Media-icmal 13.02.21

Ölkənin internet resursları Azərbaycanın aktual məsələlərini işıqlandırır. Rusiya və Minsk Qrupunun Qarabağ probleminin həllində səmimi olmamaları,

Ermənistanla sərhədlərin demarkasiyasının görünən nəticələri, sosial-iqtisadi istiqamət üzrə qarşıdakı milli prioritetlər, nazirin bir sıra dövlət qurumlarını tənqidə məruz qoyması və s. medianın aparıcı mövzuları sırasındadır...

"Müsavat.com" saytında  "Rusiya Minsk qrupunu "xortladır": "status" vaxtı gələndə diriltmək üçün…" sərlövhəli  məqalədə müəllif Dağlıq Qarabağın status məsələsinin "dirildilməsi" ehtimalını deputat Aydın Mirzəzadə və politoloq Zaur Məmmədovla müzakirəyə çıxarır.

Müəllifə görə, mövzunun aktuallığı ondadır ki, Rusiya Dağlıq Qarabağın status məsələsinə fərqli yanaşaraq onu "gələcəyin məsələsi" qrafasına salır, prosesin bundan sonrakı mrəhələsində ATƏT-in Minsk Qrupunun fəaliyyətini davam etdirə bilməsini israrla xüsusi olaraq vurğulayır.                   

Rəsmi Bakının isə mövqeyi budur ki, Dağlıq Qarabağa status verilməsi gündəlikdən çıxıb, problemin həllində ATƏT-in Minsk Qrupu üzvləri olaraq Fransa və ABŞ-ın hər hansı şəkildə rolu olmayıb və Azərbaycanın maraqlarının zəmanətçisi kimi Türkiyə çıxış edə bilər.

Ermənistan da danışıqların həmsədrlər çərçivəsində qalmasında maraqlıdır, çünki həmsədr ölkələr içərisində ən azı iki dəstəkçi dövlət var - Fransa və Rusiya, Baydenin Ağ Evə gəlişindən sonra isə ermənilər bu dəstəyi də almağa ümidləniblər:

Deputat Aydın Mirzəzadə deyir ki, Qarabağ Minsk Qrupunun diplomatiyası ilə yox, Azərbaycan Ordusunun gücü ilə azad edilib, odur ki, Minsk Qrupu problemin həll edildiyini qəbul etməlidir, Azərbaycanın ərazi bütövlüyünü tanıması üçün Ermənistama çağırış etməlidir", deyə deputat bildirir. Deputat əlavə edir ki, böyük əraziləri olmayan Azərbaycanı federallaşdırmağa, ərazilərinə xüsusi status verilməsinə ehtiyac yoxdur, yeni reallıq qəbul edilməlidir.

Bakı Politoloqlar Klubunun sədri Zaur Məmmədov bildirib ki, Qarabağın  "status" məsələsi də artıq həllini tapıb, Xankəndi də, Şuşa da Azərbaycan ərazisidir, hər yerdə bayrağımız dalğalanacaq. Dağlıq Qarabağda hansısa status və ya muxtariyyətdən söhbət gedə bilməz.

"Yenisabah.az" saytı "40 kənd və bir rayon Azərbaycan əsgərinin nəzarətinə keçdi – detallar" sərlövhəli məqalədə 44 günlük Vətən müharibəsinin nəticəsi olaraq 10 noyabr bəyanatından sonra sərhədlərin müəyyən edilməsi (demarkasiya) nəticəsində yeni ərazilərin Azərbaycana təhvil verildiyini bildirir.

Politoloq Əziz Əlibəyli deyir ki, 10 noyabr sazişi əsasında indiyə qədər Azərbaycana 30-dan artıq kənd qaytarılıb: "Bunlar Cəbrayılın, Qubadlının və Laçının müəyyən kəndləridir ki, döyüş nəticəsində onlar qaytarılmamışdı.

Qazağın 7 kəndi və Kərkinin məsələsi ona görə həll olunmalıdır ki, dəhliz problemi öz həllini tapsın. Dəhliz problemi həllini tapdıqdan sonra, Qazağın 7 kəndi və digər məsələlər həll olunacaq", deyə politoloq bildirir.

Politooq vurğulayır ki, demarkasiya nəticəsində Ermənistanın 40 kəndi və Qeqarkunik rayonu Azərbaycan əsgərinin nəzarəti altına düşüb.

Ə.Əlibəyli deyir ki, Qeqarkunik rayonu Göyçə gölünün sahillərini əhatə edir və Göyçənin qədim Kəvər elləri adlı bölgələrinə aiddir.

Politoloq vurğulayır ki, o bölgənin Azərbaycanla sərhəd olan hissələrində – Tovuz, Gədəbəy, Daşkəsən, Kəlbəcər, Qubadlı və s. digər rayonlarda Azərbaycanın güc strukturları hərbi xidməti həyata keçirirlər.

"Mətbuat .az" saytında isə "Azərbaycan 2030: Gələcəyə baxış - 5 milli prioritet əsasında yeni cəmiyyət" sərlövhəli məqalədə qarşıdakı 9 ilin milli prioritetlərinin mahiyyəti açıqlanır.

Tarix üzrə fəlsəfə doktoru, dosent Sübhan Talıblı deyir ki, Azərbaycan dövləti əmək, məşğulluq, sosial müdafiə sahələrində idarəçilik, həmçinin əhaliyə xidmətin təkmilləşdirilməsi, müasir, innovativ iş prinsiplərinin tətbiqini qarşıdakı 9 ildə sosial islahatlar istiqamətində milli prioritetlər kimi müəyyən edib.

S.Talıblı deyir ki, yürüdülən sosial siyasətin mərkəzində vətəndaş rifahının təminatı prinsipi dayanır, həyata keçirilən infrastruktur layihələri, artan əməkhaqları və müavinətlər, əhalinin rifah halının yüksəldilməsi və s. istiqamətdə atılan addımlar bu siyasətin bariz nümunəsidir.

Alim əlavə edir ki, sosial təminatın güclənməsi, yoxsulluğun minimuma endirilməsi, sosial ödənişlərin əhatə dairəsinin genişləndirilməsi, regionların inkişaf etdirilməsi və s. qarşıya qoyulan əsas hədəflərdəndir.

Alim deyir ki, bütün bu imkanlar 2030-cu ilə kimi Azərbaycanda dinamik, inklüziv və sosial ədalətə əsaslanan cəmiyyətin formalaşmasına gətirib çıxaracaqdır.

"Modern.az" saytı isə "Nazir dövlət şirkətlərinin işini tənqid etdi" sərlövhəli məqalədə iqtisadiyyat naziri Mikayıl Cabbarovun bəzi dövlət şirkətlərinin fəaliyyət üslubunu tənqidə məruz qoymasını gündəmin diqqətinə çatdırır.

Müəllif deyir ki, iqtisadiyyat naziri Mikayıl Cabbarov "Postpandemiya dövründə vergi sistemi" konfransında çıxışında bu mövzuya toxunub: "Bir sıra dövlət şirkətlərinin fəaliyyəti günün tələblərinə uyğun deyil. Bəzi hallarda isə idarəetmənin effektivliyinin aşağı olması müşahidə edilir. Bu şirkətlərin xərclərinin, tender prosedurlarının şəffaflığı tam təmin edilməyib", M.Cabbarov belə deyib.

Nazir konkret ad çəkmədən bildirib ki, bəzi şirkətlər büdcə gəlirlərinin formalaşmasında mühüm rol oynamalı olduqları halda, zərərlə işləyirlər.

M.Cabbarov nəzərə çatdırıb ki, bu sahədə artıq ciddi islahatlar həyata keçirilir və bunun nəticəsi olaraq dövlət şirkətlərinin effektivliyinin artırılmasına və onların ciddi bazar dəyərinə çatdırılmasına nail olunmalıdır.

Nazir vurğulayıb ki, dövlət şirkətlərinin borclanmalarına nəzarətin gücləndirilməsi, dövlət büdcəsinə divident ödənişlərinin artırılması hədəf kimi qarşımızda durur və 2020-ci ildə yaradılmış Azərbaycan İnvestisiya Holdinqi hazırda bu istiqamətdə çalışır.