Media-icmal 16.05.18

Ölkədə yürüdülən siyasətin dövlət müstəqilliyini təmin etməsi, hökumətin fəaliyyətinə alternativ baxış, mənzil fırıldaqçılığı və s. mövzular bugünkü (16 may, 2018-ci il) medianın aparıcı mövzularındandır.

Dövlət müstəqilliyinin təminatçısı olan siyasət

"Azərbaycan" qəzetində "Güclü dövlətçiliyi təmin edən siyasət" sərlövhəli məqalədə yürüdülən rəsmi siyasət dəyərləndirilir.

Müəllif hazırda yürüdülən rəsmi siyasətin Azərbaycan dövlətinin müstəqilliyini təmin etdiyini deyir və bu siyasətin banisi kimi keçmiş prezident Heydər Əliyevi ünvan verir: "Ümummilli lider Heydər Əliyev də məhz belə unikal keyfiyyətlərə malik dahi şəxsiyyət kimi nəinki Azərbaycanı müstəqil dövlətə çevirdi, həm də onun dönməzliyini təmin etdi".

Yazi müəllifi vurğulayır ki, bu gün artıq beynəlxalq aləmdə böyük siyasi çəkisi olan Azərbaycan yerləşdiyi regionun lider dövlətidir və Heydər Əliyev kimi dahi liderin əzmi, iradəsi və qüdrəti hesabına Azərbaycan xalqı bu sınaqlardan üzüağ çıxa bildi.

Müəllif son 15 ildə, yəni İlham Əliyevin prezidentliyi dövründə yürüdülən siyasəti H.Əliyev siyasətinin davamı kimi dəyərləndirir: "Bu ideyaların həyata keçirilməsini təmin edən prezident İlham Əliyevin rəhbərliyi ilə ölkəmizin öz inkişafının yeni mərhələsinə qədəm qoyması, əldə etdiyi siyasi-iqtisadi uğurlar, beynəlxalq mövqelərini möhkəmləndirməsi Heydər Əliyev yolunun nə qədər düzgün olduğunu əyani şəkildə göstərdi".

Məqalə müəllifi son 15 ildə Azərbaycanın mövqelərinin gücləndirilməsini prezident İlham Əliyevin siyasi uzaqgörənliyi, diplomatik gedişlərinin nəticəsi kimi dəyərləndirir.

Müəllif deyir ki, bu siyasət müstəqil Azərbaycanın dünya miqyasında mövqelərinin daha da güclənməsinə gətirib çıxarıb.

Yazı müəllifi deyir ki, nəticə etibarilə bu siyasət müstəqilliyin və suverenliyin gücləndirilməsinə, ərazi bütövlüyünün bərpasına istiqamətlənib.

Müəllif hesab edir ki, son zamanlar Ermənistanın çıxılmaz vəziyyətə salınması həyata keçirilən siyasətin məntiqi nəticəsidir: "Bu mənada ölkə rəhbərliyinin həyata keçirdiyi siyasət milli və dövlət maraqlarımızın təmin olunması, inkişafı və Azərbaycanın mövqelərinin dünyada möhkəmləndirilməsi deməkdir".

Müəllif vurğulayır ki, bu siyasət çərçivəsində Azərbaycan Avropa və Asiya dövlətləri və təşkilatları ilə milli maraqlara uyğun əməkdaşlıq edir ki, Avropa ilə Asiyanı daha sıx bağlayan nəhəng iqtisadi və enerji layihələri bunun təsdiqidir.

Məqalə müəllifi deyir ki, son 15 ildə yürüdülən siyasətin uğurlu nəticəsi olaraq Azərbaycan beynəlxalq mövqelərini ildən-ilə gücləndirir, bu daxili və xarici siyasət milli və dövləti maraqları qlobal miqyasda layiqincə təmin edir.

Bu hökumətlə islahat olar?

"Novoye Vremya" qəzetində isə "İslahatlar, yoxsa əvvəlki kurs?" sərlövhəli məqalə oxumaq olar.

Müəllif yeni formalaşan Nazirlər Kabinetinin necə fəaliyyət göstərə biləcəyini müzakirəyə çıxarır.

Müəllif hələlik yeni kabinetin fəaliyyətində hər hansı fəallığın olmadığını bildirir: "Baxmayaraq ki, yeni Nazirlər Kabineti artıq formalaşıb və fəaliyyətə başlayıb, amma hələlik onun işində aktivlik müşahidə edilmir. Bəlkə, yeni tərkib xələflərinin "cığırı" ilə gedəcək, yəni, fəaliyyəti barədə ildə ancaq bir dəfə Milli Məclisə hesabat verməklə kifayətlənəcək?".

Yazı müəllifi vurğulayır ki. yerli ekspertlər hadisələrin belə inkişafını heç də istisna etmirlər.

Müəllif keçmiş deputat, iqtisadi ekspert Nazim Bəydəmirliyə istinadən bildirir ki, tərkibinə görə yeni Nazrilər Kabinetini islahatçı adlandırmaq mümkün deyil, bu, özündən əvvəlki kabinetin davamıdır: "Islahatlari həyata keçirə bilmək üçün Nazirlər Kabineti tam müstəqil, Prezident Administrasiyasından asılı olmamalıdır. Amma indi faktiki olaraq paralel hökumət strukturları fəaliyyət göstərir. Nazirlər qəbul edəcəkləri qərarları kabinet rəhbərliyi ilə yox, Prezident Administrasiyasının şöbə müdirləri və köməkçiləri ilə razılaşdırırlar", -bunu ekspert belə şərh edir.

Ekspert hesab edir ki, Nazirlər Kabinetinin fəaliyyətinə gəlincə, onun ilk işi ölkədə məmur sahibkarlığını və inhisarı aradan qaldırmaq olmalıdır, çünki ölkə təbii resurslar baxımından nə qədər varlı olsa da sahibkarlıq inkişaf etməyincə, iqtisadiyyat rəqabət qabiliyyətli olmayınca dayanıqlı tərəqqini təmin etmək mümkün deyil.

N.Bəydəmirli məmurların gəlir və əmlakları barədə bəyannamənin təsdiq olunmasını da kabinetin təxirəsalınmaz vəzifələri sırasında gördüyünü bildirir.

"Bir çox nazirliklərin rəbərləri səlahiyyətləri əllərində cəmləyərək faktiki özəl bizneslə məşğul olurlar. Faktiki olaraq dövlət satınalınması ilə bağlı layihələr gerçəkdə şirkətlərin məmurlarına tapşırılır. Nə qədər ki məmur sahibkarlıqla məşğuldur, dövlət məsələlərilə maraqlanmayacaq".

Müəllif deyir ki, hökumətin tərkibi və rəhbərliyinə baxarkən ilk düşüncə onların qarşılarına iqtisadiyyatda islahat aparmaq məqsədi qoymadığı olur və bu, həqiqətən belədir: "Hökumətdə bəziləri neçə 10 illərdir illərdir ki, aparıcı vəzifələri tuturlar, bəziləri başqa vəzifələrə keçirilib, bəs o zaman islahat kursunu kim icra edəcək? Məmur sahibkarlığını və inhisarı kim aradan qaldıracaq, çünki məmur-sahibkar elə yüksək vəzifəlilər və onların ətrafıdır".

Müəllif deyir ki, ölkədə biznes ona görə inkişaf etmir ki, inhisarçılar öz qaydalarını diqtə edirlər, ölkə iqtisadiyyatında inhisarlaşma səviyyəsini nəzərə aldıqda isə onun rəqabət qabiliyyətli olacağı acı gülüş doğurur.

Müəllif vurğulayır ki, açıqlıq, şəffaflıq olmadan korrupsiya və inhisarla mübarizə mənasız olacaq.

Müəllif deyir ki, Azərbaycan iqtisadiyyatı sırf neft amilinə hesablanıb. Neftin qiyməti isə artır, bu isə o deməkdir ki, artıq hökumət ölkədə islahatlar barədə düşünməyəcək.

Bu amildən irəli gələrək müəllif həm də xəbərdarlıq edir ki, əvvəlki kursla getmək olmaz, bu, yeni iqtisadi kataklizmlər önündə gücsüz qalmaq deməkdir.

Bina deyil ki, "çıxılmaz dalan"...

"Bizim Yol" qəzeti "Bakıda növbəti tikinti qalmaqalı: Pulunu veriblər, mənzili ala bilmirlər" sərlövhəli məqalə diqqət cəlb edir.

Müəllif deyir ki, Bakı şəhəri Həsən Əliyev, 50 ünvanında tikilmiş çoxmərtəbəli bina ilk baxışda göz oxşayır.

Amma məsələ burasındadır ki, binanın prospektə baxan fasad hissəsi nə qədər möhtəşəm görünsə də binaya bir də keçib arxa və yan tərəfdən baxdıqda buna təəccüb edirsən.

Müəllif bina sakinlərinə istinadən deyir ki, binanı 2013-cü ildən tikməyə başlayan Sahib İbrahimovla sakinlər arasında bağlanmış müqaviləyə əsasən bina 24 ay ərzində, yəni 2015-ci ildə başa çatmalı idi. "Amma 2015-ci ildən 3 il keçib, işlər qalıb yarımçıq, binanın üstü bəzədilib, kənardan hazır kimi görünsə də nə suyu, nə qazı, nə kanalizasiya sistemləri çəkilməyib".

Müəllif deyir ki, sakinlər bina sahibinin binanı təhvil verməməsi səbəbindən burada böyük məbləğdə pul verib mənzil alan vətəndaşlar girib mənzillərində yaşaya bilmirlər.

Müəllif deyir ki, üstəlik yeni tikilən bu yaşayış binası ətrafdıkı binanın sakinlərini də narahat edir.

Müəllifin deməsinə görə, səbəb də budur ki, bu bina tikilib başa çatdırılmadığından ətrafdakı abadlığa xələl gətirib, binanın altında park yeri hazırlanması ilə əlaqədar qazılmış böyük çökəklikdə su toplanıb. Bir balaca külək əsəndə qazılmış torpaq hər tərəfi toza bulayır və bunun nə qədər davam edəcəyi bəlli deyil.

Müəllif vurğulayır ki, yaranmış üfunətli gölməçə yayda mığmığa yuvasına çevrilir, üstəlik isə elə bu su binanın özünün də çökməsinə səbəb ola bilər.

Müəllifin sözlərinə görə, problem bununla bitmir, həyət sakinləri uşaqlarını həyətə buraxmağa qorxurlar ki, zibilliyə çevrilmiş gölməçədə düşüb boğulma ehtimalı yüksəkdir.

Müəllif sakinlərə istinadən deyir ki, dəfələrlə binanın sahibi Sahib İbrahimova şikayət etsələr də "gedin kimə istəyirsiniz şikayət edin" cavabını eşidiblər.

Müəllif deyir ki, beləcə bu binada mənzil alanlar da, bu evlə qonşu yaşayanlar da şəhərin mərkəzi prospektində çıxılmaz "dalan"a dirəniblər.