Media-icmal 15.03.21

“Yenisabah.az” saytında dərc olunan “Erməni separatçılar rəsmi Bakını tələsdirir: Antiterror əməliyyatlarının vaxtı önə çəkilə bilər” sərlövhəli məqalədə bu halların baş verə bilməsi səbəbləri ortaya qoyulur. 

Müəllifin sözlərinə görə, erməni tərəf 2020-ci il İkinci Qarabağ müharibəsindən öncə olduğu kimi, yenə də təxribatlara əl ataraq rəsmi Baknın səbrini sınağa çəkir, amma himayədarlarının bitərəf qala biləcəyindən ehtiyatlanaraq çox da dərinə getmir.  

Digər tərəfdən, Azərbaycan Ordusunun təlimlər keçirməsi də erməni tərəfi qorxudur, çünki İkinci Qarabağ müharibəsindən öncə də Azərbaycan Ordusu davamlı hərbi təlimlər keçirirdi və erməni tərəf bunu yaddan çıxara bilmir.

Müəllif vurğulayır ki, 44 gün çəkən İkinci Qarabağ savaşı, 30 illlik tarixi olan işğal faktına son qoydu.

Qarabağda hazırki duruma toxunan müəllif əlavə edir ki, indi isə rəsmi İrəvan 10 noyabr və 11 yanvar razılaşmasının icrasından yayınır, ya da prosesi ləngitməyə can atır.

Müəllif deyir ki, Ermənistan ordusunun qalıqlarının Qarabağdan çıxarılması 10 noyabr 2020-ci il üçtərəfli razılaşmasının müddəalarında da yer alır.

Məqalədə bildirilir ki, sülhməramlılar erməni separataçılarına qondarma dövlət qurmaq missiyası daşımırlar və 5 ildən sonra həmin qüvvələr Azərbaycanı tərk edəcəklər. 

Azərbaycanda yaşaya bilmək üçün ermənilər bu dövlətin pasportunu almalı və vətəndaşlığı qəbul etməlidirlər, əks halda bu torpaqlarda yaşaya bilməzlər. 

“Moderator.az” saytında yer alan “Ümid edək ki, dörd aydan sonra bu bəndlərin yerinə yetirilməsinin praktik həllinə başlanacaq” sərlövhəli məqalədə isə Qarabağın bəzi ərazilərinin real şəkildə Azərbaycanın nəzarətində olmamasının səbəbləri təhlükəsizlik məsələləri üzrə ekspert İlham İsmayılla müzakirə olunur.

Müəllif deyir ki, bu günlərdə RF prezidenti Vladimir Putinin Azərbaycan Prezidenti İlham Əliyevlə və Ermənistanın baş naziri Nikol Paşinyanla telefon danışığı olub və hər iki tərəflə Dağlıq Qarabağla bağlı bir sıra məsələlər müzakirə olunub.

İlham İsmayıl bu telefon danışığının Qarabağda Azərbaycanın xeyrinə hansısa dəyişikliklərə səbəb ola bilməsini və əksinə, ola bilməməsini söyləməyin tez olduğunu bildirir. Ekspert diqqəti daha çox “Dağlıq Qarabağla bağlı razılaşmanın reallaşdırılması üçün praktik aspektlər nəzərdən keçirilib” cümləsi üzərinə cəmləyir.

İlham İsmayila görə, praktik aspektlərin nəzərdən keçirilməsi müəyyən proseslərin başlanmasına işarə ola bilər, bu, erməni yaraqlılarının son nəfərinə kimi Azərbaycandan çıxarılması, Dağlıq Qarabağın azərbaycanlı qaçqınlarının geri qaytarılması, sülhməramlı qüvvələrin nəzarətində olan yolların hər iki tərəf üçün işlək və təhlükəsiz hala gətirilməsi ola bilər.  

Ekspertə görə, bölgədə sülh yaratmaq problemin “dondurulması”ndan yox, üçtərəfli bəyanatın bəndlərinin reallaşdırılmasından keçir, həm də bu reallaşdırmalar cəmiyyətdən gizlin olmamalıdır.

Onun fikrincə, nəzərdə tutulan problemlərin yaxın vaxtlarda həyata keçirilməsinin şahidi olmamaq da mümkündür və ola bilər ki, qarşıdakı 4 ayda da indiki mənzərə dəyişməsin. 

“Bizimyolinfo.az” saytında dərc olunan “Pensiyaların kütləvi ləğvi narazılıq yaradır: Bu, doğru yol deyil” sərlövhəli məqalədə qanunsuz sayılan pensiyaların dayandırılmasından və bunun narazılığa səbəb olmasından bəhs edilir.

Müəllif deyir ki, Dövlət Sosial Müdafiə Fondu qanunsuz saydığı pensiyaları ləğv edir: “Dövlət Sosial Müdafiə Fondu tərəfindən əsassız olaraq kimsənin pensiyası dayandırılmır. 2018-ci ildən etibarən bu sahədə ciddi iş aparılır. Şəxsin əsassız olaraq pensiya hüququndan istifadə etdiyi aşkarlananda, pensiyanın təyin olunduğu dövrlə bağlı nöqsan aşkarlananda və ya indiki qanunvericiliyə uyğun olmadıqda məbləğlərə düzəliş edilir”. Bunu isə Dövlət Sosial Müdafiə Fondundan bildiriblər.

Qurumdan verilən açıqlamaya görə, əgər şəxsin pensiyanı əsassız şəkildə alması müəyyən olunursa, bu halda pensiya verilməsi dayandırılır. Qurumdan həm də deyilib ki, bu halda vətəndaş sərbəst şəkildə Fondun yerli bölmələrinə, yaxud məhkəməyə müraciət edə bilər.

Belə halların əhali arasında narazılığa səbəb olduğunu deyən müəllif bu pensiyaları kimlərin təyin etdiyi sualına cavab verilməsini də gündəmə gətirir və buna görə təkcə təqaüdçülərin günahlandırılmasını doğru saymır.

Müəllifə görə, daha bir problem budur ki, qanuni pensiyalar da ləğv olunur, bu barədə müraciətlər isə araşdırılmır, sanki qəsdən pensiyaların təyinatı keçilməz labirintə çevrilir.

İqtisadçı-ekspert Natiq Cəfərli isə hesab edir ki, bunu dövlət qurumu edibsə, məsuliyyəti də o daşıyır: “Necə ola bilər ki, eyni qurum 2-3 il bundan öncə bir qərar qəbul edir və indiki dövrdə məlum olur ki, bu təqaüdlər düzgün təyin edilməyib. Əgər belədirsə, həmin təqaüdləri təyin edənlər hansı məsuliyyəti daşıyır?”, deyə ekspert bildirir.

Cəfərli deyir ki, belə hallar hətta varsa da, təqaüdlər dayandırılmamalı, təqaüd verilməsi mövcud qanunvericiliyə uyğunlaşdırılmalıdır, əks halda bu, minlərlə insanın pensiyadan məhrum olunması deməkdir: “Hər bir halda qayda-qanun pozuntuları varsa, onun səbəbkarı dövlət orqanlarıdır. Yəni dövlət orqanı özü belə qərar verib və vətəndaşlar təqaüd alıblar”, deyə ekspert bildirir.