Media-icmal 15.05.21

Karantin rejimində yumşalmaların və açıq havada maska taxılmasının ləğvinin mümkünlüyü, Azərbaycan-Ermənistan sərhəddində vəziyyət və digər məsələlər medianın aparıcı mövzuları sırasındadır.

“Yenisabah.az”  saytı “Karantin rejimi ilə bağlı vacib xəbər: 7-10 gün ərzində... sərlövhəli məqalədə karantin rejimində yumşalmaların mümkünlüyünü parlamentin Sosial siyasət komitəsinin sədri Musa Quliyevlə dəyərləndirir.

Müəllifə görə, son günlər koronavirus infeksiyasına yoluxmalarda azalma müşahidə edilir, bu isə karantin rejimində növbəti yumşalmaların ola bilmsini gündəmə gətirib, xüsusilə də metronun açılması barədə daha çox danışılır.

Komitə sədri isə deyir ki, karantin rejimində yumşalma yoluxmanın azalması, peyvəndlənmənin daha da genişlənməsi statistikasından asılıdır.

Onun deməsinə görə, ölkə üzrə peyvəndlənmə 45-50%  olmalıdır ki, yumşalma mümkün olsun.

Deputata görə, qarşıdakı 7-10 gün ərzində yoluxma indiki səviyyədə qalsa yumşalma baş verə bilər.

“Sfera.az”  saytı isə “Açıq havada maska məcburiyyəti ləğv olunur? - Prezidentin Şuşadan Operativ Qərargaha verdiyi mesaj” sərlövhəli məqalədə açıq havada maska taxılmasının ləğv oluna bilməsindən danışılır.

Buna səbəb kimi isə mayın 12-i və 13-də Şuşada keçirilmiş “Xarı bülbül”  Musiqi Festifalında dövlət başçısı İlham Əliyevin hər kəsdən maskasını çıxarmağı xahiş etməsi göstərilir. Müəllifə görə, həmin addım açıq havada maska taxılmasının ləğv olunması haqda qərara təsir edə bilər, onsuz da çoxluq maska taxılmasının əleyhinədir.  

Tibb elmləri doktoru Adil Qeybulla da hesab edir ki, Operativ Qərargah bunu nəzərə alar. Onun fikrincə, açıq havada maska taxmaq absurddur, elmi izahı belə yoxdur, odur ki, bu qərar çoxdan ləğv olunmalı idi.

Adil Qeybulla deyir ki, açıq havada insanları maska taxmağa məcbur etmək doğru deyil, qapalı məkanda isə buna riayət olunmalıdır.

“Moderator.az” saytı isə “Kollektiv Təhlükəsizlik Müqaviləsi Təşkilatı  bu məsələyə müdaxilə edə bilməz” sərlövhəli məqalədə Azərbaycan- Ermənistan sərhədlərinin müəyyən edilməsi prosesi fonunda narazılıqlara görə bəzi postsovet ölkələrinin hərbi birliyi olan Kollektiv Təhlükəsizlik Müqaviləsi Təşkilatının buna medaxilə edib-etməməsi müzakirə olunur.    

Məsələnin mahiyyəti isə budur ki,  Azərbaycan-Ermənistan sərhədlərinin demarkasiyası prosesi başlayıb, Ermənistan bunu ərazilərinin işğal olunması sayaraq üzvü olduğu Kollektiv Təhlükəsizlik Müqaviləsi Təşkilatını dəstək verməyə çağırır.

Milli Məclisin Müdafiə, təhlükəsizlik və korrupsiya ilə mübarizə komitəsinin üzvü, deputat Arzu Nağıyev ermənilərin hərəkətlərini yersiz hay-küy adlandırır. Deputat deyir ki, son günlər adı hallanan Qaragöl gölü ətrafındakı ərazilər Azərbaycanın qanuni əraziləridir, burada təxribatdan söhbət gedə bilməz.

Deputata görə, Azərbaycan Kollektiv Təhlükəsizlik Müqaviləsi Təşkilatının üzvü olan heç bir ölkənin dövlət sərhəddini pozmayıb, buna görə də bu təşkilat məsələyə müdaxilə edə bilməz. 

“Modern.az” saytı isə “Qaragöl ətrafında vəziyyət qəlizləşir-təhlil” sərlövhəli məqalədə Azərbaycan-Ermənistan sərhədlərinin müəyyən olunması ilə bağlı Qaragöl gölü ətrafında  mövcud vəziyyət dəyərləndirilir. Müəllifin fikrincə, Ermənistan baş nazirinin vəzifəsini icra edən Paşinyana kiçik qələbə lazımdır, amma Moskva buna şərait yaratmaq fikrində deyil. Eyni zamanda Moskva bu məsələnin Azərbaycanın xeyrinə həll olunmasını da istəmir, daha çox mübahisəli ərazi kimi qalmasında maraqlıdır.

Müəllifə görə, Ermənistan Bakı-Moskva münasibətlərini çətinləşdirmək, Türkiyə-Rusiya qarşdurması yaratmaq, Moskva dəstək vermədiyi halda Kollektiv Təhlükəsizlik Müqaviləsi Təşkilatını fakt qarşısında qoymaq üçün  sərhəd bölgəsində silahlı təxribata da əl ata bilər.

Ekspert ABŞ Dövlət Departamentinin Azərbaycana qoşunlarını bölgədən geri çəklməsi çağırışı ilə bağlı deyir ki, mayın 13-də məsələyə neytral mövqe göstərən Vaşinqtonun bir gün sonra tərəf seçməsi Paşinyanın seçkiöncəsi kiçik qələbə qazanması və bundan seçkidə istifadə etməsi istəyinin göstəricisidir.

Ekspert hesab edir ki, mümkün riskləri dəyərləndirən rəsmi Bakı sərhəddə gərginlik istəmir, amma bu səssizliyin arxasında fərqli manevrlərin olduğu da istisna deyil.