Media-icmal 19.03.21

Son günlərdə koronavirusa yoluxmanın artmasının səbəbləri, R.Əkbərovun həbsi fonunda başqa kimlərin həbs edilə biləcəyi, bahalaşmanın səbəbləri və s. məsələlər medianın aparıcı mövzuları sırasındadır...  

“Redaktor.az” saytında “Tibbi Ərazi Bölmələrini İdarəetmə Birliyi (TƏBİB) rəsmisindən qapanma ilə bağlı açıqlama” sərlövhəli məqalədə son günlər koronavirus infeksiyasına yoluxma hallarının kəskin  artmasının səbəbləri barədə mülahizələr söylənilir. 

TƏBİB-in Yoluxucu xəstəliklər üzrə İşçi qrupunun rəhbəri, həkim-infeksionist Vasif Əliyev bu yoluxma artımının virusun “üçüncü dalğası”   adlandırılmasını doğru saymır. 

V.Əliyevin sözlərinə görə, qapanmalara gedildikcə yoluxma azalır, yumşaldılmalara gedildikcə isə çoxalır. İnfeksionist yoluxmanın artmasına görə insanları təqsirli sayır: “Məhdudiyyətlərin aradan qaldırılması insanlarda arxayınlığa, tələb olunan qaydalara əməl etməmələrinə gətirib çıxarır. Nəticədə virus da artmağa başlayır”, deyə fikrinə bəraət qazandırır.

V.Əliyev uzunmüddətli qapanmaların tətbiqinin bütün sahələrə mənfi təsir etdiyini desə də, insanların sağlamlığı baxımından bunun qaçılmaz olduğunu deyir.

İnfeksionist qarşıdakı bayram günlərində qapanmaların olub-olmayacağının Operativ Qərargahın martın 19-da keçirilməsi nəzərdə tutulan brifinqində müəyyən ediləcəyini bildirir.

“Yenisabah.az” saytı isə “Rövşən Əkbərov özü ilə kimləri “içəri” aparacaq?” sərlövhəli məqalədə müəllif 2021-ci il martın 15-də həbsə alınan ehtiyatda olan general-leytenant Rövşən Əkrəbovun həbsini şərh edir.

Baş Prokurorluq martın 17-də açıqlama yayaraq R.Əkbərovun 2001-ci ildə Ukraynada törədilmiş qətlə görə şübhəli kimi həbsə alındığını bildirir.

Müəllif deyir ki, sübutlar təsdiqini tapdığı halda R.Əkbərovun 20 il ərzində məsuliyyətdən kənarda necə qala bilməsi də müzakirə mövzusu olacaq.  

Bunun ardınca isə müəllif qanunların aliliyini təmin etməli olan orqanların rəhbərlərini fəaliyyətsizlikdə, Ukrayna tərəfin israrına baxmayaraq, istintaq hərəkətlərini yerinə yetirməməkdə ittiham edir.

Müəllif hesab edir ki, burada həm Baş Prokurorluğun, həm də Hərbi Prokurorluğun məsuliyyəti var.

“Bizimyolinfo.az” saytında isə “Qapanmadan danışana qədər nəqliyyatı qaydaya salsınlar” sərlövhəli məqalədə karantin rejiminin sərtləşdirilməsi ehtimalı Tibb Universitetinin müəllimi Fuad İslamzadə ilə şərh edilir.

Müəllif vurğulayır ki, martın 19-da Nazirlər Kabineti yanında Operativ Qərargahın brifinqi gözlənilir, buna səbəb kimi Azərbaycanda koronavirusun yeni növü olan Britaniya ştammının tapılması ehtimalı göstərilir.

Müəllif əlavə edir ki, sərt qapanma zərurətinin məhz bayram ərəfəsinə təsadüf etməsi cəmiyyətdə birmənalı qarşılanmır, narazılığa səbəb olur.

F.İslamzadə hesab edir ki, qapanmadan danışana qədər nəqliyyatı qaydaya salmaq lazımdır. Onun sözlərinə görə, qapanmaya gedilib-gedilməyəcəyi də sual altındadır və Operativ Qərargahın belə qərar qəbul edib-etməyəcəyi də qeyri-müəyyəndir.

Müəllif vurğulayır ki, koronavirusun Britaniya ştammı daha təhlükəli, sürətlə yayılan, ağır keçirilən sayılır və Avropada bir çox ölkələrin üçüncü dəfə qapanmaya getməsi məhz Britaniya ştammının yayılmasının nəticəsidir.

Müəllifin sözlərinə görə, VOC 202012/01 koronavirusundan başqa, ilk dəfə Cənubi Afrikada aşkar olunmuş 501Y.V2 ştammının coğrafiyası da genişlənərək (daha 6 ölkə) 64 ölkəyə çatıb. Əvvəlcə Braziliya və Yaponiyada təsbit edilən P.1 ştammı da daha 6 ölkədə aşkar edilib və indi bu mutant növü 38 ölkədə dolaşmaqdadır.

“Müsavat.com” saytında yer alan “Bahalaşma iynu sonuna kimi davam edəcək” sərlövhəli məqalədə müəllif  ölkədəki bahalaşmanı iqtisadçı-ekspert Prviz Heydərli ilə müzakirə edir.

Müəllif Dövlət Statistika Komitəsinə istinadən bidirir ki, 2021-ci ilin yanvar-fevral  aylarında ölkədəki istehlak qiymətləri indeksi 2020-ci ilin yanvar-fevral aylarına nisbətən 3,7% artıb. O cümlədən ərzaq məhsulları, içkilər və tütün məmulatları 4,9%, qeyri-ərzaq məhsulları 3,6%, əhaliyə göstərilmiş ödənişli xidmətlər 2,3% bahalaşıb.

İqtisadçı-ekspert P.Heydərli isə deyir ki, Statistika Komitəsinin açıqladığı rəsmi inflyasiya göstəricisidir: “Reallıqda inflyasiya bundan xeyli yüksəkdir. Bunun da əsas hərəkətverici qüvvəsi benzinin, dizelin və suyun qiymətindəki artımlardır. Bu artımların təsiri ilə bazarda baş verən bahalaşma rəsmi qurumun açıqladığı səviyyədə ola bilməz, daha yüksəkdir”, deyə iqtisadçı bildirir.

Ekspertə görə, tarif dəyişikliyi qışda baş verdiyi üçün ərzaq məhsullarının qiymətinə tez təsir etdi.

P.Heydərov hesab edir ki, bahalaşma prosesi ilin birinci yarısının sonunadək davam edəcək. Onun fikrincə, həm xarici faktorların, həm daxildəki tarif dəyişikliklərinin, həm də ümumi iqtisadi fonun tam şəffaflaşmamasının təsiri ilə bahalaşma aprel-may aylarında da davam edəcək.