Media-icmal 11.02.20

9 fevral növbədənkənar parlament seçkiləri ətrafında müzakirələr, “Şahdağ Turizm Mərkəzi”nin maliyyə durumu və s. məsələlər medainın aparıcı mövzuları sırasıdadır...

Demokratiyanın təntənəsi 

“Azərbaycan” qəzeti “Demokratiyanın növbəti təntənəsi” sərlövhəli məqalədə fevralın 9-da keçirilmiş parlament seçkilərini dəyərləndirir.

Müəllifə görə, fevralın 9-da Milli Məclisə keçirilən seçkilər Azərbaycanın demokratik inkişafının növbəti təntənəsi oldu.

Müəlllif hesab edir ki, bu seçkilərin əsas nəticəsi və ortaya qoyduğu başlıca reallıq Prezident İlham Əliyevin liderliyinin, rəhbərliyi altında keçirilən siyasətin alternativsizliyini bir daha təsdiq etdi.

Yazı müəllifi vurğulayır ki, insan azadlıqlarını təmin edən Kontitusiya və demokratik Seçki Məcəlləsi azad, ədalətli, obyektiv seçkilərin keçirilməsi üçün əsas prioritetləri müəyyənləşdirib.

Müəllif əlavə edir ki, bütövlükdə respublikada demokratik institutlar inkişaf etdikcə seçki sisteminin təkmilləşdirilməsi prosesi uğurla həyata keçirilib: “Əlbəttə, bütün bunların kökündə Azərbaycan hakimiyyətinin ölkədə demokratiyanın inkişafı ilə bağlı qətiyyətli və ardıcıl siyasəti dayanır”, deyə müəllif xüsusi qeyd edir.

Məqalə müəllifinin fikincə, bu seçkilərin azad, ədalətli və şəffaf keçirilməsi üçün yüksək əzmkarlığın ortaya qoyulması seçki kampaniyasının bütün mərhələlərində hiss olunub, namizədlərə seçiciləri ilə görüşmək üçün bütün imkanlar yaradılıb.

Bu mənada müəllif yada salır ki,1000 seçki məntəqəsində veb-kameralar quraşdırılması, “exit-poll” keçirilməsi seçkilərin şəffaflığına xidmət edib. 

Yazıda vurğulanır ki, seçkidən sonra beynəlxalq və yerli müşahidəçilər də verdikləri açıqlamalarda seçkiqabağı dövrdə heç bir pozuntunun olmadığını, bütün namizədlər, siyasi partiyalar üçün lazımi şəraitin yaradıldığını bəyan ediblər.

Müəllifə görə, Azərbaycanda akkreditə olunan xarici KİV-lər də parlament seçkilərinə geniş yer ayırmaqla, onun demokratik və şəffaf keçirildiyini bütün dünyaya yayıblar: “Bütövlükdə, bu seçkilər demokratik mühitdə, azad və şəffaf keçirildi, xalqın iradəsini ifadə etmək kimi fundamental vəzifə yerinə yetirildi, vətəndaşlar öz iradələrini növbəti dəfə ifadə etdilər”, deyə müəllif seçkilərə münasibətini ifadə edir.

“Xalqın qovduğu adamların Milli Məclisi...”

“Moderator.az” saytında isə “Xalqın qovduğu adamların Milli Məclisi...” sərlövhəli məqalədə müəllif parlament seçkilərinə başqa bucaqdan baxır. 

Azərbaycan tarixində faciəvi hadisələrin çox olduğunu deyən müəllif 31 Mart soyqırımı, 26 fevral Xocalı soyqırımı, 20 Yanvar tarixlərini yada salır.

Müəllif iddia edir ki, son parlament seçkilərinin keçirildiyi 9 fevral tarixi də belə faciəli günlərdən biridir: “9 fevral-seçki rəzaləti günü!... Hətta sovet rejiminin mövcud olduğu 70 illik bir dövrdə də belə rəzalətli seçki  olmamışdı”, deyə müəllif münasibətinin əsasını göstərir.

Müəllif seçkiöncəsi keçirilən görüşlərdə xalqın qovduğu insanların da adını əvvəlcədən tərtib olunmuş “seçilənlər” siyahısında görəndə Azərbaycanda mənəvi-hüquqi bir qətliam baş verdiyini düşünür: “9 fevralda ölkədə seçki keçirilməsi yox, əvvəlcədən yuxarıda hazırlanmış siyahının çox pis formada təsdiqlənməsi baş verdi. Onda bu seçkini keçirməyə nə ehtiyac vardı?”, deyə müəllif sual ünvanlayır.

Müəllifə görə, ən başlıcası, yeni və gənc nəslə yaxşı bir seçki ənənəsi qoymaq mümkün olmadı.

Səsvermə günündə baş verənləri isə müəllif feodalizm yanaşma üsulunun görüntüləri adlandırır: “Karusel əməliyyatları, icra hakimiyyəti strukturlarının canfəşanlığı, məktəb direktorları və müəllimlərinin kobud davranış və rəftarları, bir namizədin xeyrinə olan pozuntular vətəndaşlarımızı təhqir etmək idi”.

Müəllif təəssüflə iddia edir ki, bütün bunlar növbəti seçki sınağından çıxa bilməmək idi, itirən yalnız namizədlər deyildi, itirən bütün xalq oldu, bu seçkilər  isə Azərbaycan cəmiyyətinin inkişafına böyük bir zərbə idi.

Büdcədən aslı olan turizm mərkəzi - səbəblər

“Oxu.az” saytında “Ziyarətçisi çox olan turizm mərkəzi niyə büdcədən asılıdır?” sərlövhəli məqalədə Şahdağ Turizm Mərkəzinin maliyyə vəziyyəti dəyərləndirilir.

Müəllif bildirir ki, Azərbaycanda qış turizmi deyəndə yada düşən ilk məkanlardan biri “Şahdağ Turizm Mərkəzi” olur və bu mərkəzin 2009-cu ildə dövlət büdcəsi hesabına əsası qoyulduğunu, 2011-ci ildən istifadəyə verilən “Şahdağ Turizm Mərkəzi”nin büdcədən dotasiya aldığını vuğulayır.

Müəllifin sözlərinə görə, Mərkəz 2018-ci ili 27,47 milyon manat zərərlə başa vurub, 2019-cu ildə isə ziyanı təyin edən rəqəmlər bir qədər də artıb. 

Müəllifin sözlərinə görə, daxili turlardan da bu məkana gələnlər kifayət qədərdir və o zaman mərkəzin özünü niyə maliyyələşdirə bilməməsi sualı yaranır. 

Müəllif ekspertlərə istinadən deyir ki, təşkil olunan turlar zamanı ərazidə qidalanma baha olduğundan gələnlərin böyük əksəriyyəti yaxınlıqda olan digər restoranlara üz tuturlar. 

Yazıda vurğulanır ki, turist kanat və xizəyi birgə götürmək istəsə bu, ona 45-50 manata başa gələcək.

Otellər və Restoranlar Assosiasiyasının sədri Samir Dübəndi deyir ki, xarici ölkələrdə də xizək turizmini təklif edən mərkəzlərin qiymətləri ucuz deyil: “Ancaq bizdə bir qədər də çərçivədən çıxıblar. Çünki bizə də şikayətlər daxil olur ki, 30 qəpiklik suyu 4 manata satırlar. Belə kurortların ətrafında daha kiçik yerləşmə məntəqələri yaradılmalıdır. Yerləşmə və qida xərclərini azaltsaq, heç olmasa bura təşkil olunan turların qiymətində fərqlilik görə bilərik”, – deyə S.Dübəndi bildirib. 

Müəllif vurğulayır ki, Nizamnamə kapitalı 546,776 milyon manat olan turizim mərkəzinə dəstək üçün dövlətin subsidiya verməsi yaxşı haldır.

Amma müəllif onu da yada salır ki, kommersiya xarakterli qurumun özünü maliyyələşdirməyə gücü çatmırsa, deməli müəyyən işlərin görülməsinə ehtiyac var.

 

Rəy yaz

Cəmiyyət

Taksi sayı azaldılır, bəs köhnə taksiçilər nə ilə dolanacaqlar? – Rauf Ağamirzəyev Çətin sualda



Bizi sosial şəbəkələrdə izləyin

Xəbər lenti