunu isə qəzetə bu sahə üzrə ekspert Nüsrət İbrahimov şərh edir. Onun sözlərinə görə, son 10 ildə qiymətlər 2014-cü ildə ən yüksək həddə olub.

2015-ci ildə Bakıda mənzilin  bir kv. metrinə 1487 manat dəyər qoyulub, amma alqı-satqı olmayıb.

Ekspert Rəşad Əliyev də düşünür ki, burada problem manatın kursundadır, belə ki, manat dəyərdən düşür, bu dəyər dollarla ekvivalent dəyərə döndəriləndə kəskin bahalıq fərqi əmələ gəlir, bu da bazarda müştəri qıtlığının əsas səbəbidir: “Ümumiyyətlə, valyuta bazarındakı çətinliklər daşınmaz əmlak bazarına neqativ təsir göstərir”.  Ekspert deyir ki, daşınmaz əmlak bazarında qiymətlərin cüzi enib-qalxması bazarda alqı-satqının canlanmasına səbəb olmayıb.

Müəllif deyir ki, ekspertlər özləri belə daşınmaz əmlak bazarında canlanma olacağı barədə danışmırlar, onların fikrincə, hər halda yaxın aylarda və ya bir ildə belə bir canlanma ola biləcəyinin işartısı da görünmür.

Ekspert R.Əliyev  xatırladır ki, bu ilin avqustunda icarə sahəsində müəyyən bahalaşma baş verib, bu da tələbələrin Bakıya oxumağa gəlişi ilə bağlı olub: Əmlak bazarı Bakıda həqiqətən durğunluq dövrünü yaşayır, adətən tələbələrin hesabına ayaq üstə duran  icarə bazarı belə faktiki olaraq dayanıb. Bütünlükdə isə bazarda situaisyanın yaxşılaşması iki ildən tez olmayacaq”.