Media-icmal 12.02.21

Türkiyə və Azərbaycan sərhədlərinin Ermənistanla açılması şərtləri, Qarabağda gərginliyin arta bilməsi ehtimalı, “ağıllı kəndlər”, “ağıllı şəhərlər” necə idarə ediləcək, Türkiyə ilə vizanın ləğvinin Azərbaycan turizmunə mümkün təsiri və s. medianın aparıcı mövzuları sırasındadır.

“Müsavat.com”  saytı “Türkiyə və Azərbaycan Ermənistanla sərhədləri eyni vaxtda açacaq: Amma iki müttəfiq dövlətin ortaq şərtləri yerinə yetirilərsə” sərlövhəli məqalədə müəllif Türkiyə və Azərbaycanın Ermənistania sərhədlərini nə vaxt açacaqları müzakirə olunur.

Müəllif deyir ki, rəsmi İrəvan bu günlərdə Türkiyənin Ermənistanla sərhədləri qapalı saxlaması üşün əsas olmadığı bəyanatı səsləndirib. Əlavə edir ki, bunun üçün Ermənistan Azərbaycanla sərhədlərin demarkasiyasını yekunlaşdırmalı, ərazi bütövlüyünü tanıdığı barədə rəsmi Bakı ilə anlaşma imzalamalı, Türkiyə sərhədlərini tanımalı, ərazi və qondarma "erməni soyqırımı" iddialarından imtina etməlidir.

Müəllif vurğulayır ki, mövcud durumdan çıxmaq üçün Ermənistanın yeni "nəfəsliyə" ehtiyacı var, bu, ölkənin çökmüş iqtisadiyyatını dirçəltmək baxımından, ilk növbədə geopolitik və geoiqtisadi blokada şəraitindən xilas olmaq üçün vacibdir.

Müəllifin fikrincə, buna görə Ermənistan sərhədlərin açılmasına israr edir, Ermənistanda artıq bu reallığı anlayırlar, çünki artıq Ermənistanın defolt vəziyyətinə sürətlə yaxınlaşmasından narahatlıq başlanıb.

Müəllifə görə, Ermənistanla sərhədlərin açılması Türkiyəyə maliyyə-iqtisadi mənfəət vəd etmədiyi üçün bunda maraqlı görünmür.

“Ona görə də Ermənistan xarici işlər nazirinin Türkiyə qarşısında "sərhəd şərtləri" irəli sürməsi tamamilə mənasızdır. Üstəlik, sərhədlərin açılması Türkiyəyə deyil, məhz Ermənistana daha çox lazımdır” deyə müəllif bildirir.

“Redaktor.az”  saytı “Qarabağda gərginlik arta bilər – müharibə yenidən başlayır?” sərlövhəli məqalədə müəllif 2020-ci ildə 44 günlük Vətən Müharibəsinin nəticəsi olaraq Qarabağda mövcud ictimai-siyasi durumu politoloq Qabil Hüseynli ilə dəyərləndirir.

Müəllif Ermənistan prokurorunun Dağlıq Qarabağa səfərini və buradakı görüşlərini qanunsuz adlandırır.

Politoloqa görə, qanunsuz  şəkildə edilən səfərlər və rus sülhməramlıların özbaşına hərəkətləri davam edərsə, bölgədə gərginlik yenidən arta bilər:

“Türkiyə-Rusiya Birgə Monitorinq Mərkəzi fəaliyyətə başlayandan sonra Laçındakı buraxılış məntəqəsində nisbətən qayda-qanun yaradılıb.  Fransadan nümayəndələrin gəlişi zamanı Azərbaycandan akkreditasiya alınması bildirilib. Ruslar gah Azərbaycanın ərazi bütövlüyünü tanıyırlar, gah da buna xələl gətirən hərəkətlər edirlər” .

Politoloq əalvə edir ki, Azərbaycan ziyalıları gündəlik fəaliyyətlərində sülhməramlıların qanunsuzluqlarından danışmalı, Xankəndinə azəbaycanlıların tez bir zamanda qaytarılması haqqında fikirlər səsləndirməlidirlər.

“Mətbuat.az”  saytı isə Qarabağda "ağıllı kənd"ləri kimlər idarə edəcək? - ekspertlər izah etdi” sərlövhəli məqalədə müəllif Qarabağda layihələndirilən  “Ağıllı kəndlər”in idarəçiliyini kimlərin yerinə yetirəcəkləri müzakirə edilir.

Müəllif yada salır ki, dövlət rəhbərliyi səviyyəsində Qarabağın  “smart city” və “smart village” layihələri əsasında bərpa edilməli olduğu bəyan edilib.

Müəllifin “bəs “smart city” və “smart village” nə deməkdir? belə infrastrukturların qurulması nə vəd edir?” sualını isə ekspertlər cavablandırırlar.

Mövzu ilə bağlı "Multimedia" İnformasiya Sistemləri Texnologiyaları Mərkəzinin direktoru Osman Gündüz deyir ki, bu sahənin inkişafı ilə əlaqəli konseptual məsələlər tez bir zamanda tamamlanmalıdır.

O.Gündüz hesab edir ki, maraqlı tərəflər, xarici ekspertləri də dəvət etməklə müzakirələr aparılmalı, uğurlu təcrübələrdən istifadə olunmalıdır: “"Ağıllı şəhər və kənd" infrastrukturu uzunmüddətli "Rəqəmsal Azərbaycan" konsepsiyasının bir tərkib hissəsi olmalıdır. Odur ki, adı çəkilən qurumlar öncə "Rəqəmsal Azərbaycan" konsepsiyasını ortaya qoymalıdırlar”, - O.Gündüz bidirir.

Ekspert Elnur Fərzəliyev Metbuat.az-a bildirib ki, “smart city” və “smart village” təcrübələrindən artıq dünyanın bir çox ölkələrində uğurla istifadə olunub.

Ekspert hesab edir ki, o torpaqlarda turistləri cəlb edə biləcək infrastruktur qurulmalıdır:  “Bu məqsədlə də “ağıllı kənd” və “ağıllı şəhər”lərin qurulması nəzərdə tutulur. Həmin ərazilərdə belə bir şəraitin qurulması, o torpaqlarda yaşamaq istəyən insanlar üçün də maraqlı olacaqdır'', - ekspert bildirir.

“Bizimyol.info.az”  saytı isə “Viza tələbinin ləğv olunması türkiyəli turistlərin artmasına səbəb olacaq” sərlövhəli məqalədə müəllif Azərbaycanla Türkiyə arasında viza rejiminin ləğvinin mümkün müsbət nəticələrini Dövlət Turizm Agentliyinin sədri Fuad Nağıyevlə qiymətləndirir.

“Ümid edirik ki, Türkiyə vətəndaşları üçün Azərbaycana viza tələbinin ləğv olunması türkiyəli turistlərin artmasına xeyli təsir edəcək. Ölkələrimiz arasında turizm münasibətlərinin inkişafında qarşılıqlı turist mübadiləsinin artması bizim üçün önəmlidir”, - Agentliyin rəhbəri bildirib.

Müəllifə görə, 2019-cu ildə Azərbaycandan Türkiyəyə 1 milyon nəfər, Türkiyədən Azərbaycana isə 200 min nəfər  turist kimi səfər edib.

Dövlət Turizm Agentliyi Aparatının rəhbəri Kənan Qasımov isə deyir ki, Türkiyədən daha çox turist cəlb edə bilmək üçün Azərbaycan turizminin bu ölkədə tanıdılmasına ehtiyac var.