Media-icmal 15.11.18

Avropa-Azərbaycan iqtisadi münasibətləri, büdcə müzakirələri və s. məsələlər bugünkü (15 noyabr 2018-cu il) medianın aparıcı mövzularındandır.

Avropa üçün xüsusi yeri olan ölkə

"Azərbaycan" qəzeti "Avropa İlham Əliyevin timsalında Azərbaycanı etibarlı tərəfdaş kimi qəbul edir" sərlövhəli məqalədə Azərbaycan-Avropa İttifaqı münasibətlərini dəyərləndirir.

Müəllif deyir ki, Azərbaycanın Avropa İttifaqı (Aİ) ölkələrilə ikitərəfli əlaqələri var, elə xarici ticarət sahəsində bu ölkələrin payının yüksək olması da bunun göstəricisidir: "Dövlət Statistika Komitəsinin gömrük orqanlarına istinadən yaydığı son məlumata görə, Azərbaycanın yanvar-avqust aylarında həyata keçirdiyi 20,2 milyard dollarlıq xarici ticarət dövriyyəsinin əksər hissəsi İtaliya, Almaniya, Çexiya, Fransa, Portuqaliya, Böyük Britaniya, İspaniya, Avstriya, Rumıniya kimi Avropa ölkələrinin payına düşüb".

Yazı müəllifi deyir ki, Azərbaycanın Qarabağ problemi olmasına baxmayaraq, Avropa investorları üçün cəlbedici ölkədir, belə ki, davamlı ictimai-siyasi sabitlik, xarici sərmayələrə etibarlı zəmanət əcnəbi iş adamlarını Azərbaycana investisiya yatırmağa sövq edir.

Məqalənin qalan hissəsi isə Slovakiya dövlətinin Baş naziri Peter Pelleqrininin bu günlərdə Azərbaycana baş tutmuş səfəri fonunda ikitərəfli Azərbaycan-Slovakiya, çoxtərəfli Azərbaycan-Aİ münasibətlərinə həsr edilib.

Müəllifin sözlərinə görə, həm ikitərəfli, həm də Azərbaycan-Avropa İttifaqı münasibətlərinin perspektivləri görüşün əsas müzakirə mövzusu olub.

Yazı müəllifinin sözlərinə görə, Slovakiya nümayəndə heyətilə görüşdə dövlət baçısı İlham Əliyev iki ölkə arasında əməkdaşlığın vacib hissəsi olan Azərbaycan-Avropa İttifaqı münasibətləri barədə danışıb.

Müəllif deyir ki, İ.Əliyev Aİ ilə "Tərəfdaşlıq prioritetləri" sənədinin paraflandığını, siyasi, iqtisadi, sosial, nəqliyyat, enerji sahələrini əhatə edəcək yeni razılaşma üzrə danışıqların fəal mərhələsində olduğunu bildirib.

İ.Əliyev həm də vurğulayıb ki, Slovakiya Baş nazirinin Azərbaycana bu səfəri mövcud münasibətlərin sürətli inkişafı üçün çox yaxşı imkan yaradır.

Müəllif deyir ki, səfər çərçivəsində keçirilən Azərbaycan-Slovakiya biznes forumu da bu məqsədə xidmət edib, foruma müxətlif sahələri təmsil edən 200-ə yaxın şirkət təmsilçiləri qatılıb.

Yazı müəllifinin sözlərinə görə, hazırda Azərbaycanda Slovakiyaya aid 11 şirkət fəaliyyət göstərir, amma bu imkanlar dəfələrlə genişlənə bilər, belə ki, Cənubi Qafqazda istehsal olunan ÜDM-in 60 faizi Azərbaycanın payına düşür və Azərbaycan beynəlxalq hesabatlarda biznes mühitinin əlverişliliyinə görə yüksək yerlərdə qərar tutur.

Müəllifə görə, bu isə həm iki ölkə, həm də Azərbaycanla Aİ arasında gələcək iqtisadi əlaqələrin daha da inkişaf edəcəyindən xəbər verir.

Sosial vəziyyət pis olanda...

"Yeni Müsavat" qəzetində isə "Qüdrət Həsənquliyev: İslahatlar aparılmadan, dövlətin yükünü azaltmadan bunları etmək çox çətin olacaq" sərlövhəli məqalə diqqət cəlb edir.

Müəllif deputat Q.Həsənquliyevin Azərbaycanın 2019-cu il üçün dövlət büdcəsi layihəsinin Milli Məclisin plenar iclasında müzakirələrinin davam etdiyi ikinci gün səsləndirdiyi təkliflərə yer verir.

Müəllifin sözlərinə görə, deputatı narahat edən məsələ demoqrafik sahədəki vəziyyət olub və bu istiqamətdə vəziyyəti yaxşılaşdırmaq üçün stimullardan söhbət açıb.

Deputat hesab edir ki, bir çox hallarda sosial vəziyyət aşağı olduqda, gənclər uşaq dünyaya gətirmək istəmirlər və bu sahədə uşaqlara müavinətin verilməsi ilə bağlı islahatlar həyata keçirilməlidir.

Müəllifin sözlərinə görə, deputat Avropa ölkələrində 18 yaşına qədər uşaqlara müəyyən müavinətər verildiyini, məbləğinin təxminən 200 avro təşkil etiyini söyləyib: "Azərbaycanda da bu sahədə müəyyən islahatlarla nail olmaq olar.

Hər şeyi islahatlar həll edir. Biz islahatlara getməsək, bu problemləri həll edə bilməyəcəyik. Bu, hər birimizi ciddi şəkildə düşündürməlidir".

Deputat demoqarfik sahəyə vəsait yönəldilməsi üçün maliyyə mənbələrini də göstərir və deyir ki, bunun biri dövlət büdcəsindən maliyyələşənlərin sayının azaldılması, digəri isə bəzi dövlət qurumlarının özəlləşdirilməsidir.

Eyni zamanda, Q.Həsənquliyev vurğulayıb ki, bunun əksinə olaraq, gələn il Azərbaycanda büdcə vəsaitinin hesabına çalışanların 19 min nəfərdən çox artırılması planlaşdırılır. Deputat hesab edir ki, "Azərkosmos", "Azərişıq", "Azərsu", "Azəristilik", "Azərqaz" kimi səhmləri dövlətə məxsus olan səhmdar cəmiyyətlərin özəlləşdirilmə vaxtı çoxdan çatıb.

Q.Həsənquliyev gələn il energetika və sənayeyə 782,9 milyon manat vəsait ayrılacağını deyir və etirazını belə ifadə edir: "Gəlin görək, bu sektor büdcəyə nə qədər vergi verib? Ona görə də bu xidmət sahələrini mütləq özəlləşdirmək lazımdır və ya uzun müddətə idarəetməyə verilməlidir".

Deputat iddia edir ki, bu halda dövlət büdcəsinin həcmini 2-3 ilə 40-50 milyard həddinə qaldırmaq, pensiyaları da, uşaqpulunu da vermək mümkün olar.

Deputata görə, bu islahatlar aparılmadan, dövlət yükü azalmadan bunları etmək çox çətin olacaq.

Bu narazılığın kökü

"Modern.az"da isə "Deputat şəhid ailələrinin salındığı biabırçı vəziyyətə etiraz etdi:"Bu yaxşı hal deyil!"" sərlövhəli məqalə oxumaq olar.

Müəllif 2019-cu il üçün Azərbaycan dövlət büdcəsinin Milli Məclisdə müzakirələrində deputat Zahid Orucun təkliflərini dəyərləndirir.

Müəllifin sözlərinə görə, deputat bu ilin aprel aynda Prezident fərmanı ilə imzalanmış üzvləri şəhid olan ailələrə nəzərdə tutulan birdəfəlik 11 min manat müavinətlərin ödənilməsində yaranan xoşagəlməz vəziyyətə münasibət ifadə edib.

Deputat deyir ki, bu fərmanı narazılıq olmadan yerinə yetirmək Əmək və Əhalinin Sosial Müdafiəsi Nazirliyinin, Dövlət Kommersiya Sığorta Şirkəti olan "Azərsığorta"nin vəzifə borcu idi.

Deputat deyir ki, bu məsələ reallaşdırılma mərhələsinə qədəm qoyduqdan sonra kimlərinsə ucbatından şəhid ailələrinin narazılıqları kütləvi xarakter alıb.

Z.Oruc hesab edir ki, indiki narazılığın kökü keçmiş əmək və əhalinin sosial müdafiəsi nazirinin adı çəkilən fərmana açıqlaması ilə bağlıdır:

Deputatın sözlərinə görə, fərmanın dərcindən bir gün sonra keçmiş nazir nazirliyin rəsmi saytına açıqlamasında fərmanın 8800 ailəyə şamil olunacağı bəyanatı səsləndirib: "Deməli, belə bir hesablama həmin günlərdə aparılıb. İndi nə baş verir? Cavabdeh sığorta qurumunun yaşlı bir xanım işçisi həssaslıq və diqqət tələb edən minlərlə şəhid ailəsinin qarşısına iki ədəd köhnə, nimdaş bir dəftərlə çıxıb və sübut etməyə çalışır ki, o insanların çoxu haqsızdır".

Z.Oruc deyir ki, indiki müasir texnologiyalar zamanında bir köhnə dəftər qeydilə şəhid ailələrinin önünə çıxmaq özü biabırçılıqdır: "Sonra uydurdular ki, arxiv yanıb. Bu, necə ola bilər, axı, millətin tarixinin ən şanlı səhifələrini yazan adamların tərcümeyi-halı necə yana bilər?".

Deputat həmin "dəftər"dəki qeydlərə əsasən bildirir: "Guya yaşlı bir ana oğlunun "yeddi"si çıxmamış gedib o pulu alıb. Yaxud, varis olmadığından nənə və baba iki yaşlı nəvələri üçün sığorta pulunu 40 mərasimi çıxmamış, alıblar. Adicə çəkilən imza bunun saxta oldugunu göstərir. Hesab edirəm ki, buna inanmaq mümkün deyil.

Z.Oruc hesab edir ki, burada hansısa "qara əl" var, insanları narazı salır və indi də bu məsələdə hüquqi varis məsələsinin ortaya atıldığını nəzərə çatdırır.

Deputat hesab edir ki, şəhid ailələrinə ödəniləcək bu vəsait çoxlarının gözünə çox görünməsin, çünki bundan da dəfərlərlə çox dövlət və xalq vəsaiti vaxtilə hakimiyyətdə təmsil olunmuş şəxslər tərəfindən ölkədən çıxarılıb.

Deputat metrodan gileyləndi: "Gərək bir milyon insan boğulsun?!"

http://www.moderator.az/news/247281.html

Uşaqlarla, uşaq pulları ilə bağlı məsələ artıq həllini tapmalıdır. Başqa yerdə bu var və yoxdur, bunun bizim üçün elə bir əhəmiyyəti qalmır. Biz özümüz bu məsələni həll etməliyik. Həll etməliyik ki, uşaq xəstə, şikəst, əlil olmasın.

Bunun deputat Fazil Mustafa parlamentdə büdcə müzakirələrində deyib.

Onun sözlərinə görə, burada ünvanlılıq olmalıdır:

"Hökumət hətta, naturallıq yolu ilə də bunu edə bilər, yəni, qida, ərzaq şəklində də kömək etmək olar. Hökumət bu məsələni həll etməlidir".

F. Mustafa həmçinin Bakıda nəqliyyat probleminə də toxunub. O bildirib ki, burada ciddi problem yaşanır:

"Bu problemi aradan qaldırmaq üçün metro çəkilməlidir. Bu gün milyonlarla adam metrodakı havasızlıqdan əziyyət çəkir. Gərək bir milyon insan havasızlıqdan boğulsun ki, bu sahəyə vəsait ayrılsın və metro tikintisi sürətləndirilsin?!".