Media-icmal 11.07.2016

Lobbiçilik hərəkatının güclənməsi, manatın gələcək taleyi,  işsizlik problemi bugünkü medianın aparıcı mövzusudur.  

“Azərbaycan” qəzeti ölkə diasporunun güclü lobbi hərəkatına  dönməsinin lazımlığını təbliğ edən “Azərbaycan diasporu güclü lobbu hərəkatına çevrilir”( http://www.azerbaijan-news.az/index.php?mod=3&id=100792) sərlövhəli məqalə ilə çıxış edib.

Məqalədə bu ilin oktyabrında Azərbaycanın dövlət müstəqilliyini elan etməsinin 25-ci ildönümünün tamam olduğu xatırladılır. Müəllifin fikrincə, bu müddətdə Azərbaycanın əldə etdiyi uğurlara bəzi dövlətlər ancaq qibtə edə bilərlər. Müəllifə görə, bu müddətdə Azərbaycanda aşağıdakı keyfiyyətə malik cəmiyyət formalaşıb: “ Güclü vətəndaş cəmiyyətinin formalaşdığı, insan hüquq və azadlıqlarının etibarlı şəkildə təmin edildiyi Azərbaycan həm də iqtisadi və hərbi baxımdan Cənubi Qafqazın lideri, söz sahibi olan ölkəsidir. Bu gün rəsmi Bakının razılığı və iştirakı olmadan bölgədə heç bir transmilli layihənin həyata keçirilməsi mümkün deyil”.

Müəllif  bu uğurlara baxmayaraq, problemlərin də çox olduğunu deyir və bu sırada Azərbaycan həqiqətlərinin dünyaya tanıdılmasını mühüm məsələ adlandırır.

Azərbaycan həqiqətləri  kontekstində isə torpaqların işğal altında olması, bir milyondan artıq azərbaycanlının qaçqın və məcburi köçkünə çevrilməsi, erməni silahlı birləşmələrinin dinc azərbaycanlı əhaliyə qarşı həyata keçirdiyi soyqırım cinayətlərinin xüsusilə önə çəkiməsi tövsiyə edilir. Bununla yanaşı Azərbaycanın mədəniyyəti və müasir uğurlarının da təbliğ edilməsi vacib məsələ kimi önə çəkilir.  Bütün bu istiqamətlər üzrə lobbiçilik fəaliyyətinin əsas rol oynadığı xüsusi vurğulanır.

Xaricdə yaşayan azərbaycanlıların yaşadıqları ölkənin ictimai-siyasi, sosial-mədəni həyatına inteqrasiya etmələri, siyasi dairələrə nüfuz etmələri diaspor təşkilatlarının əsas vəzifələrindən biri kimi dəyərləndirilir. Bu sırada bir istiqamət xüsusilə qeyd edilir: “Lobbiçiliyin əsas yönlərindən biri də yerli kütləvi informasiya vasitələri ilə əlaqələri gücləndirməkdir. Bu məsələ lobbiçilik fəaliyyətində xüsusilə mühümdür”. 

Müəllifin düşüncəsinə görə, bütünlükdə, azərbaycanlıların lobbiçilik fəaliyyəti daha təsiredici faktora çevrilməli, yaşadıqları dövlətin siyasi qərarlarının qəbulunda, hər bir xarici cəmiyyətin Azərbaycanla bağlı düzgün ictimai-siyasi münasibətinin formalaşmasında mühüm rol oynamalıdır, çünki bu, dövrün tələbi və zamanın çağırışıdır.

“Yeni Müsavat” qəzeti “Manata təzyiqlər artacaq” (http://musavat.com/news/iqtisadiyyat/manata-psixoloji-tezyiqler-artacaq-ekspertler-xeberdarliq-edir_361867.html) məqaləsilə manatın durumunu ekspertlərlə dəyərləndirir.

Məqalədə manatla bağlı durumu ekspertlərin yenə də kritik dəyərləndirdiyi vurğulanır. Onların çoxu manatı ilin sonunadək indiki səviyyədə saxlamağın mümkünsüzlüyünü deyirlər. Əksinə, manatın yenidən və kəskin ucuzlaşma ehtimallarının yüksəkliyinə işarə edirlər. Ekspertlərin fikrincə, milli valyutanın dəyərini itirməsini önləmək üçün bəzi addımlar atıla bilər. Ancaq bu mexanizmlərin olmaması devalvasiya narahatlığını bir qədər də artırır.

“Ən yaxşı halda indiki məzənnəni ilin sonuna kimi saxlamaq mümkün olmayacaq, indiki məzənnə 1.56, hətta 1.70 həddinə qədər qalxacaq”. Bunu isə ekspert Əkrəm  Həsənli deyir. Onun firkincə, Maliyyə Bazarlarına Nəzarət Palatası normal addımlar atdığı halda bu fərq az dəyişə bilər, amma normal addımlar olmazsa dolların 2 manatdan da yuxarı qalxması mümkündür. Ekspert Mərkəzi Banka və Palataya manatla bağlı ən pis ssenarinin baş verməməsi üçün kreditlərin təyinatı üzrə xərclənməsini nəzarətdə saxlamağı tövsiyə edir.

“Manatla bağlı durum getdikcə pisləşir, son 13 ildə ilk dəfədir ki, tədiyyə balansında  kəsir yaranır, xarici ticarətdəki mənfi saldo manata təzyiqləri artırır”. Bu qənaəti isə ekspert Qubad İbadoğlu bildirib. Onun sözlərinə görə, il ərzində neft satışı və qeyri-neft sektorundan  daxil olan mədaxiin 7-8 milyard dollar  olacağını deyən ekspert bunun rəsmi idxala görə valyuta xərclərini ödəməyəcəyi qənaətindədir.