Media-icmal

Birinci vitse-prezident Mehriban Əliyevanın İçərişəhərə baş çəkməsi, qaz və elektirk limitinin ləğvinin mümkünlüyü ətrafında müzakirələr, fermerlərin aqrar sığorta problemləri və s. məsələlər bugünkü (27 aprel, 2019-cu il) medianın aparıcı mövzularındandır.

Mehriban Əliyeva: "Bir daşa da ziyan dəyməməlidir"

"Azərbaycan" qəzeti " Birinci vitse-prezident: "Bir daşa da ziyan dəyməməlidir" (http://www.azerbaijan-news.az/view-166753/B%C4%B0R%C4%B0NC%C4%B0-V%C4%B0TSE-PREZ%C4%B0DENT:--Bir-da%C5%9Fa-da-ziyan-d%C9%99ym%C9%99m%C9%99lidir) sərlövhəli məqalədə birinci vitse-prezident Mehriban Əliyevanın aprelin 26-da "İçərişəhər"ə gəlişini dəyərləndirir.

Müəllifin deməsinə görə, səfərdə məqsəd UNESCO-nun Dünya İrs Siyahısında yer alan İçərişəhərin tarixinin qorunması ilə bağlı olub, bu məsələ prezidentin və M.Əliyevanın daim diqqət mərkəzindədir.

Həm də son vaxtlar İşərişəhər Qala qivarlalında söküntü işlərinin olması barədə social şəbəkələrdə və mediada məlumatlat dolaşırdı.

Müəllif deyir ki, "İçərişəhər" Dövlət Tarix-Memarlıq Qoruğu İdarəsinin (DTMQİ) sədri Əsgər Ələkbərov birinci vitse-prezidentə görülən işlərlə bağlı ətraflı məlumat verib, hazırda Kiçik Qala küçəsində, Qala divarları boyunca yerləşən kafe və restoranların yenidən qurulması işlərinin həyata keçirildiyini bildirib.

"Aparılan təmir-bərpa işləri Qoşa Qala divarlarına heç bir ziyan vurmamaqla yanaşı nə İçərişəhərin, nə də Qala divarlarının görünüşünə xələl gətirməyəcək və o, əvvəlki görünüşünü saxlayacaq",- İdarə sədri M.Əliyevaya belə deyib.

Müəllif bildirir ki, birinci vitse-prezident İçərişəhəri bütün Azərbaycan üçün doğma və əziz yer, "Bakının ürəyi" adlandırıb.

"Mənim yadımdadır, xatırlayıram, bir zamanlar İçərişəhər UNESCO-nun qara siyahısına salınmışdı. Çünki burada bərpa işləri aparılmırdı. Bütün bu qanunlara zidd hərəkətlər olub. O zaman məhz prezidentin göstərişi ilə İçərişəhərdə bir çox işlər, bərpa, yenidənqurma işləri aparıldı...Təbii ki, Qala divarının heç bir daşına da ziyan vurmaq olmaz və heç zaman vurulmayacaq", bunu isə M.Əliyeva İçərişəhərin qorunmasının zərurət olması ilə bağlı bildirib.

M.Əliyeva son günlər sosial şəbəkələrdə və informasiya məkanında İçərişəhərin Qala divarlarında söküntü aparılması ilə bağlı yayılanları "yalan, böhtan, qarayaxma kampaniyası" adlandırıb. "Mən bir şeyi qeyd etmək istəyirəm. Hər insan öz vicdanı və Allah qarşısında cavab verir. Ona görə mən əminəm ki, pis niyyətlə, təxribatla, nifrət hissi ilə heç vaxt yaxşı bir nəticə əldə etmək mümkün deyil", - M.Əliyeva bu məlumatları belə dəyərləndirib.

M.Əliyeva deyib ki, İçərişəhərdə tarixi və mədəni abidələrə heç bir təhlükə yoxdur, əksinə, bütün bu addımlar onların qorunmasına yönəlib.

Birinci vites-prezidentin deməsinə görə, son illər İçərişəhərdə Qala divarı üzərində aparılan bütün bərpa işlərinə bu sahədə ən aparıcı ekspertlər də cəlb olunub.

Müəllif deyir ki, M.Əliyeva İçərişəhərin qorunmalı olması, buradakı sakinlərin maraqlarının nəzərə alnması, sahibkarların da burada fəaliyyətlərini İçərişəhərin "tarixi abidə" olması səmtində qurmalı olduqları barədə tövsiyələr verib.

"Bir də onu qeyd etmək istəyirəm ki, gələcəkdə belə hallarla üzləşməmək üçün biz gərək ictimaiyyətə dolğun, geniş informasiya verək. Hətta İçərişəhərdə hansısa bir bərpa, təmir işinin aparılması nəzərdə tutulubsa, bu işləri başlamazdan əvvəl ictimaiyyətə geniş şəkildə məlumat verməliyik. Onda biz belə halların qarşısını alarıq", - M.Əliyeva bunu idarəyə bildirib.

Bu güzəşt hamıya olmasa da ...

"Yeni Müsavat" qəzetində isə "Vahid Əhmədov: "O yolla heç vaxt Qarabağa getmərəm" (https://musavat.com/news/vahid-ehmedov-hec-vaxt-o-yolla-qarabaga-getmerem_608688.html) sərlövhəli məqalə oxumaq olar.

Müəllif ölkə gündəminə aid bəzi məsələləri Milli Məclisin İqtisadi siyasət, sənaye və sahibkarlıq komitəsinin üzvü, deputat Vahid Əhmədovla dəyərləndirir.

Ölkə əhalisinə verilən qaz və elektrikə görə tətbiq olunan limitn ləğvinin mümkünlüyü barədə deputat deyir ki, Azərbaycan qaz və elektrik enerjisi, neft ixrac edən bir dövlətdir: "Ona görə də hesab edirəm ki, əhalinin həyat səviyyəsini nəzərə alaraq limitlə bağlı müəyyən güzəştlərə getmək olar. Biz parlamentdə dəfələrlə bununla bağlı məsələ qaldırmışıq, mətbuatda sözümüzü demişik".

V.Əhmədov hesab edir ki, bu güzəştlər limitin artırılması formasında da ola bilər, həm də bu güzəşt bütün əhaliyə yox, xüsusilə aztəminatlı əhali üçün nəzərdə tutula bilər. "Bölgələrdən də çoxlu şikayətlər var. Rayonda qəbulda olanda da insanlar bu məsələ ilə bağlı müraciətlər edirlər. Son iclasda Fazil Mustafa da təklif etdi ki, limit iki dəfə artırılsın. İndi hökumət oturmalıdır, ölçüb-biçməlidir, hesablama aparmalıdır. Mən belə hesab edirəm ki, bu məsələ ilə bağlı güzəştlərə getməyə ehtiyac var".

Deputat deyir ki, indiki halda elektrik enerjisi və qazın limitinin əhali üçün müəyyən qədər artırılmasına müsbət yanaşır.

Limitin ləğvi, uşaq pulunun bərpası ilə bağlı prezidentə təqdim olunmaq üçün təkliflər paketinin hazırlanmasına gəlincə, deputat bildirir ki, bu barədə təkliflər hazırlanmayıb "Amma yenə deyirəm, əgər hökumət bununla bağlı təklifləri əsaslandırılmış şəkildə cənab prezidentin masası üzərinə qoyarsa, dövlət başçısı öz tərəfindən addım atacaq. Çünki biz onu humanist insan kimi tanıyırıq, burada elə ciddi problem olmamalıdır".

V.Əhmədov islahatların hansısa təzyiqlər altında həyata keçirilməsi barədə iddilara cavab verərək bunu əsassız adlandırır və deyir ki, 2015-ci ildən sonra bank sistemində yaranmış vəziyyətdən, problemli kreditlərdən çıxış yolu ilə bağlı hələ 2017-ci ilin sonlarından iş gedirdi və bütün bu çoxtərəfli işlərin nətiəsi olaraq 2019-cu ildə 10 min dollara qədər krediti olan fiziki şəxslərin problemlərilə bağlı sənəd imzalandı.

V.Əhmədovun deməsinə görə, həmkarı Əli Məsimli ilə birgə başqa təklifləri də var, yaxın vaxtlarda onları hazırlayıb dövlət başçısına müraciət edəcəklər və təkliflər bank sistemi ilə əlaqədardır.

"İki devalvasiyadan sonra yalnız fiziki şəxslər deyil, hüquqi şəxslərin də ciddi problemləri yaranıb. Bir sıra şirkətlərin, kredit alan təşkilatların iqtisadi vəziyyəti gərginləşib, dövlətdən asılı vəziyyətə düşüblər. Bundan əlavə, ölkədə bir sıra müəssisələrin tikilməsi ilə əlaqədar təkliflərimiz var", V.Əhmədov təkliflərin mahiyyətinə belə aydınlıq gətirib.

Fermerlərin aqrar sığorta inamsızlığı

"Oxu.az"da isə "Əli Məsimli: Kəndlini aldada-aldada gedirlər" sərlövhəli məqalə (https://oxu.az/economy/309343) diqqəti çəkir.

Sayt "Aqrar sığorta haqqında" qanun layihəsinə deputat, Milli Məclisin İqtisadi siyasət, sənaye və sahibkarlıq komitəsinin üzvü Əli Məsimlinin fikirlərinə yer verib.

Ə.Məsimli bildirib ki, kəndli, fermerlər sığorta qurumlarına inanmırlar və deputat onları bu unamsızlıqda haqlı adlandırıb.

"Kəndlini aldada-aldada gedirlər. Kəndliyə, fermerə sual verirlər ki, niyə sığorta olunmursan? Deyir ki, biz sığorta şirkətinə inanmırıq. Haqlı olaraq inanmır", - Ə.Məsimli bu inamsızlığın səbəbinə belə aydınlıq gətirib.

Ə.Məsimlinin deməsinə görə, indi əsas məsələ indiyə qədər olan proseslərdən nəticə çıxararaq işlək mexanizmin qurulmasıdır.

"İşlək mexanizm qurulsa, bu qanun işləyəcək. Kəndliyə, fermerə sual verirlər ki, niyə sığorta olunmursan? Deyir ki, biz sığorta şirkətinə inanmırıq. Haqlı olaraq inanmır. Çünki onu aldada-aldada gedirlər" deyə deputat fikrini bir daha qüvvətləndirib.

Deputat hesab edir ki, bu problemlər həll olunsa, mətbuat vasitəsilə və digər üsullarla kəndlilərdə və fermerlerdə inam yaradılsa, çox yaxşı olar.

Deputat eyni zamanda sığorta şirkətlərinin də bu istiqamətdə astagəl olmalarının da səbəblərinə aydınlıq gətirib: "Sığorta şirkətindən soruşduqda ki, niyə sığorta etmirsən, cavab verir ki, risk böyükdür", - Ə.Məsimli qarşı tərəfin belə düşündüyünü və mövqeyini də bu düşüncəsinə görə qurduğunu vurğulayır.

Amma komitə üzvü bunu da vurğulayır ki, burada risklərin bölünməsi var və bu bölgüyə əsasən müəyyən hissə dövlətin, sığorta olunanın və şirkətin üzərinə düşür.

Ə.Məsimlinin deməsinə görə, yeni qanun layihəsinin işləməsi üçün aşkarlıq və ciddi nəzarət mexanizmi olması vacib məsələdir.

Deputat əlavə olaraq burada ictimai nəzarət və digər effektiv işləyən nəzarət mexanizmlərindən istifadə olunmasını xüsusi vurğulayıb.