Media icmal 11.07.18

Son 15 ildə qazanılan siyasi, iqtisadi uğurların təməli, iyulun 10-da Gəncədə baş vermiş hadisələrə baxış, pensiyaların yenidən hesablanmasında alimlərin yer almaması bugünki (11 iyul, 2018-ci il) medianın aparıcı mövzularındandır...

Uğurların təməli

"Azərbaycan" qəzeti "15 illik şərəfli inkişaf yolu" sərlövhəli məqalədə dövlət başçısı İlham Əliyevin rəhbərliyi ilə Nazirlər Kabinetinin iclaslarının keçirilməsini dəyərləndirir.

"Bu iclaslarda hər rüb, yarım il və il ərzində müxtəlif sahələr üzrə görülən işlər haqqında məlumatlar dinlənilir, təhlillər aparılır, gələcək planlar müzakirə olunur, qarşıya yeni vəzifələr qoyulur. Azərbaycanda çoxlu mütərəqqi proseslərin baş verdiyini nəzərə alsaq, bu iclasların nə qədər əhəmiyyət kəsb etdiyini görərik".

Yazı müəllifi hesab edir ki, bu iclasların mahiyyəti şəffaflıqda və xalqa hesabat verilməsindədir.

Müəllif deyir ki, ölkə rəhbərinin həyata keçirdiyi siyasi xətt çox dinamik və çevik olduğundan hakimiyyətin hesabatı da kifayət qədər əhatəli və geniş olur.

Məqalə müəllifinə görə, bu iclaslar xalqa hesabatla yanaşı, həm də hakimiyyətin fəaliyyətini açıq və şəffaf şəkildə aparmasının əyani təsdiqidir, çünki hakimiyyətin bütün təşəbbüsləri xalqın sosial rifah halının getdikcə yaxşılaşmasına, dövlətin daha da möhkəmlənməsinə xidmət edir.

Müəllif iyulun 8-də keçirilmiş Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasını da dəyərləndirir.

Yazı müəllifi deyir ki, iclasda 2018-ci ilin birinci yarısı iqtisadi baxımdan uğurlu hesab edilib, başlanmış islahatların nəticəsi olaraq iqtisadi statistika müsbətdir, ümumi daxili məhsulda 11,3% artım var, qeyri-neft sənayesində bu artım 8,8% həcmindədir.

Müəllif deyir ki, iclasda ölkənin iqtisadi inkişafı ilə yanaşı, siyasi uğurları da yer alıb, Azərbaycan dünya birliyinin fəal və qəbul edilən üzvü kimi beynəlxalq mövqelərini əhəmiyyətli dərəcədə gücləndirib.

Müəllif Azərbaycanın həyata keçirdiyi xarici siyasətin milli maraqlara, dövlətin qlobal miqyasda mövqelərini layiqincə təmin etməyə xidmət göstərdiyini deyir və bu sırada Avropa İttifaqı və ABŞ-la münasibətləri xüsusi olaraq vurğulayır.

Yazı müəllifif hesab edir ki, ölkədə həyata keçirilən qətiyyətli siyasi kursla beynəlxalq aləmdə yüksək nüfuz qazanan Azərbaycana həm də müstəqil enerji siyasətinə, bölgədə reallaşdırdığı qlobal layihələrinə görə ehtiramla yanaşırlar.

Müəllif deyir ki, bütün bu uğurların təməlində dayanan əsas amil yürüdülən müstəqil siyasətdir: "Bizim siyasətimiz müstəqillik siyasətidir, inkişaf siyasətidir, məhz bizim apardığımız siyasət nəticəsində Azərbaycan son 15 il ərzində çox böyük və şərəfli yol keçmişdir, bütün göstəricilərə görə dünya miqyasında çox yüksək yerlərdədir" - deyə müəllif dövlət başçından sitat gətirir.

Müəllif vurğulayır ki, bunun nəticəsidir ki, Azərbaycanın dünya miqyasında mövqeləri ötən 15 ildə daha da güclənib, ötən 6 ayda isə bu istiqamətdə kifayət qədər uğurlu gedişlər edilib.

Suriya - Gəncə "paraleli"

"Müsavat.com"da "Dünyəvilik, yoxsa xəncərə dönüş?!" sərlövhəli məqalə oxumaq olar.

Müəllif iyulun 10-da Gəncədə bir qrup şəxsin aksiya adı ilə iğtişaşlar törətməsini, iki polis zabitinin qətlə yetirilməsini və bundan çıxan nəticələri dəyərləndirir.

Müəllif dünən Gəncədə baş verən hadisələrlə Suriyadakı hadisələr arasında parallel aparır və Gəncə kimi bir vaxtlar Azərbaycan xalq Cümhuriyyətinin paytaxtı olmuş bir şəhərdə bu hadisələrin törədilməsini dəhşət adlandırır.

Yazı müəllifi bu hadisələrin ölkəni xurafata doğru apara biləcəyi və sabah həmin vurulan polisin yerində istənilən şəxsin, ailənin ola biləcəyi xəbərdarlığı edir.

Müəllifə görə, dünən Gəncədə baş verənlərlə bağlı izlədiyi videosüjetlər Azərbaycanı gözləyən fəlakətin xəbərdarlığıdır və bölgədəki yüksək rütbəli iki zabitin vurulması sıradan olay deyil.

Yazı müəllifif hesab edir ki olaylara ciddi reaksiya verilməsə sonu daha da bəd ola bilər: "Biz adamlar və olaylarla mırtlaşmağı yığışdıraq, silkələnək, oyanaq, özümüzə dönək və anlayaq ki, bu axının qarşısına millət olaraq çıxmasaq, bizi sel yuyub aparar, heç nəsiz qalarıq".

Müəllif deyir ki, özbaşına, pul hərisi, rüşvətxor, qəddar, şərəfi, ləyaqəti olmayan, azərbaycançılığı, insanlığı yox həddində bir qrup məmur da var və onlara qarşı bir iç mübarizə də var: "Amma onlar dövlət deyil, hakimiyyətdə olan komandanın bir qrupudur. Yəni dövlət və hakimiyyət sözlərini qarşıdırmayaq. Hakimiyyətdə olan bir qrupun acığına dövlətdən vaz keçməyək. Dövləti heç nəyə qurban vermək olmaz".

Müəllifə görə, dövləti insanları nədəsə incidən bir məmura fəda etmək, "yaxşı oldu" demək heç olmaz, indi inciklikləri kənara qoyaraq dövlət, millət olmaq zamanı gəlib.

Müəllif deyir ki, bir olmaq vaxtı gəlib, Gəncədən başlayaraq haralaracan isə uzana biləcək sürüklənmələrə son qoymağa, bizə aid olanları əlimizdən alaraq yerdə qıvrılmağa məcbur etməsinlər.

Hamıya qayğı, alimdən başqa?

"Azadlıqinfo"da isə "Əliyevin elmə "qayğısı"" sərlövəhli məqalə diqqət cəlb edir.

Yazı müəllifi deyir ki, dövlət başçısı İlham Əliyevin bu il iyunun 25-də imzaladığı fərmanla bir sıra kateqoriya şəxslərin əmək pensiyalarına qulluq stajlarına görə əlavələrin yenidən hesablanması qaydaları açıqlanıb.

Müəllif deyir ki, bu sırada sabiq baş nazir və müavinləri, mərkəzi icra hakimiyyəti orqanının rəhbəri və rəhbər müavinləri, yerli icra hakimiyyəti orqanının rəhbəri (başçısı), Milli Televiziya və Radio Şurasının üzvləri, sabiq hakimlər, prokurorluq orqanlarında qulluq etmiş şəxslər, ədliyyə işçiləri, fövqəladə hallar orqanlarının işçiləri keçir : "Göründüyü kimi, analoqsuz ölkənin prezidenti bu uzun siyahıda işləməyən alimlərdən başqa hamını yad edib. Sabiq hakimin pensiyasını artırıb, işləməyən alimi Allahın ümidinə buraxmaq, hökumətin elmə olan münasibətinin göstəricisidir", - deyə müəllif alimlərin bu sırada yer almamasına münasibət ifadə edir.

Müəllif iddia edir ki, bu hakimiyyət üçün elmi olmayan alim, seçki saxtakarlığında alət olan müəllim, zülmətə tərif yağdıran ziyalı önəmlidir və belələrinə də həmişə "nəmər" verilir.

Yenə də müəllifin iddiasına görə, həqiqi ziyalı, əsl elm adamı, ləyaqətli müəllim isə heç vaxt YAP hakimiyyəti üçün cəlbedici olmayıb.

Yazı müəllifi vurğulayır ki. elə bundan da irəli gələrək elm adamları dilənçi payına möhtac qalıb, savadsız məmurlar saxta elmi dərəcələr alıb, təhsil rüşvət yuvasına çevrilib.

Müəllif hesab edir ki, məlum sərəncam elmə belə ögey münasibətin kimlərinsə özfəaliyyətinin nəticəsi olmadığını, yüksək rütbəli məmurların mövqeyi olmasını ortaya qoyur.

Hakimiyyət alimin az, cahilin çox olduğu bir məmləkəti idarə etmək arzusundadır.