Media-icmal 13.08.20

Pandemiya şəraitində sosial-iqtisadi problemlərin həlli, yeni tədris ilinin təşkili ilə bağlı müzakirələr, büdcə vəsaitlərinin səmərəsiz xərclənməsi iddiaları və s. məsələlər medianın aparıcı mövzuları sırasındadır... 

"Azərbaycan" qəzeti  "Azərbaycan pandemiya ilə mübarizədə də öz gücünə arxalanır" sərlövhəli məqalədə pandemiya şəraitində vətəndaşların sosial-iqtisadi məsələlərinin həll olunmasından bəhs edir.

Müəllif deyir ki, ölkədə 5 milyona yaxın insan geniş sosial paketlə əhatə olunmuşdur, həm dövlət, həm də özəl sektorda 1 milyon 660 min insanın məşğulluğu davam etdirilməkdədir. Onların iş yerləri və əməkhaqları qorundu.

Yazı müəllifi deyir ki, avqust ayında da işsizlərə 190 manat birdəfəlik müavinət ödənişinin davam etməsi qərara alınıb, bu istiqamətlər üzrə indiyədək 280 milyon manat vəsait xərclənib.

Müəllifə görə, haqqı ödənilən ictimai işlər proqramı üzrə iş yerlərinin sayı 90 minə qədər artırılıb və onlardan 38 mini davamlı iş yerləridir.

Pensiya, müavinət, təqaüdlər üzrə iki milyon şəxsi əhatə edən sosial ödənişlər ötən ilin müvafiq dövrü ilə müqayisədə 27 faiz artıb, ünvanlı sosial yardım proqramına əlavə 14 min ailə cəlb olunub.

7 mindən çox köçkün, 1500 şəhid ailəsi, Qarabağ müharibəsi əlili mənzillərlə təmin ediləcək.

Müəllif deyir ki, bütün bu işlər insanların rifahı üçün görülür, dövlətlə xalqın birgə səyinin nəticəsi kimi ortaya çıxır. "Bu, bizim niyyətimizi, siyasətimizi göstərir. Onu göstərir ki, siyasətimizin mərkəzində Azərbaycan vətəndaşı dayanır", deyə müəllif dövlət başçısı İlham Əliyevdən sitat gətirir.

Müəllif əlavə edir ki, Azərbaycan öz gücünə arxalanır, bu imkanlar xalqın istedadı və düşünülmüş siyasət nəticəsində qazanılır.

"Modern.az" "Məsləhətləşmələr aparılır: Nazirlikdən yeni tədris ili açıqlaması" sərlövhəli məqalədə orta məktəblərdə yeni tədris ilinin necə təşkil olunacağı barədə danışılır. 

Müəllifin sözlərinə görə, hələlik Təhsil Nazirliyi orta təhsil müəssisələrinə yeni tədris ilinin necə təşkil ediləcəyi barədə hər hansı təlimat göndərməyib.

Yazı müəllifi vurğulayır ki, COVİD pandemiyası şəraitində tədrisin təhlükəsiz təşkili ilə bağlı müxtəlif təcrübələr öyrənilir: "Yaxın və uzaq xarici ölkələrin pandemiya dövründə tədris məsələləri öyrənilir və hər bir məsələ üzərində işlər aparılır". 

Yeni tədris ilinin təşkili və açılışı ilə bağlı təhsil sahəsi ilə məşğul olan insanların, bütövlükdə ictimaiyyət nümayəndələrinin fikirləri sistemləşdirilir, təhlil edilir, birgə müzakirələr aparılır.

"Təbii ki, istər ali, istərsə də orta təhsil müəssisələrində tədrisin təşkili ilə bağlı müxtəlif şərhlər, fikirlər səsləndirilir. Biz də həmin şərhləri müzakirə edirik. Hesab edirik ki qərarların verilməsində bunun böyük rolu olacaq", deyə Təhsil Nazirliyindən də məsələyə reaksiya bildiriblər.

"Yeniavaz.com"  "Azərbaycanda "od qiymətinə" su alan dövlət müəssisələri - Büdcə vəsaiti hara səpələnir?" sərlövhəli məqalədə büdcə vəsaitlərinin səmərəsiz xərclənməsindən yazır.

Müəllif deyir ki, Səhiyyə Nazirliyinin Tibbi Reabilitasiya Xəstəxanasının "Texniki və içməli suyun daşınması" tenderinin qalibi "ANTEK-20" MMC adlı şirkət olub. Tenderin nəticəsinə görə, şirkət 17 min 433 ton texniki su daşıyacaq.

Buna görə xəstəxana şirkətə 78 min 448 manat 50 qəpik ödəyəcək. Beləliklə, 1 ton texniki suyun daşınması 4 manat 50 qəpiyə başa gələcək.          

Xəstəxana həm də 3 min 910 ton içməli su alacaq, buna görə, 19 min 550 manat ödəniləcək, 1 ton içməli su üçün ödəniləcək məbləğ 5 manat təşkil edir. Bu qiymətlər "Azərsu" ASC-nin əhaliyə satdığı içməli suyun qiymətilə (0,35 manat) müqayisədə 13-14 dəfə çoxdur,         Müəllif əlavə edir ki, "ANTEK-20" MMC 2019-cu ilin dekabrında dövlət qeydiyyatına alınıb, xəstəxana isə tenderi 2020-ci ilin fevral ayında keçirib.

Müəllifin sözlərinə görə, iki aylıq şirkətin analoji təcrübəsinin olması barədə isə açıq internet resurslarında heç bir məlumat yoxdur.

Müəllif cəmi 2 ay əvvəl yaranan bir şirkətin peşəkar və təcrübəli olmasını sual altına alır.