Media-icmal 17.09.20

Pandemiyaya qarşı mübarizə, Rusiyanın OPEK+ razılaşmasını pozması, sərt karantin rejiminin tətbiqinin effektsizliyi və s. məsələlər medianın aparıcı mövzuları sırasındadır. 

“Azərbaycan” qəzeti “Mübarizə öz bəhrəsini verir” sərlövhəli məqalədə COVİD-19 pandemiyasına qarşı mübarizəni dəyərləndirir.

Müəllifin deməsinə görə, bu virus sürətlə yayılmaqda davam edir, dünyada bu təhlükəli infeksiyaya 30 milyon insan yoluxub, ölənlərin sayı isə 940 minə çatır.

Müəllif əlavə edir ki, oktyabr-noyabr aylarında Avropada yoluxmanın artması gözlənilir. Həm də vurğulanır ki, hələ bu virusa qarşı peyvənd əldə edilməyib. 

Müəllif deyir ki, sentyabr ayından bir çox ölkələrdə koronavirusa yoluxanların sayında kəskin artım müşahidə olunmaqdadır, hətta Gürcüstan və İsrail pandemiyanın ikinci dalğasının başlandığını elan ediblər.

Yazı müəllifi deyir ki, Azərbaycanda digər ölkələrlə müqayisədə yoluxma və ölüm sayı xeyli aşağıdır, ölkə daxilində isə yoluxma hallarının 56%-i paytaxt Bakının payına düşür.

“Azərbaycanın COVID-19-la mübarizədə uğurlu fəaliyyəti, qəbul edilmiş qərarların vaxtında və yüksək keyfiyyətlə icrası ölkədə sanitar-epidemioloji vəziyyəti nəzarət altında saxlamağa imkan verib”,  - müəllif bu müstəvidə ölkədəki vəzyyəti  qiymətləndirir.

Müəllifə görə, Azərbaycanda iki aya yaxındır yoluxma sayının stabil qalması, sanitar-epidemioloji vəziyyətin qənaətbəxş olması karantin məhdudiyyətlərinin aradan qaldırılmasını labüd edib, yumşalma addımları elə atılır ki, xəstələrin sayı kəskin artmasın.

Müəllif hesab edir ki, virus dünyadan tamamilə yox olmadan və ya hamıya peyvənd vurulmadan rahat davranmaq yolverilməzdir, tibbi maska taxmaq, gigiyenik qaydalara əməl etmək və sosial məsafə saxlamaq infeksiyadan qorunmağın ən sadə və ən səmərəli yoludur

“Bizimyol.info.az” saytı “Rusiya neft razılaşmasını pozur” sərlövhəli yazıda bu ölkənin  neft hasilatçısı olan ölkələr, o cümlədən Azərbaycanla imzaladığı müqaviləyə əməl etməməsi açıqlanır.

Müəllif deyir ki, Rusiya avqust ayında OPEK+ razılaşmasının öhdəliklərini tam yerinə yetirməyib, qonşu ölkə bununla da son ayların ənənəsini davam etdirib.

Müəllif vurğulayır ki, Rusiya OPEK+ razılaşmasını yalnız 98 faiz yerinə yetirib. Kondensat nəzərə alınmazsa Rusiyanın neft şirkətləri sutkada 9.04 milyon barel neft hasil edib. Bununla da razılaşma müəyyən qədər pozulub.

Müəllif əlavə edir ki, Səudiyyə Ərəbistanı sutkada 8.94 milyon barel neft hasil edir. Ərəblər öhdəliyə 103 faiz əməl etməyi bacarır.

Ümumilikdə OPEK+ ölkələrində bu göstərici 97 faizdir. Avqustda təşkilat üzvləri sutkada 22.07 milyon barel neft çıxarıb.

May-iyul ərzində Rusiya razılaşmanı pozanların siyahısında ikinci yeri tutmuşdu,

Şimal dövləti nəzərdə tutulandan sutkada 283 min barel çox neft hasil etmişdi.  Razılaşmaya ən çox İraq zərbə vurmuşdu. Müsəlman ölkəsində artıq hasil edən neftin həcmi 851 min barel olmuşdu.

Ümumiyyətlə, son günlər İraq neftin qiymətinin aşağı düşməsində əsas günahkarlardan sayılır. Asiya dövləti OPEK+ razılaşmasının şərtlərini aşmaq istəyir. Böyük ehtimalla 2021-ci ildən İraqı bu təşkilatda görmək mümkün olmayacaq.

“Yeniavaz.com” saytı isə “Ağır karantin rejiminin COVID-19-la mübarizədə heç bir faydasının olmadığı görüldü” sərlövhəli məqalədə müəllif sərt karantin rejiminin COVİD-19 pandemiyası ilə bağlı mübarizədə rolu barədə deputat və həkim Rəşad Mahmudovla söhbətləşir. 

Deputat deyir ki, artıq konkret qərar verildi, ağır, sərtləşdirilmiş karantin rejiminin COVID-19-la mübarizədə heç bir faydasının olmadığı, hətta zərərinin çox olduğu görüldü.

O bildirib ki, əslində ağır karantin rejiminin zərərinin çox olduğunu hamı bilirdi: “Tibbi nöqteyi-nəzərdən faydasına görə bu, olunurdu. Görüldü ki, faydası da yoxdur. Yəni, ən ağır forma olsa belə bundan sonra parklarımız bağlanmayacaq, R.Mahmudov bəyan edir.

Onun fikrincə, bu hadisələr əslində yeni bir təcrübə oldu və bu təcrübələrlə birlikdə məhdudiyyətlərin üzərimizdə yaratmış olduğu məcburiyyət içində qalan fiziki passivlik, əlbəttə, nəticəsini verir”.