Media-icmal 22.02.19

Xalq-iqtidar birliyi uğurların əsası kimi, Bayıl sürüşmə yamacında sakinlərin durumu, mənzillərin qeydiyyata alınması problemləri və s. bugünkü (22 fevral, 2019-cu il) medianın aparıcı mövzualrındandır.

Uğurların əsası: xalq -iqtidar birliyi

"Azərbaycan" qəzeti "Xalq-iqtidar birliyi ölkənin inkişafı üçün əsas şərtdir" sərlövhəli məqalədə Azərbaycanın inkişafının əsaslarını dəyərləndirir.

Müəllifə görə, bu uğurların təməlində düşünülmüş siyasət, sabitlik, aparılan iqtisadi islahatlar dayanır.

Müəllifin deməsinə görə, dövlət başçısının apardığı uğurlu siyasət nəticəsində bu gün neftdən asılılıq xeyli dərəcədə aşağı düşüb, ÜDM-in böyük hissəsi qeyri-neft sektorunda yaranıb və bu islahatlar beynəlxalq maliyyə qurumları tərəfindən də yüksək qiymətləndirilir.

"Reallıqlar onu göstərir ki, dünya miqyasında Azərbaycan kimi sürətlə inkişaf edən ölkə azdır. Bu inkişafın nəticəsidir ki, Azərbaycan özünün müstəqil dövlət kimi varlığını nəinki Avropaya, dünyaya sübut etmək imkanına malikdir", - müəllif ölkənin inkişaf uğurlarını belə qiymətləndirir.

Müəllifə görə, yeni yolların salınması, əhalinin maddi güzəranının yaxşılaşdırılması, torpaqlardan və digər mövcud ehtiyatlardan səmərəli istifadə etməklə hətta ucqar yaşayış məntəqələrinin də şəhər səviyyəsinə yaxınlaşdırılmasında uğurlu sosial-mədəni inkişaf yolu keçilib.

Məqalə müəllifi hesab edir ki,dövlət başçısının Beyləqan səfərində xalq-iqtidar səmimiyyəti isə bir daha onu təsdiqlədi ki, bu birliyi poza biləcək hər hansı qüvvə, yaxud ünsürlər nəinki baş qaldıra bilməz, heç onların mövcudluğuna imkan verilməz.

Müəllifə görə, avropalı diplomatlardan idman cəmiyyətlərinin aparıcı simalarına qədər hamını heyran qoyan məhz xalq-hakimiyyət vəhdəti, amal və məqsəd birliyidir.

Müəllifin bənzətməsinə görə, dünya iqtisadi, siyasi, humanitar burulğana düşmüş bir okeandır, Azərbaycan isə bu okeanın ortasında sabitlik, əmin-amanlıq, dinclik hökm sürən adadır.

Sonda isə müəllif deyir: "Doğrudan da ölkəmizin inanılmaz dərəcədə inkişafını əsaslandıran bir sıra amillərin arasında xalq-iqtidar birliyinin əsas götürülməsi təsadüfi deyil".

Bir az aşağıda tikilmiş binada kv.metri 3500-ə satırlar

"Yeni Müsavat" da isə "Bayıl ərazisində qarışıq durum: köçürülmə niyə yubanır ?" sərlövhəli məqalə diqqəti çəkir.

Müəllif Bayıl yamacında sürüşmə zonasında yaşayan 27 məcburi köçkün ailəsinin problemlərinin hələ də həll olunmamasını gündəmin müzakirəsinə daşıyır.

Müəllifin deməsinə görə, problemin mahiyyəti bundan ibarətdir ki, buradan köçürüləcək ailələrin müəyyən hissəsinə özlərinə ev ala bilmələri üçün kompensasiya verilməsi nəzərdə tutulur, amma 27 ailə məcburi köckün ailəsi olduğu üçün onlara Bakının Qobu kəndində ev verilir.

Müəllifin deməsinə görə, 27 məcburi köçkün ailəsi bundan narazıdır, bir dəfə aksiya keçiriblər, indi isə Bakaı Şəhər İcra Hakimiyyəti və Nazirlər Kabinetinin məsulları ilə görüşmək istəyirlər.

Məqalə müəllifi deyir ki, heç kompensasiya verilməsi nəzərdə tutulan ailələr də vəziyyətdən razı deyillər, belə ki, hər kvadratmetrə 700 manat verilməsini az sayırlar.

Yazı müəllifinin deməsinə görə, fevralın 21-də Səbayel Rayon İcra Hakimiyyətinin başçısı onlarla görüməli idi, görüşə gəlməyib.

Müəllif deyir ki, sakin Elməddin Muradlı sakinlərin məsələ ilə bağlı ölkə prezidentinə, Nazirlər Kabinetinə rəsmi məktub yazdıqlarını bildirib: "Əgər növbəti həftəyə qədər cavab olmasa, sakinlər Nazirlər Kabinetinə getməyi düşünürlər. Həmçinin Bakı Şəhər İcra Hakimiyyətinin başçısı ilə də görüş planlaşdırılır. Çünki heç kim camaata dəqiq bir cavab demir. Bu isə insanlarda narazılıq yaradır. Söz verirlər, əməli iş isə yoxdur".

Müəllif sakin E.Muradlıya istinadən bildirir ki, məcburi köçkün olmayan ailələrlə gizlin görüşlər aparırlar və ayrı-seçkilik salınması camaatı narahat edən məsələdir.

E.Muradlının deməsinə görə, kirayə pulu verilmədiyi üçün kirayə ev tuta bilmirlər, qayıdıb şəraiti olmayan tikdikləri evdə yaşadıqları üçün onlara kirayə pulu verilməyəciyini bildirirlər: "Adam bunların məsuliyyətsizliyindən bir aylıq pul ödəyib, dediklərinə baxın. Nə kommunal xətləri bərpa edirlər, nə də normal kirayə pulu verirlər. İnsanlarla oyun oynayıb, onları ələ salırlar".

Sakinlərin sözlərinə görə, "Azərişıq"dan nümayəndələr gəlib işıqları kəsəcəklərini bildiriblər.

Sakinlər həmçinin buradan köçürülmələri barədə rəsmi qərarın olub- olmadığını da bilmirlər və köçürüləcəklərilə bağlı Səbail Rayon İcra Hakimiyyəti təmsilçilərinin sözlərini "camaatın arasında nəbzyoxlama prosesi" adlandırırlar.

"Yaşayıb, görərik" reallığı

"Novoye Vremya" qəzetində isə "Qeydə alınmayan çoxmərtəbəli binalardan danışıqlar özbaşına tikilmiş evləri xatırladır" sərlövhəli məqalə oxumaq olar.

Müəllif ölkədə artıq tikilmiş olan amma hələ də istismara verilməyən çoxmərtəbəli binaların qeydə alınması ilə bağlı prezident fərmanının hələ də gündəmin müzakirəsi olduğunu bildirir.

Rəsmi rəqəmlərə istinad edən müəllif burada söhbətin 400 binadan və bu binalarda yaşayan 10 minə yaxın insanın taleyindən getdiyini vurğulayır və belə vəziyyəti özünü hüquqi dövlət üçün absurd adlandırır.

Məqalə müəllifi bunu da yada salır ki, fərman 2019-cu il yanvarın 1-nə kimi tikilmiş binaları əhatə edir və təhlükəsizlik tələbləri pozulmamış belə binaların qeydə alınması 2020-ci il yanvarın 1-nə kimi həllini tapmalıdır.

Müəllifə görə, burada zahirən hər şey-yerli-yerində görünür, amma bəzi rəsmilərin də təsdiq etdiyi kimi narahatlıq doğuran nöqtə budur ki, bu sahədə hazırkı status-kvo-nun saxlanmasında maraqlı olan xeyli şəxs var: "Həmin məmurlar heç yerə getməyiblər və onların maraqları "yox"a çıxmayıb, odur ki, onların prezidentin bu fərmanını sakitcə sabotaj edə bilmələri də istisna deyil", müəllif bu şəxslərin mövqeyini belə ifadə edir.

Məqalə müəllifi eyni zamanda 10 illik tarixi olan və yarım milyondan çox insanı əhatə edən, qanunsuz sayılan fərdi evlərin tikintisi məsələsini də yada salır və deyir ki, bu məsələnin tənzimlənməsi üçün 2011-ci ildə dövlət komissiyası yaradılsa da hələ də həllini tapmayıb.

Müəllifin deməsinə görə, o zaman bu evləri 1950-ci ilə qədər, 1975-ci ilə qədər, 2000 və 2012-ci ilə qədər olmaqla 4 kateqoriyaya böldülər, məsələ Milli Məclisə çıxarıldı və ... bu məsələ də həllini tapmadı və daha heç yada da salmırlar.

"Problemlərsə yerindədir və əminliklə demək olar ki, bələdiyyələrdən başlamış müxtəlif səviyyəli məmurlar onun saxlanılmasında maraqlıdırlar. Belə ki, bürokratik aparatın ona sərf etdiyi halda birincisi problem yaratmaq, daha sonra öz maralqlarını təmin emək naminə onun həllini tormozlamaq üçün əlində kifayət qədər vasitə var".

Amma son olaraq müəllif belə ehtimal da irəli sürür ki, ola bilər zəmanə dəyişib, prezidentin bu fərmanı vətəndaşların maraqları baxımından yerinə yetirilə biləcək, bunu da yaşayıb görərik.

Rəy yaz

Cəmiyyət

Чего добивается Россия в Армении, и что обещали Еревану на трехсторонней встрече в Брюсселе? - беседа с Тиграном Хзмаляном в программе "Çətin sual"



InvestPro Azerbaijan Baku & Turkiye Istanbul 2024 – two conferences in one shot


Bizi sosial şəbəkələrdə izləyin

Xəbər lenti