Media-icmal 11.07.20

Koronavirus pandemiyasına qarşı mübarizə,  evə qapanmanın mümkün mənfi psixoloji təsirləri, Rəqabət Məcəlləsinin hələ də qəbul olunmaması və s. məsələlər medianın aparıcı mövzuları sırasındadır..

Yoluxma sabit qalmaqdadır

“Azərbaycan” qəzeti  “Ölkədəki epidemioloji vəziyyətə uyğun addımlar atılır sərlövhəli məqalədə ölkədə koronavirus pandemiyası ilə bağlı vəziyyəti dəyərləndirir.

Müəllif deyir ki, dünyada COVİD-19 pandemiyası ilə bağlı böhran davam edir və bunun nə vaxt başa çatacağı bəlli deyil.

Yazı müəllifi əlavə edir ki, Azərbaycanda da bu virusa qarşı mübarizə davam edir, epidemioloji vəziyyət dəyərləndirilir, uyğun addımlar atılır.

Amma müəllif bunu da vurğulayır ki, hələ də yoluxma sayı yüksəkdir, gündəlik yoluxma sayının 500-dən aşağı düşməməsi də bunun göstəricisidir, səhiyyə sisteminin daha çox yüklənməsi deməkdir.

Müəllifin fikrincə, bu mübarizədə qalib olmaq mümkündr və əslinə qalsa bu virusu təhlükəli edən onun sürətli yoluxma xüsusiyyətidir, bunun üçün isə hamıdan maksimum diqqətli olmaq tələb edilir.

Məqalə müəllifi vurğulayır ki, cəmiyyətin böyük əksəriyyəti məsuliyyət, nizam-intizam göstərir, amma karantin qaydalarını pozanlar da yox deyil, belə hallar aradan qaldırılmalıdır, çünki bu, milli təhlükəsizlik, xalqın var olmasına bağlı ən vacib məsələdir.

Bu payıza kimi davam etsə...

“Mətbuat.az” saytı  “Psixoloqdan  xəbərdarlıq: “Operativ Qərargah bunu nəzərə alsın, belə getsə payızadək hamı...” sərlövhəli məqalədə psixoloq Aytən Ələkbərzadə karantin rejimi dövründə insanların durumu barədə danışır.

Psixoloqa görə, tədqiqatlar göstərir ki, birdən-birə karantin qaydalarının tətbiqi, hər şeyin çərçivəyə salınması insanların psixologiyasına təsir etdi. İnsanlar azad mühitdə ikən karantin vəziyyətinə düşdülər.

Psixoloqa görə, ölkədə karantinlə bağlı qərarların alınmasında psixoloqlardan da məsləhət alınmalı idi. Onun fikrincə, qərar verilərkən mövsümü şərtləri də nəzərə alınmalıdır.

“Yay ərzində evdə oturduqları üçün insanlarda D vitamininin azalması müşahidə olunacaq. Çünki bu vitamini almaq üçün gün ərzində saat 5-7 aralığında gün işığı qəbul etmək lazımdır. Eyni zamanda səhər saat 10-12 aralığında dəri D vitamini qəbul edir. Bunların hamısı insan immunetitinin zəifləməsinə səbəb olur, artıq Operativ Qərargah bunu nəzərə almalıdır. Ölkədə hamı payız aylarında depressiv vəziyyətə düşmüş halda olacaq” deyə psixoloq mümkün nəticələri” vurğulayıb”.

14 yaşı olan qanun layihəsi     

“Sfera.az” saytında yer alan “Rəqabət Məcəlləsi”nin qəbulu niyə müşkülə çevrilib?” – sərlövhəli məqalədə  adı çəkilən qanun layihəsinin neçə illərdir ki, qəbul olunmaması ön plana çıxaırlır.

Müəllifə görə, bu qanun layihəsi ölkədə azad rəqabət mühitini inkişaf etdirmək, inhisarçılığı, kölgə iqtisadiyyatını zəiflətmək baxımından vacibdir.

Layihə ilə bağlı 2006-2007-ci illərdə parlamentdə iki oxunuş olsa da o vaxtdan bu yana sənəd sonuncu üçüncü oxunuşa çıxaırlmayıb.

Müəllif deyir ki, Azərbaycan Ümumdünya Ticarət Təşkilatına üzv olmaq istəyir, bu məqsədlə həmin təşkilatla 1997-ci ildən danışıqlar aparılır indiyə kimi qəbul olunmaması şəbəblərindən biri də Rəqabət Məcəlləsinin qəbul olunmamasıdır.

Müəllif əlavə edir ki, Rəqabət Məcəlləsinin qəbul olunması qısa müddətdə əhatə ediyi sahədə problemlərin sürətlə həlli demək deyil,  amma istənilən halda inhisarçılığa qarşı mübarizədə irəliyə doğru addımdır.