Media-icmal 14.09.20

Ölkədə COVİD-19 pandemiyasına qarşı aparılan mübarizə, BNA-nın fəaliyyətinə baxış, neft kvotası ilə bağlı müqavilənin pozulması qayğıları, dünyanın qida böhranı ilə üz-üzə qalması və s. məsələlər medianın aparıcı mövzuları sırasındadır.

“Azərbaycan” qəzeti  “Azərbaycanda normal həyata dönüş sürətlənib” sərlövhəli məqalədə COVİD-19 pandemiyası ilə bağlı ölkədə karantin qaydalarının yumşalmaqda davam etməsini dəyərləndirir.

Müəllif deyir ki, koronavirus  doqquz aydır dünyanın əsas problemi olaraq qalmaqdadır, dünya üzrə yoluxanların sayı 28 milyona, həyatını itirənlərin sayı isə 900 minə çatıb, peyvənd tapılmayana qədər koronavirus hər kəs üçün təhlükəli mərəz olaraq qalacaq.

Müəllif əlavə edir ki, Azərbaycan bu qlobal böhranla hərtərəfli mübarizə aparır, Bakı şəhəri və regionlarda müasir texniki təchizatı olan modul tipli xəstəxanalar quraşdırılır, yeni tibb müəssisələri, laboratoriyalar açılır, ölkənin səhiyyə sistemi əlavə 4100 çarpayılıq ehtiyat yeri ilə təmin edilib.

Avqustun 5-dən sərt karantin rejiminin mövcud olduğu şəhər və rayonlarda, eləcə də ölkə üzrə bəzi məhdudiyyətlər aradan qaldırılıb və yumşalmalar təmin edilib.

Müəllifin sözlərinə görə, Azərbaycanda yeni tədris ili əyani və on-layn olmaqla, iki formatda davam edəcək.

Müəllif yada salır ki, payız-qış mövsümündə xəstəliklərin baş qaldırması koronavirusun yenidən alovlanmasına səbəb ola bilər, odur ki, insanlar COVID-19-la birgə mühitdə yaşamağı öyrənməli, gigiyenik qaydalara riayət edilməsi vərdiş halına gəlməlidir.

“Redaktor.az” saytı “BNA-nın yarıtmaz işi: Avtobusda sıxlıq, işləməyən terminallar, tıxac... milyonlar hanı?” sərlövhəli məqalədə pandemiya fonunda Bakı Nəqliyyat Agentliyinin fəaliyyətini dəyərəndirir.

Müəllifə görə, Nazirlər Kabineti yanında Operativ Qərargahın qərarına əsasən metronun bağlanması ilə Bakı Nəqliyyat Agentliyinin (BNA) fəaliyyətindəki çatışmazlıqlar özünü büruzə verdi.

TƏBİB və Operativ Qərargahın təyin etdiyi sosial məsafə avtobuslarda və terminal aparatlarının önündə nəinki qorunmur, əksinə, çox ciddi şəkildə pozulur.

Müəllifin fikrincə, ictimaiyyətin şikayətlərinə nəzər belə yetirməyən BNA haqqında günü-gündən narazılıqlar daha da artmaqdadır.

Nəqliyyat eksperti Eldəniz Cəfərov bildirib ki, BNA ictimaiyyətin şikayətlərini həll etməsə, bunun axırı heç də yaxşı olmayacaq: “Düzdür, BNA-nın fəaliyyətini bütünlüklə mənfi adlandırmaq da olmaz. Çünki nəqliyyat sahəsindəki bir sıra çatışmazlıqları həll etdilər. Lakin pandemiya bizim ictimai nəqliyyatda olan çatışmazlıqları kəskin formada üzə çıxardı.

“Məlum olduğu kimi, hər şey bizim düşündüyümüz kimi, heç də gözəl deyilmiş. Əsas problemlərdən biri də nəqliyyat çatışmazlığıdır. Marşurut avtobuslarının intervalında xeyli problem var”, E.Səfərov belə deyir.

Ekspert iddia edir ki, sərnişinlər vaxtı-vaxtında avtobusdan rahat istifadə edə bilmir. Sürücülər çox vaxt intervalı gözləmirlər.

E.Cəfərov hesab edir ki, öncə avtobusların çatışmazlığı, yolların işıqlandırılması, yol nişanlarının olmaması, terminal aparatlarının işləməməsi kimi problemlər həllini tapmalıdır. Ekspertə görə, BNA ictimiyyətin narazılıqlarına obyektiv şəkildə yanaşmalı və çatışmazlıqları həll etməlidir, əks halda bunun axırı yaxşı olmayacaq.

Eyni zamanda, mütəxəssislər avtobuslarda oturacaq sayı qədər insan olmasını, insanların açıq havada daha çox gəzməli olduqlarını deyirlər. 

“Bizimyol.info” “OPEK üzvü neft razılaşmasını pozur” sərlövhəli məqalədə İraqın OPEK və OPEK+ formatında bu ilin aprelində imzalanmış neft kvotasına dair sənədin müddəlarını pozduğunu bildirir.

Azərbaycan üçün məsələnin maraqlı tərəfi ölkənin neft kvotasının sabit saxlanılması üzrə müqavilədə iştirakçı tərəfdən biri olmasıdır.

Müəllifin sözlərinə görə, neftin qiymətinin aşağı düşməsində ən çox ittiham olunan ölkələrdən biri İraqdır və bu Asiya dövləti hasilatın azaldılması ilə heç cür barışa bilmir.

Müəllif beynəlxalq mənbələrə istinadən bəyan edir ki, İraq razılaşmanı pozmağa hazırlaşır, bu meyl artıq özünü göstərir.

Müəllif əlavə edir ki, İraqın Neft Nazirliyi bu məsələni müzakirəyə çıxarıb, amma hələ ki, OPEK-ə konkret mövqe təqdim olunmayıb.

Yazıda vurğulanır ki, İraq OPEK+ razılaşmasını pozanlar sırasında öndə gəlir, belə ki, maydan iyula qədər kvotanı 851 min barrel aşıb, Nigeriyada bu göstərici 315 min, Rusiyada isə 283 min barreldir.

Müəllifin sözlərinə görə, İraq Neft Nazirliyi rəsmi görüşlərdə səmimi mövqe ortaya qoymur.

Nazirlik hasilatı artırmaq istəyində olmadığını, kvotanı tam yerinə yetirdiyini açıqlayır.

İndiki OPEK+ razılaşmasına görə, 23 ölkə 2020-ci ilin sonuna qədər ümumilikdə hasilatı 7.7 milyon barel azaltmalıdır. Sonra aprelin sonuna qədər azalma 5.8 milyon barrelə enməlidir.

“Oxu.az” saytındakı “Dünya qida böhranı təhlükəsi ilə üz-üzə” sərlövəhli məqalədə dünyanın qida böhranı təhlküəsilə üz-üzə qaldığı fikri yer alır.

Müəllifin sözlərinə görə, koronavirus pandemiyası, yağış və quraqlıq, mal-heyvana yoluxan viruslar və dolların zəifləməsi fonunda tədarük zəncirlərinin pozulması dünyada ərzaq böhranı təhlükəsini artırır.

Müəllif beynəlxalq mənbələrə istinadən əlavə edir ki, ümumiyyətlə dünyada qıtlıq yoxdur, ancaq qida dəyəri artır. BMT-yə (Birləşmiş Millətlər Təşkilatı) görə, ərzaq qiymətləri artaraq, 2020-ci ilin avqust ayında fevral ayı ilə müqayisədə ən yüksək səviyyəyə çatıb.

Yazıda vurğulanır ki, Çin Statistika Bürosunun məlumatına görə, keçən ilin avqust ayı ilə müqayisədə ərzaq qiymətləri 11%-dən çox artıb.

Müəllifin fikrincə, koronavirus pandemiyası ilə bağlı tədarük zəncirlərinin pozulması bəzi ölkələrin qida təhlükəsizliyinə zərbə vurub.

Fermerlər və kiçik müəssisələr tez xarab olan malları sata bilmədikləri üçün zərər çəkiblər, bundan əlavə, koronavirus gübrə və toxum ehtiyatlarına zərbə vurub, eyni zamanda, vaxtında məhsul almağı təmin edən mövsümi işçi qüvvəsi axınını məhdudlaşdırıb.

Qida təhlükəsizliyinə digər bir təhlükə 2020-ci ildə dolların vəziyyəti olub.

Yemək istehsalı üçün xammalın dəyəri ümumiyyətlə dollarla müəyyən edilir, beləliklə də, o zəiflədikcə qiymətlər yüksəlir.