Media-icmal 12.06.20

Koronavirus pandemiyasına qarşı mübarizə, dəmiryolu infrastrukturuna olan maneələr, idarəçilik sisteminə baxış və s. məsələlər medianın aparıcı mövzuları sırasındadır...

Pandemiyaya qarşı mübarizə nümunəsi

Rəsmi "Azərbaycan" qəzeti "Koronavirusla mübarizədə Azərbaycan nümunəsi" sərlövhəli məqalədə ölkədə koronavirusa qarşı mübarizəni dəyərləndirir.

Müəllif 2020-ci il başlayandan bu virusa qarşı mübarizə aparıldığını deyərək, Azərbaycanınn adının pandemiyaya qarşı mübarizədə ən ciddi tədbirlər görmüş ölkələr sırasında olduğunu bildirir. 

Müəllif əlavə edir ki, Azərbaycan dövləti bütün imkanlarını virusun yayılmasının qarşısının alınmasına, fəsadlarının aradan qaldırılmasına səfərbər edib. "Ümumdünya Səhiyyə Təşkilatı bu bəlaya qarşı mübarizədə Azərbaycanın gördüyü tədbirləri bir neçə dəfə yüksək qiymətləndirib, bu sahədə nümunəvi ölkə adlandırıb".

Müəllifin sözlərinə görə, ölkədə testlərin aparılması üçün 20-dən çox laboratoriya fəaliyyət göstərir, ölkədə yeni yoluxma hallarının müəyyən edilməsi üçün 356 032 test aparılıb.

Müəllifin fikrincə, Azərbaycanda mövcud səhiyyə imkanları vəziyyəti nəzarət altında saxlamağa imkan verir, xəstələrin müalicəsi üçün ən qabaqcıl 20 xəstəxana ayrılıb. Ümumilikdə isə son 16 il ərzində ölkəmizdə 700-dən çox tibb müəssisəsi ya yenidən tikilib, ya əsaslı təmir edilib.

Müəllifə görə, karantində qalan vətəndaşlar üçün də xüsusi şərait yaradılıb, onlar 4-5 ulduzlu hotellərdə, Atletlər Kəndində yerləşdirilir, bu müddət ərzində minlərlə insan xaricdən təxliyə edilib və proses qrafik üzrə davam etdirilir.

Müəllif hesab edir ki, qabaqlayıcı tədbirlər nəticəsində bu gün vəziyyət tam nəzarət altındadır.

Qanunsuz tikililər və dəmiryolu

"Sfera.az" saytında "Qanunsuz tikililər dəmir yolu infrastrukturuna ciddi ziyan vurur" sərlövhəli məqalədə müəllif  problemlə bağlı nəqliyyat sahəsi üzrə ekspert Elmar Əliyevlə söhbətləşir.

Müəllifin sözlərinə görə, Azərbaycanda dəmir yolunun mühafizə zolaqlarında vətəndaşlara məxsus qeyri-qanuni tikililər mövcuddur: "Təkcə 2018-ci ildə təxminən 700 nəfərə yeni ev verilərək dəmir yolunun mühafizə zolaqlarından kənarlaşdırılıb. Lakin hələ də xeyli sayda bu cür tikililər qalmaqdadır. Onlar əsas etibarı ilə paytaxtın şərqində Keşlə qəsəbəsində "Şanxay" adlandırılan ərazidə cəmləşib".

Ekspert E.Əliyev hesab edir ki, həmin ərazidə qanunsuz məskunlaşma dəmiryolunun fəaliyyətinə əhəmiyyətli dərəcədə mənfi təsir göstərir: "Dəmir yolu strateji əhəmiyyətli bir sahədir. Sabah yeni xətt çəkmək, yeni stansiya, yarımstansiya və ya platforma inşa etmək zərurəti yarana bilər. Mühafizə zolaqları ilə bağlı tələblərin olması bunların problemsiz olaraq reallaşmasını təmin edir. İndiki halda isə bunu etmək müşküldür".

Ekspert əlavə edir ki, oradan əhalinin köçürülməsinə artıq start verilsə də, problem hələ də qalmaqda davam edir, həmin ərazidə qatarlar, demək olar ki, evlərə sürtünərək keçir.

Oradan neft qatarlarının kçediyini deyən müəllifə görə, hər hansı bir fövqəladə hadisə baş versə, bu, böyük fəlakətə yol aça bilər: "Çünki ora nəinki, xüsusi yanğınsöndurən qatarlar, heç analoji təyinatlı avtonəqliyyat vasitələri də daxil ola bilməyəcək".

E.Əliyev daha bir problem kimi bu yaşayış məntəqəsində mərkzələşmiş kanalizasiya sisteminin olmamasını göstərir və deyir ki, dəmir yolu xətlərinə axıdılan çirkab suları relsaltı balastı yumşaldır: "Bu isə, öz növbəsində, qatarların hərəkəti üçün təhlükə yaradaraq qəzaların başvermə ehtimalını artırır və infrastrukturun vaxtından tez aşınmasına gətirib çıxarır. Əksər hallarda adi təmir-bərpa işlərinin aparılması mümkünsüz olur".

YAP-ın da öz günahı...

"Yenisabah.az" saytında yer alan "Həmin məmurların korrupsionerə çevrilməsində "Yeni Azərbaycan" partiyasının (YAP) da günahı var", sərlövhəli məqalədə müəllif müasir idarəçiliklə bağlı YAP-ın keçmiş qurucularından olmuş iqtisadçı Əli Əlirzayevlə danışır.

Ə.Əlirzayevə görə, ölkədə aparılan islahat kursunda ilk yerdə kadr islahatı durmalıdır, elə kadrlar olmalıdır ki, orada rüşvətə yer verilməsin: "Bəzən yeni təmiz kadr gəlir, amma sonradan görürsən ki, vəzifədən şirniklənir və tamah ona güc gəlir. Elə işlər görür ki, heç YAP-çı olmayan o işləri görməz".

Onun fikrincə, islahatlar kursu partiyaları da əhatə etməlidir, belə ki, YAP-da da xoşagəlməz xüsusiyyətləri olan adamlar var: "Gəlirlər YAP-a, vəzifə tuturlar, vəzifə tutandan sonra da rüşvətə qurşanırlar. Ona görə də korrupsiya, rüşvətə qarşı mübarizə aparıldığı kimi, YAP-ın özündə də dəyişiklik lazımdır", deyə Ə.Əlirzayev təklif irəli sürür.

O hesab edir ki, bəzi şəxslər YAP-a vəzifəyə getmək, rüşvət almaq üçün gəldilər və potensiallarını buna sərf etdilər, elə buna görə də YAP-da islahatlar olmalıdır: "Uşağın pis olmasında valideynin tərbiyəni düzgün verə bilməməsi rol oynadığı kimi, həmin məmurların gəlib sonradan korrupsionerə çevrilməsində YAP-ın da günahı var, çünki həmin şəxslərə şans, üstünlük verib. Nəticədə isə başı ağrıyır və belə də olmalıdır. Bunların hamısı bir-biri ilə əlaqəli olan proseslərdir".