Media-icmal 16.02.21

“Müsavat.com”  saytı  “Ən pis ssenariyə hazırlıqlı olmalıyıq”-deputat danışdı” sərlövhəli məqalədə pandemiya şəraitində təhsilin vəziyyətini deputat Ceyhun Məmmədovla dəyərləndirlir.

Müəllif deyir ki, 2020-ci ildən dünyaya yayılan koronavirus infeksiyası distant təhsil sisteminin intensiv inkişaf etdirilməsinin zəruriliyini ortaya qoydu.

Deputat Ceyhun Məmmədov deyir ki, bir çox ölkələr 15-20 il öncə distant təhsil sistemini qurmağa çalışsalar da həmin ölkələrdə də distant təhsildə müəyyən problemlər yarandı.

Deputata görə, Azərbaycanda kifayət qədər hazırlıq olmadan distant təhsilə keçildi: “Hazırlıq olmadan onlayn təhsilə keçid, təbii ki, xeyli çətinliklər yaratdı. İnternetin zəif olması, kifayət qədər planşet və kompüterin olmaması, sistemin çox yüklənməsi distant təhsilə təsirsiz ötüşmədi”,- deputat bildirir.

C.Məmmədovun sözlərinə görə, əslində bir çox ölkələrin, eləcə də Azərbaycanın tətbiq etdiyi bu sistem tam distant təhsil sayılmaz: “Praktik istifadə edilən distant texnologiyanın tətbiqi ilə tədris və imtahan prosesinin təşkili üzrə hüquqi normativ baza olmadığı halda bu prosesin aparılmasına çalışılır” deyə bu yöndə problemləri diqqətə çatdırır.

Deputata görə, distant təhsil üzrə ölkədə ekspertlərin az olması nəzərə alınaraq bu sahə üzrə mütəxəssislərin yetişdirilməsi istiqamətində tədbirlər sürətləndirilməli, distant təhsil haqqında ayrıca qanunun hazırlanması barədə düşünülməlidir.

“Redaktor.az” saytı  isə “Koronavirusla bağlı mühüm təhqiqat- Xəstəlik necə yayılıb?” sərlövhəli məqalədə 2019-cu il dekabrın sonunda koronavirus infeksiyasının dünyaya yayılması araşdırılır. 

Müəllif deyir ki, Çində koronavirusun mənşəyini araşdıran Ümumdünya Səhiyyə Təşkilatının (ÜST) tədqiqatçıları 2019-cu ilin dekabrında Vuhanda   epidemiyanın əvvəlcədən düşünüləndən daha çox yayıldığını göstərən əlamətlər aşkar ediblər. Müəllifin deməsinə görə, yüz minlərlə qan nümunəsi incələnib. 

Müəllif vuğulayır ki, ÜST missiyasının baş müfəttişi Peter Ben Embarek CNN-ə müsahibəsində virusun 2019-cu ildə daha geniş yayıldığına dair sübutlar tapdığını qeyd edib. Bu əlamətlər arasında dekabr ayında Vuhan şəhərində 10-dan çox virus növünün ilk aşkarlanması faktı da olduğunu bildirir.

Müəllif əlavə edir ki, komanda üzvləri koronavirusa ilk yoluxan şəxslə də danışıblar, təxminən 40 yaşı olan şəxs dekabrın 8-də xəstəliyə yoluxduğunu deyib.

Amma məqalədə bu da əksini tapır ki, COVID-19 pandemiyasının Çindəki heyvan bazarları ilə əlaqəsi yoxdur. 

P.Embarek isə bunları deyib: "Virus dekabrda Vuhanda geniş yayılmışdı, bu, yeni bir tapıntıdır. Deməli, koronavirus söyləniləndən daha əvvəl olub və sürətlə yayılmağa başlayıb".

“Bizimyolinfo.az” saytı isə “Prezident: “Ermənistandakı revanşist qüvvələr anlamalıdır ki, biz hər şeyə nəzarət edirik” sərlövhəli məqalədə dövlət başçısının Ermənistana xəbərdarlıq olan çıxışnı diqqətə çatdırır.    

Bu xüsusda müəllif prezident İlham Əliyevin fevralın 14-də Füzuli, Zəngilan, Laçın və Cəbrayıl rayonlarına səfər zamanı Laçın rayonunun Güləbird kəndindəki çıxışını yada salır.

Müəllif deyir ki, dövlət başçısı Ermənistanda revanşist qüvvələrin bu gün də  baş qaldırmağa çalışdığını və Azərbaycanı növbəti təxribatlarla, növbəti müharibə ilə hədələməyə çalışırlar: “Onlar anlamalıdırlar ki, biz hər şeyə diqqət yetiririk, hər şeyə nəzarət edirik və heç vaxt imkan verə bilmərik ki, erməni faşizmi bir daha başını qaldırsın” deyə dövlət başçısından sitat gətirir.

Müəllif əlavə edir ki, dövlət başçısı erməni faşizminin məhv edildiyini, düşmənin  Azərbaycan torpaqlarından qovulduğunu,  Ermənistan ordusunun demək olar ki, məhv edildiyini xüsusi vurğulayıb.

Müəllif deyir ki, dövlət başçısı bir daha İkinci Qarabağ Müharibəsinin əhəmiyyətini vurğulayır və bu müharibənin nəticəsi olaraq Ermənistanın təmsilçilik aktına imza qoyduğunu bildirir.

“Yenisabah.az”  saytı isə “Bakıda sənədsiz evlər nə vaxt sənədləşdiriləcək?” sərlövhəli məqalədə paytaxtdakı bu kateqoriya  evlərin uzun illərdir ki, sənədləşdirilməməsi məsələsi müzakirə edilir.

Müəllif yada salır ki, 2011-ci ildə dövlət başçısı səviyyəsində Bakıda sənədsiz evlərin sənədləşdirilməsilə bağlı hökumətə xüsusi tapşırıq verilib.

2015-ci il yanvarın 13-də isə sənədsiz evlərlə bağlı problemin həllinə dair fərman imzalandı,  2020-ci ildə bu problem yenidən gündəmə gəldi və bəzi yerlərdə bələdiyyələr sənədsiz evlərin qeydiyyatını apardı.

Amma müəllif vurğulayır ki, pandemiya, ardınca İkinci Qarabağ Müharibəsi “sənədsiz  evlər” problemini yenə də yaddan çıxardı.

Əslində bu, cəmiyyət üçün çox ciddi problemidr, cünki 500 mindən çox sənədsiz evdən və 4 nəfərlik ailədən hesabladıqda isə 2 milyon insandan söhbət gedir”, - müəllif problemin miqyasını nəzərə çatdırır.

Məqalədə vurğulanır ki, 2015-ci il yanvarın 13-də imzalanan fəmanla 100 mindən çox ev sənədləşdirilib. Amma məsələ hələ də aktual olaraq qalmaqda davam edir, çünkü problem tam şəkildə həllini tapmayıb.

Müəllif  deyir ki, problemi köklü şəkildə həll edə bilmək üçün 2019-cu il iyunun 27-də Bakinin rayonları üzrə yerli ekspert komissiyaları formalaşdırıldı.

Komissiyaların tərkibinə yerli icra hakimiyətinin təmsilçiləri, aidiyyatı nazirlik, komitələrin və s. qurumların nümayəndələri daxildir.

Müəllif əlavə edir ki, amma pandemiya səbəbilə komissiyalar həvalə edilən vəzifələri 2020-ci ildə yerinə yetirə bilmədilər.