Media-icmal 13.03.21

“Yenisabah.az” saytı “Ali təhsilli insanların sayına görə Azərbaycan dünyada ən aşağı yerlərdədir” sərlövhəli məqalədə ölkədə təhsilin səviyyəsi təhsil eksperti Kamran Əsədovla dəyərləndirilir.

Müəllif deyir ki, Nazirlər Kabinetinin 2020-ci ilə dair parlamentə  hesabatında 2020 - 2021-ci il üzrə ali təhsil müəssisələrinin bakalavriat səviyyəsində qəbul planının 2,3 faiz artırıldığı qeyd olunur.

Dövlət sifaişi üzrə qəbul planı isə ötən il ilə müqayisədə 7,1 faiz artırılaraq 21,9 min yer təşkil edib.

Ekspert deyir ki, 2010-cu ildə Azərbaycan ali təhsil müəssisələrinə cəmi 29 min plan yeri ayrılmışdı. Həmin vaxt 110 min nəfər ali məktəbə qəbul olmaq üçün sənəd verdi.

Bununla belə, K.Əsədov əlavə edir ki, Azərbaycan bu gün ali təhsilli insanların sayına görə dünyada ən aşağı yerlərdədir: “Vətəndaşlarımızın cəmi 17 faizi ali təhsillidir. Azərbaycanda 51 ali məktəbdə 182 min tələbə təhsil alır. Ölkə vətəndaşlarının sayının 10 milyon nəfəri ötdüyünü nəzərə alsaq, 182 min aktiv tələbə əhalinin çox az faizini təşkil edir. Odur ki, ilk növbədə ali təhsilli insanların sayını artırmalıyıq”.

K.Əsədov vurğulayır ki, ali məktəb məzunlarının ancaq 42%-i öz ixtisası üzrə işləyə bilir, 58%-i ya işləmir, ya da ixtisasdan kənar sahələrdə çalışırlar.

“Müsavat.com” saytı isə “Sənədsiz evlərin rəsmiləşdirilməsi evlərin qiymətlərini bahalaşdıracaq - açıqlama” sərlövhəli məqalədə əmlak məsələləri üzrə ekspert Ramil Osmanovla qeydiyyatsız evlərin sənədləşdirilməsinin əmlak bazarını bahalaşdıra bilməsi mümkünlüyündən danışır.

R.Osmanov iddia edir ki, bir neçə il öncə inventarlaşdırılmasına başlanılan qeydiyyatsız evlərin rəsmiləşdirilməsi fərdi yaşayış evlərinin qiymətinin bahalaşmasına səbəb olacaq.

Onun sözlərinə görə, paytaxt və regionlarda təqribən 250 mindən çox fərdi yaşayış evi artıq inventarlaşdırılıb: “İnventarlaşma prosesi davam edir və nə vaxt yekunlaşacağını müvafiq icra hakimiyyəti orqanı deyə bilər. Amma hesab edirəm ki, bu prosesi ilin sonuna qədər yekunlaşdırmaq mümkündür”.

R.Osmanov qeyd edib ki, bu gün yarım milyondan artıq tikili faktiki olaraq bütün sərəncam hüquqlarından, digər məsələlərdən kənarda qalır, yəni onlar üzərində aparılan əməliyyatlar, o cümlədən alqı-satqı əməliyyatları faktiki olaraq qeydiyyata alınmır.

“Redaktor.az” saytı “Sərt karantin: Rayonlara gediş-gəliş bağlanır –qapanmalar qaçılmazdır...” sərlövhəli məqalədə karantin rejiminin sərtləşdirilə bilməsi ehtimalını deputat Azər Badamovla dəyərləndirir.

Deputata görə, Azərbaycanda son günlərdə koronavirusa yoluxanların sayının sürətlə artması ilə əlaqədar karantin rejimi yenidən sərtləşdirilə bilər.

Onun fikrincə, son günlərin yoluxma dinamikasında artım müşahidə olunur və bu səbəbdən Operativ Qərərgahın yeni addımlar atması zərurətə dönür və dövlət insanların sağlamlığı üçün qapanmalara getməyə üz tutacaq.

Deputat yoluxmanın artmasna görə vətəndaşları məsul tutur, bunu da “hər şey öz əlimizdədir, əgər biz pandemiya tələblərinə məsuliyyətlə yanaşsaq yoluxma artmaz” şəklində ifadə edir.

A.Badamov deyir ki, hər yerdə tibbi maskadan istifadə olunmalı, sosial məsafə qorunmalıdır: “Özümüzü qorumasaq yoluxma yenidən çoxalacaq və qapanmalar aktuallaşacaq. Mənim düşüncəm ondan ibarətdir ki, insanlar qaydalara riayət etsinlər. Qaydaların sərtləşdirilməsi həm insanlar, həm də dövlətimiz üçün əlavə yükdür”.