Media-icmal 13.02.2017

Dövlət başçısı İlham Əliyevin fəaliyyətinin dəyərləndirilməsi, ölkədə hüquqsuzluğun baş alıb getməsi, məhkəmə sisteminin durumu, daşınmaz əmlak bazarındakı vəziyyət bugünki medianın aparıcı mövzusudur...  

Etimadı artan Prezident

“Azərbaycan” qəzetində ”Xalqın Prezident İlham Əliyevə etimadı daha da artıb” (http://www.azerbaijan-news.az/index.php?mod=3&id=115738) sərlövhəli məqalədə dövlət başçısının çoxşaxəli fəaliyyəti dəyərləndirilir.

Müəllif deyir ki, ictimai öhdəliklərə, xalq qarşısında verdiyi vədlərə sadiqlik, sosial rifah halının yaxşılaşdırılması, ölkənin iqtisadi cəhətdən gücləndirilməsi Prezdeint İlham Əliyev idarəçiliyində diqqət çəkən ən mühüm məqamdır: “Başqa sözlə, həyata keçirilən çoxşaxəli tədbirlər sistemi həm kəmiyyət, həm də keyfiyyət göstəricilərinə görə miqyaslı, konkret və ünvanlı olması ilə diqqət çəkib. Məhz bu cür liderlər zamanın çağırışlarına cavab verən realist siyasət yürütməklə, uğurlu gələcək naminə xalqın, dövlətin güc və imkanlarını toparlayır, vahid milli ideyanın gerçəkləşdirilməsi naminə səfərbər edirlər”.

Məqalədə vurğulanır ki, dövlət başçısı Azərbaycanı inkişaf etmiş dövlətlər səviyyəsinə çatdırmaq yönündə ardıcıl tədbirlər həyata keçirir və dünya ölkələrini iflic edən qlobal maliyyə böhranı şəraitində həyata keçirilən islahatlar bu məqsədin reallaşdırılmasına hesablanıb. 

Müəllif deyir ki, Prezident Azərbaycanı enerji resurslarından asılı olmayan müasir və qüdrətli dövlətə çevirmək məqsədini deklarativ bəyanatlarla ifadə etmir, konkret icra mexanizmlərinin müəyyən edilməsi yönündə konkret addımlar atır.

Müəllif bu mənada dövlət başçısının 2016-cı il dekabrın 6-da imzaladığı “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” fərmanını nümunə göstərir.

Müəllif  deyir ki, konsepsiya 2025-ci ilədək Azərbaycanda neftdən asılı olmayan dayanıqlı inkişaf modelinin formalaşdırılmasını əsas hədəflərdən biri kimi önə çəkir.

Yazıda vurğulanır ki, yol xəritəsində aztəminatlı ailələrin sosial müdafiəsindən başlamış, ölkədə sahibkarlığın inkişafına, qeyri-neft sahəsinin inkişafı ilə ölkənin gəlirlərinin arıtılmasına kimi bütün istiqamətlər üzrə faəliyyətlər əksini tapır.

Müəllif bu sırada vətəndaşların dədə-baba torpaqlarına qayıda bilmələri üçün Cəbrayl rayonunun Cocuq Mərcanlı kəndinin bərpası üçün bü günlərdə 4,3 milyon manat vəsait ayrılmasını xüsusi qeyd edir.

Bu ölkədə nə qədər torba tikən var...

 “Azadlıqinfo” saytı “Ölkədə neçə nəfər “torba tikən” var?” sərlövhəli məqalədə (https://www.azadliq.info/177111.html) ölkədə hüquqsuzluğun baş alıb getməsini müzakirəyə çıxarıb.

Müəllif Azərbaycanda qeyri-adiliklərin çoxdan adi hala dönməsinə baxmayaraq, mövcud sistemin yetirmələrinin insanda təəccüb yarada bildiklərini xüsusi vurğulayır. Müəllif deyir ki, hüquqsuzluğun, zalımlığın, qeyri-insaniliyin sərhəd tanımaması insanı dəhşətə gətirir və xüsusən də “MTN işi” məhkəməsində üzə çıxan faktları, təqsirləndirilənlərin etirafını eşidəndə “yazıq xalq, yazıq ölkə” demək istəyirsən.

Məqalə müəllifi həbsdə olan MTN generalı Akif Çovdarovun məhkəmədə mühüm bir etirafını xatırladır: “Məndən çox bu ölkədə adam həbs edən olmayıb, 3-4 min adam həbs etdirmişəm. Heç birimiz müqəddəs deyilik, mən də vaxtilə “torba tikmişəm”, amma bu işlərdə ən azı 80% cinayət tərkibi olub, 20%-ni də özümüz düzüb qoşmuşuq ki, adamı salsınlar içəri”.

Müəllif hesab edir ki, əgər A.Çovdarov bu qədərini etiraf edirsə, əminliklə demək olar ki, ölkədə 10 minlərlə insan şərlənib, şantaj olunub, işgəncə görüb və həbsə salınıb.

Yazıya görə, bir general 3-4 min adamın həbsinə göstəriş verə bilirsə, başqalarının nələr etdiyini təsəvvür etmək çətin deyil: “Deməli, bu ölkədə Akif Çovdarovlar çoxdur və onlar rahat həyatlarını yaşayırlar. Məsələ burasındadır ki, minlərlə insanın “torbasının tikilməsi”ndə 10-larla səlahiyətli adamlar iştirak edib”.

Müəllif hesab edir ki, bu adamların günahsızlığından 10-larla hakim, müstəntiq, prokuror xəbərdar olub.

Müəllifə görə, bu qədər cinayətlər, bu qədər insan həyatının məhv edilməsi xeyli səlahiyyət sahibinin gözü qarşısında baş verib və əminliklə demək olar ki, dövlət mafiya qaydalarıyla idarə olunub.

Femida niyə bizə üz tutmur?

“Novoe Vremya” qəzetində isə “Femida Azərbaycan vətəndaşlarına üzünü nə zaman tutacaq” (http://www.novoye-vremya.com/w81745/.../#.WKAhfTuLTIU) sərlövhəli məqalə oxumaq olar. Müəllif ölkədə ədalət-mühakimə sisteminin yarasızlığını müzakirə edir.

Müəllif hazırda davam edən böhranla bağlı təkcə iqtsadi sahədə yox, ictimai-siyasi sahədə də islahatlara ciddi ehtiyac olduğunu vurğulayır: “Ölkədə iqtisadi və siyasi islahatların uğuru müstəqil ədalət mühakiməsi qurulması məqsədilə  məhkəmə-hüquq sistemindəki köklü dəyişikliklərdən keçir”.

Müəllif hesab edir ki,  Azərbaycan ədalət mühakiməsindəki mövcud durum

vətəndaşların hüquq və azadlıqlarının etibarlı müdafiəsi və real ədalət mühakiməsi tələblərini ödəməyə qadir deyil: “Azərbaycan məhkəmə sistemi qanunçuluq və ədalət ideallarını təcəssüm etdirmir, ayrı-seçkilik, qanunun alilyinin inkar olunması və yuxarıdan deyilən siyasi sifarişin yerinə yetirilməsi isə artıq normaya dönüb”.

Məqalədə bu günlərdə Məhkəmə-Hüquq Şurasının korrupsiya və rüşvət hallarına görə bəzi hakimlərin cəzalandırması vurğulanır. Müəllif korrupsiyanı təkcə ədalət mühakiməsi sistemi üçün yox, bütün cəmiyyət üçün  xərçəng “şiş”i sayır. 

Yazı müəllifi vurğulayır ki, bu mənada hakim korpusunu rüşvətxor və korrupsionerlərdən təmizləmək Məhkəmə-Hüquq Şurası və Ədliyyə Nazirliyi üçün şərəf məsələsidir: “Eyni zamanda bu orqanlar vətəndaşlara münasibətdə qanunsuzluqlara qarşı mübarizəni də gücləndirməlidirlər. Mülki və cinayət işlərindən siysi əsaslı işlərə qədər bütün proseslərdə ədalətin təntənəsi prioritet olmalıdır”.   

Müəllif xatırladır ki, Məhkəmə-Hüquq Şurası məhkəmə korpusu tərəfindən qanunçuluğun qorunmasına nəzarət orqanı kimi qanun pozucularına münasibətdə ayrı-seçkiliyə yol verməməli, korrupsiyaya şərait yaradan hakimlər kimi məhkəmə proseslərində qanunları inkar edən hakimləri də cəzalandırmalıdır.

Müəllif hesab edir ki, bu məsələdə Ədliyyə Nazirliyinin ardıcıllığı ölkə daxilində məhkəmələrin hörmətinin artmasına səbəb ola bilər, belə ki, yerli ədalət mühakiməsinə etimad günbəgün azalır: “Təsadüfi deyil ki, getdikcə daha çox vətəndaş ədaləti Avropa İnsan Haqları Məhkəməsində axtarır. Əgər ədalət Femidası vətəndaşlara münasibətdə lal və kar olmasaydı, bu qədər iddia Strasburqa göndərilməzdi”.

Riskli və bahalı bazar 

“Bizimyol.info” saytında  “Daşınmaz əmlak bazarında canlanma var” sərlövhəli məqalədə  (http://www.bizimyol.info/news/92011.html) müəllif daşınmaz əmlak bazarındakı durumu ekspertlərlə dəyərləndirir.

Müəllif  deyir ki, neftin qiymətinin aşağı düşməsi və manatın devalvasiyası ilə yadda qalan 2015-ci ilin fevralından Bakının əmlak bazarında qiymətlər sürətlə aşağı düşüb. 

Yazıda deyilir ki, son vaxtlar hərrac bazarında dollar- manat nisbətində manatın xeyrinə olan dəyişikliklər müəyyən gözləntilər yaradıb: “Rieltorlara görə, ölkədə daşınmaz əmlak bazarı ilə neftin qiyməti arasında heç bir asılılıq yoxdur, belə ki, neft bahalaşarkən qiymətlər artıb, ucuzlaşanda isə yerində donub qalıb”. 

Məqalədə deyilir ki, rieltor Həsən Quliyev daşınmaz əmlak bazarındakı bahalaşmanı belə izah edir: “Manatın devalvasiyası, Bakıda yaşayış yerlərinin kütləvi söküntüsü, amma tikinti prosesinin zəifliyi qiymət artımına səbəb olub. Son vaxtlar qiyməti aşağı olan, kiçik ölçülü mənzillər sürətlə alınıb və bazarda daha çox böyük ölçülü, bahalı mənzillər satılır, yaxın gələcəkdə isə daşınmaz əmlakın qiyməti enməyəcək”.  

Müəllif "MBA" Konsaltinq və Qiymətləndirmə şirkətinin prezidenti, ekspert Nüsrət İbrahimova istinadən bildirir ki, torpaq və qeyri-yaşayış sahələri kimi daşınmaz əmlak bazarında aktivlik yoxdur, sadəcə mənzil bazarına gələnlər var, alıcılıq isə yüksəlmir.

Ekspert Ramil Osmanlı isə son bir ildə daşınmaz əmlak bazarında qiymətlərin 10% bahalaşdığını deyir: “Maliyyə bazarında baş verən proseslər daşınmaz əmlak bazarında qiymətlərə mənfi təsir göstərir, nə qədər ki, manat dollar münasibətlərində qeyri-müəyyənlik var, manatın bazar qiymətinin tapılması yönündə iqtisadi yox, inzibati resurslar işləyir, hesab edirəm ki, daşınmaz əmlak bazarında ciddi dəyişiklik olmayacaq. Risklər həddən artıq çoxdur və bu halda bazara pul axınının artacağını demək çətindir”.