Media-icmal 19.02.21

"Modern.az" saytında "Kürün ekosisteminin məhv olma təhlükəsi yaranıb – akademik" sərlövhəli məqalədə müəllif bəhs edilən mövzu ilə bağlı AMEA Coğrafiya İnstitutunun direktoru, akademik Ramiz Məmmədovun

"Qlobal iqlim dəyişmələri planetimizin əsas çağırışı kimi, onların Azərbaycan ərazisində təzahürləri" mövzusunda keçirilən ümumrespublika elmi seminarındakı məruzəsini təqdim edir.

Müəllif deyir ki, R.Məmmədov son 30 ildə iqlim dəyişikliklərinin ciddi dəyişdiyini bildirib. Onun sözlərinə görə, temperatur bütün ölkə üzrə bərabər şəkildə dəyişməyib.

Müşahidə dövründə temperatur artımı Kür-Araz düzənliyində, Qazax-Gəncə zonasında, Böyük Qafqazın Cənub yamacında, Kiçik Qafqazın şimal-şərq və şimal yamaclarında qeydə alınıb: "Abşeron yarımadası istisna olmaqla, bütün ölkə ərazisində yağıntının miqdarı 10-15% azalıb", deyə R.Məmmədov bildirib.

İnstitutun direktoru əlavə edib ki, ümumilikdə ölkədə ekstremal hidrometeoroloji hadisələrin sayı çoxalıb, ən böhranlı vəziyyət Kür çayında müşahidə olunub, çayın su sərfi ekoloji minimuma yaxınlaşıb, çay ekosisteminin məhv olma təhlükəsi yaranıb.

"Yenisabah.az" saytı "Laçın dəhlizi Azərbaycanın nəzarətinə keçəcək - Tələsmək lazım deyil..." sərlövhəli məqalədə Laçın dəhlizinin Azərbaycanın tam nəzarətinə keçəcəyi zaman deputat Aqil Abbasla dəyərləndirilir.

Müəllif deyir ki, Laçın dəhlizi vasitəsilə Ermənistanın yüksək rütbəli məmurlarının Azərbaycana icazəsiz səfərləri davam edir. Azərbaycanın dövlət rəhbərliyi səviyyəsində 2021-ci ilin yanvarında belə səfərlərə son qoyulması tələbi səsləndirilmişdi.

Deputat deyir ki, Laçın dəhlizi Azərbaycanın nəzarətinə keçəcək və bu məsələ 2020-ci il noyabrın 10-da Azərbaycan, Rusiya və Ermənistan rəhbərləri arasında imzalanmış bəyanatda əksini tapır: "Biz Laçında gömrüyü quracağıq, orada Azərbaycan sərhədi olacaq.   Gürcüstandan, Rusiyadan Azərbaycana insanlar necə gəlirlərsə, ermənilər də elə gəlib-gedərlər. Biz artıq sərhədi qura-qura gedirik və hətta Ermənistan yoluna nəzarət edirik. Sadəcə tələsmək lazım deyil.

Qafqazinfo.az saytında isə "Aİ-92-nin keyfiyyətində problemlər var" sərlövhəli məqalədə Azərbaycanda kütləvi istehlak olunan Aİ-92 markalı benzinin keyfiyyəti şərh edilir.

Müəllifin sözlərinə görə, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən Azərbaycanda yanacağın keyfiyyəti ilə bağlı 2020-ci il ərzində 36 yanacaqdoldurma stansiyasında monitorinq aparılıb.

Müəllif əlavə edir ki, Xidmət rəisinin müavini Məmməd Abbasbəyli 2020-ci ilin yekunlarına həsr olunmuş onlayn konfransda "Ai-92" markalı benzinin keyfiyyəti ilə bağlı şikayətlərə dair sualları cavablandırıb.

Rəis müavinin sözlərinə görə, bu məntəqələrin əksəriyyətində kənarlaşmalar müşahidə olunub və vətəndaşlar tərəfindən daxil olan şikayətlər öz təsdiqini tapıb. "Tərəfimizdən tədbirlər planı hazırlanır və yaxın vaxtda ictimaiyyətə məlumat veriləcək", deyə M.Abbasbəyli bildirib.

Xidmət rəsmisi həmçinin əlavə edib ki, yanacağın keyfiyyətində problemlər var: "Hazırda yanacağın keyfiyyəti ilə əlaqədar standart hazırlanır. Burada yanacağın istehsalından istehlakçıya təqdim olunmasına qədər olan bütün proses nəzərdə tutulur. Hazırda standartla bağlı məsələ razılaşdırmanın son mərhələsindədir və ümid edirik ki, tətbiqindən sonra bu problemlər aradan qalxacaq". 

"Bizimyolinfo.az" saytı isə "Bahalaşmanın arxasında məmurlar və deputatlar dayanır" sərlövhəli məqalədə ölkədəki bahalıq iddiası müzakirə olunur.

Müəllif deyir ki, 2021-ci ilə daxil olduqdan bu yana komunal xidmətlərin, eləcə də ərzaq məhsullarının qiymətlərində artım müşahidə edilir, gündən-günə qiymətlərin artması insanların maddi rifahını olduqca aşağı səviyyəyə salıb.

Müəllifə görə, dünya bazarında qida xammalının qiymətləri yanvar ayında son 7 ilə yaxın müddətin ən yüksək həddinə çatıb, dünyadakı bu artımların əsas səbəbi hazırda yaşanan qlobal böhrandır.

Müəllif iddia edir ki, Azərbaycanda isə dünyadakı proseslər xaricində də qiymət artımı müşahidə edilməkdədir: "Azərbaycanda bahalaşmaya səbəb olan əsas amillərdən biri isə sahibkarların arxasında duran məmur və deputatlardır.

Ölkədə əsas fəaliyyət sahələrinin məmurlar tərəfindən ələ keçirilməsi ilə azad sahibkarlıq məhv olub", deyə müəllif səbəbləri göstərir.

İş adamı Nazim Bəydəmirli bildirir ki, Azərbaycanda qiymət artımının dərin səbəbləri var, bu, məmur sahibkarlığıdır. Bazarda sahibkar sayını minimuma endirənlər  qiyməti diktə edir və vətəndaş da məcbur olub qiməti qəbul edir.  N.Bəydəmirlinin sözlərinə görə, qiymət artımını sərtləşdirən amillərdən biri də Gömrük Komitəsinin apardığı distant siyasətdir. "Yəni Gömrük Komitəsi sahibkarın gətirdiyi malın bəyənnamə qiymətini əsassız olaraq şişirdir", deyə bahalaşmanın mənbələrindən birini göstərir.

Onun fikrincə, idxaldan asılı ölkə kimi Azərbaycan belə qiymət bahalaşmasından həmişə əziyyət çəkir.