Media-icmal 12.06.20

Pandemiyaya qarşı mübarizə, idman zallarının açılmamasına baxış, korrupsiya və rüşvət əməllərilə bağlı paytaxt Bakının rayonlarında əməliyyatlar keçirilməsi təklifi, dünya bazarında neftin ucuzlaşması və s. məsələlər medianın aparıcı mövzuları sırasındadır...

"Azərbaycan" qəzeti "Həyata keçirilən zəruri tədbirlər müsbət bəhrəsini verir" sərlövhəli məqalədə Azərbaycanda COVİD-19 pandemiyasına qarşı mübarizəni dəyərləndirir. 

Müəllif deyir ki, bu pandemiyaya qarşı mübarizə Yer üzünün əsas problemi olaraq qalır, ən səmərəli yol karantin rejimi olsa da, bunun dünya iqtisadiyyatına ağır zərbəsi də reallıqdır.

Müəllif əlavə edir ki, hələ də sosial məsafə saxlamaq, maskadan istifadə və gigiyena qaydalarına əməl etmək ən təsirli mübarizə vasitəsi olaraq qalır.

Yazıda vurğulanır ki, vətəndaşların sağlamlığı və təhlükəsizliyi dövlətin əsas prioriteti kimi qalmaqda davam edir.

Məqalədə Azərbaycanda infeksiyaya qarşı mübarizənin düzgün qurulduğu, xəstəliyin erkən aşkarlanmasının  yoluxmanın qarşısını almaqda xüsusi rolu olduğu vurğulanır.

Müəllif deyir ki, ölkədə 45 laboratoriya qurulub, 1 milyon nəfərə yaxın insan testdən keçib, paralel olaraq əhalinin sosial müdafiəsi gücləndirilib, sosial dəstək tədbirləri 5 milyon vətəndaşı əhatə edib.

Müəllif əlavə edir ki, avqustun 5-dən karantin rejimində yumşalmalar baş verib, sentyabrın 8-dən isə rayonlara gediş-gəlişlər bərpa edilib, amma toy-nişan şənliklərinin keçirilməsi hələ qadağa altındadır.

Müəllifin sözlərinə görə, payız mövsümü ilə bağlı qrip və ona bənzər xəstəliklərə yoluxma ehtimalı artır, TƏBİB payızda ölkəmizə qrip əleyhinə vaksinlərin gətirilməsi və tətbiq edilməsini planlaşdırır, mütəxəssislər risk qrupunda olanların vaksinasiyaya cəlb edilməsini tövsiyə edirlər.

"Redaktor.az" saytı "İdman zalları təcili açılmalıdır, əks halda..." sərlövhəli məqalədə idman zallarının açılmaması barədə məşqçi Niyazi Hüseynovla söhbətləşir.

Onun sözlərinə görə, Nazirlər Kabineti yanında Operativ Qərargahın qərarı ilə sentyabrın 8-dən Azərbaycanda ictimai iaşə obyektlərinin daxilində xidmət göstərilməsinə icazə verildi, amma hələ də idman zallarının açılması barədə heç bir məlumat yoxdur.

N.Hüseynov pandemiya dövründə idman zallarının bağlanmasını absurd yanaşma adlandırır: "Çünki insanın immun sistemi güclü olduqdan sonra, nəticədə koronavirus kimi təhlükəli bakteriyalara yoluxsa belə, ona tez qalib gələ bilir. TƏBİB-in isə verdiyi qərarlar, əksinə, insanların ilkin növbədə sağlamlığına, sonra psixologiyasına birbaşa təsir göstərir. İnsan hərəkətsiz qaldıqda immun sistemi zəifləyir".

N.Hüseynov qeyd edib ki, heç bir ölkədə idman zallarında güclü nəzarət edilmir, ancaq gigienaya riayət edilir: "...Ara məsafə həmişə qorunur. Çünki hər kəs bir trenajorda, qanteldə və ya ştanqda məşq edir. Heç vaxt məşq edənlər bir-biri ilə söhbət edə bilməz, fikirləri məşqdə olmalıdır. Buna görə də, həmişə məşq edənlərin arasında sosial məsafə olur".

"Sfera.az" saytı "DTX-nin əməliyyatları Bakının rayonlarını da əhatə etməlidir" sərlövhəli məqalədə bəhs olunan mövzu ilə bağlı deputat Vahid Əhmədovla söhbətləşir.

Müəllif deyir ki, rüşvət və korrupsiya halları ilə bağlı icra başçılarının və s. həbsə alınmaları onları bu əməllərdən çəkindirmir.

Müəllif əlavə edir ki, son günlər tənqidlər təkcə əyalətlərdəki icra başçılarına deyil, həm də Bakının rayonlarına rəhbərlik edən məmurlara yönəlib. İctimaiyyət nümayəndələri bildirirlər ki, ayrı-ayrı bölgələrdə keçirilən antikorrupsiya əməliyyatları paytaxt rayonlarını da əhatə etməlidir.

  Müəllifin sözlərinə görə, Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov da bu qənaətdədir. 

Deputat icra başçıları ilə bağlı araşdırmaların davam etməli olduğunu söyləyib.  "Çünki daxil olan məlumatlardan aydın olur ki, son olaylar "əyalət padşahları"na dərs olmayıb. Onların bəziləri yenə də öz bildiklərini edir, vətəndaşları incidir, süründürməçiliyə yol verirlər. Bu əməliyyatlar Bakı da daxil olmaqla, digər şəhər və rayonları da əhatə edə bilər. Çünki vətəndaş narazılıqları kifayət qədər çoxdur. Araşdırmalara başlanması ərazidəki rüşvətxorluq halları və bununla bağlı şikayətlərdən asılıdır".

V.Əhmədov hesab edir ki, bəzi məmular ölkə rəhbərinin çağırışlarına məhəl qoymurlar: "Hesab edirəm ki, əməliyyatların əhatə dairəsi genişləndirilməlidir.

Çünki bəzi rəhbər şəxslər hələ də baş verənlərdən nəticə çıxarmayıblar".

"Müsavat.com" saytında "Yeni böhran yaşana bilər - deputatdan açıqlama" sərlövhəli məqalədə müəllif dünya bazarında neftin qiymətində müşahidə edilən azalmaları deputat Vüqar Bayramovla müzakirə edir.

Müəllifin sözlərinə görə, V.Bayramov bildirib ki, neftin dünya bazar qiymətində yenidən azalmalar müşahidə olunur, belə ki, avqust ayında 1 bareli 45 dollara yaxınlaşan Brent markalı neft indi 42 dollardan ucuz təklif edilir.

Onun sözlərinə görə, neftin qiymətindəki azalmalar daha çox ABŞ-da benzinə tələbin azalması və sözügedən ölkənin 22 ştatında koronavirusa yoluxma sayının yenidən artması ilə əlaqəlidir.

Deputat davam edərək deyir: "Digər tərəfdən, əksər beynəlxalq qurumlar da pandemiyanın ikinci dalğasının olacağı və hətta dünya iqtisadiyyatındakı itkilərin 35 trilyon dollaradək artacağı barədə açıqlamalar verirlər".

V.Bayrmovun fikrincə, bu isə ondan xəbər verir ki, pandemiya genişlənəcəyi halda dünyada yeni böhran yaşana bilər və deməli, dünya iqtisadiyyatında son 2 ayda müşahidə olunan canlanma sadəcə böhran öncəsi nisbi sakitlik də ola bilər".