Media-icmal 20.05.2016

Amnistiya təşəbbüsü, səhiyyənin durumu, Azərbaycanın antiterror koalisiyada iştirakı məsələsi, ərzaq təhlükəsizliyi bugünkü medianın aparıcı mövzusudur.

Amnistiya təşəbbüsçüsü

“Azərbaycan” qəzeti  Heydər Əliyev Fondunun prezidenti, deputat Mehriban Əliyevanın amnistiya təşəbbüsü ilə bağlı “Mehriban Əliyevanın IV amnistiya təşəbbüsü” sərlövhəli məqalə dərc edib.

Məqalədə keçmiş prezident Heydər Əliyev dövründə qəbul edilən amnistiya aktları, əfv fərmanları barədə danışılır. Hazırda bu humanizm yolunu H.Əliyev Fondunun davam etdirdiyi vurğulanır və bu haqda məqalədə oxuyuruq: “Ulu öndərin mərhəmət, insanpərvərlik məfkurəsindən çıxış etmək, humanizm ideyalarını həyata keçirmək Heydər Əliyev Fondunun da başlıca məramlarından biridir”.

Məqalədə daha sonra Fondun 2007 və 2009-cu illərdə amnistiya təşəbbüsü   çıxış etməsi və indiki amnistiya təşəbbüsünün sayca 3-cü olduğu xatırladılır. 

Bütünlükdə isə Fondun uğurlarının əsasında, təşəbbüslərin gündəmə gətirilməsində Fondun prezidenti M.Əliyevanın insanlara qayğı və təmənnası xidməti göstərilir.

“Bu ondan xəbər verir ki, Fond xeyriyyəçilik, səhiyyə və təhsil sisteminin, mədəniyyət və incəsənətin inkişafı, mədəni irsin dünyada təbliği Azərbaycan həqiqətlərinin beynəlxalq aləmə çatdırılması ilə yanaşı humanizm məfkurəsindən çıxış edən amnistiya təşəbbüsçüsüdür”.

Öncə səhiyyəni sağaldın, sonra…

“Azadlıq” qəzeti  aprel ayından paytaxta gələn xəstələrin ancaq göstərişlə gəldikdə qəbul edilməsi haqda Səhiyyə Nazirliyinin yeni tətbiq etdiyi qaydanı ciddi tənqidə məruz qoyub. Məqalədə deyilir ki, nazirlik bu mövqeyini rayonlarda diaqnostika mərkəzləri, müasir tələbli xəstəxanalar tikilməsi ilə əlaqələndirir.

“Səhiyyə Nazirliyinin belə qərar qəbul etməsi vətəndaşın hüquqlarının tapdanmasıdır. Yəni, istənilən şəxs harada müalicə və müayinə olunacağına özü qərar verir. Buna məhduduiyyət qoymaq yanlışdır”. Bu isə müəllifin mövqeyidir.

Daha sonra məqalədə nazirliyin əsaslandırmasının özü əsassız sayılır. “Nəinki rayondakı diaqnostika mərkəzlərinə, heç paytaxtdakı klinika, xəstəxanalarına əhalinin etimadı yoxdur. Bunun nəticəsidir ki, hər il 100 minlərlə vətəndaş müalicə və müayinə üçün Gürcüstan və İrana üz tutur”. Bu mənada müəllif əyalətlərdə tibbi durumun paytaxta münasibətdə daha pis olduğu qənaətini ifadə edir və tezisini belə genişləndirir: “Binanın təmirli olması, avadanlığın müasir olması işlərin keyfiyyətli olması anlamına gəlmir. Ona qalsa Azərbaycanda dəbdəbəli məktəb binaları var, amma içində elm yoxdur, dəbdəbəli məhkəmə binaları var, içində ədalət yoxdur, dəbdəbəli bank binaları var, amma bank sektoru iflic durumdadır”.

Müəllif nazirliyin qaydasını istənilən halda zərərli sayaraq paytaxta gələn xəstələrə əngəl olmaqdansa səhiyyədə korrupsiyaya, rüşvətə əngəl olmaq tövsiyəsi verir.

Bu koalisiya Azərbaycana lazımdırmı?

“Novoye Vremya” qəzeti  Azərbaycanın da qatılığı və mayın 15-dən Türkiyənin İzmir şəhərində start götürmüş  və iyunun 1-nə kimi davam edəcək hərbi təlimlər fonunda Azərbaycanla bağlı bir məsələyə toxunur.

Bir müddət öncə Səudiyyə Ərəbistanı müsəlman ölkələrinə təşəbbüsçüsü olduğu “Antiterror koalisiyası” yaratmaq təklifi səsləndirmişdi və bu mənada Azərbaycana da dəvət var idi. “Bakı və Ər-Riad birgə təlimlərə qoşulur” sərlövhəli məqalədə məhz bu məsələ vurğulanır. “O zaman Azərbaycan buna razılıq vermədi, amma indi dəyişikliklər baş verməkdədir, görünür, ölkələr artıq praktiki fəaliyyətlərə keçirlər”.

Yeri gəlmişkən, adı çəkilən təlimlərə Azərbaycan, Türkiyə, Qətər, ABŞ və Səudiyyə Ərəbistanı qatılıblar. Təlimlərdən əsas məqsəd terrora qarşı mübarizədə əlbir fəaliyyətə və əlaqələndirməyə nail olmaqdır. Daha sonra bu təklif yersiz görünür və bu haqda məqalədə oxuyuruq: “ABŞ-ın başçılığı ilə bir böyük Qərb koalisiyası var, digər tərəfdən Rusiya-İran koalisiyası var, daha bir koalisiyanı yaratmağın mənası nədir?”.

Həm də bu məqalədə Ər-Riyadın Yəmən husilərini sakitləşdirmək üçün yaratdığı koalisiyanın çoxsaylı səhvlərə yol verdiyi, dəqiqi hesablamalar olmaması  üzündən günahsız insanların məhv edildiyi xatırladılır.  

Müəllifin düşüncəsinə görə, indiki halda Səudiyyə-Türkiyə yaxınlaşması nəzərə alınarsa Azərbaycanın burada iştirakı mümkün görünür. Amma bu koalisiyanın terrora qarşı mübarizədə uğur qazana bilməsi real görünmür. Bundan irəli gələrək  müəllif mövqeyini belə ifadə edir: “Azərbaycan indi bu təlimlərdə içtirak etməklə görür ki, bu koalisiyaya daxil olmaq ona heç nə verməyəcək, bundan əlavə, 34 ölkənin bu koalisiyada fəaliyyətinin necə koodinasiya ediləcəyi hələ aydın deyil. Həm də Səudiyyənin husilərə qarşı koalisiyasının nəticəsizliyi də arxa plana keçirilə bilməz”.

Natiq Cəfərli: “Şübhə edirəm ki…”

“Bizm Yol” qəzeti ölkə restoranlarında, şadlıq saraylarında keyfiyyətsiz yeməklərin hazırlanmasını araşdırır. Müəllifə görə, dövlət başçısının özəl obyektlərin yoxlamalardan kənar saxlanması haqda qərarına görə bunu müəyyən etməyin mümkün olmadığı deyilir. Eyni zamanda ekspert Eyyub Hüseynov belə düşünür ki, natəmizliyin qarşısını almaq üçün istehlakçı siyasəti formalaşmalıdır.

E.Hüseynov deyir: “Belə hal ciddi epidemiyaların yayılmasına səbəb ola bilər. Odur ki, bu məsələ daim diqqət mərkəzində qalmalıdır”.

Ekspert Natiq Cəfərli isə “qızıl orta”nı tapmağı təklif edir. “Obyektlərdə yoxlamalar hansısa neqativ məsələni aşkar etməyə yox, korrupsiya mənbəyinə çevrilmişdi”. Onun fikrincə, ərzağın  keyfiyyəti məsələsini diqqətdə saxlamaq olar. Amma təki,  bu, elə keyfiyyəti yoxlamaq olsun, daha rüşvət mənbəyinə dönməsin.

Amma ekspert yenə də bu yoxlamaların rüşvət mənbəyinə dönməyəcəyinə şübhə ilə yanaşdığını ifadə edir.