Media-icmal 22.05.19

Suvarma sularına tələbatın artması, standartlaşdırma ilə bağlı vəziyyət, avtomobil bazarındakı durum və s. məsələlər bugünkü (22 may, 2019-cu il) medianın aparıcı mövzularındandır.

Suvarma sularına artan tələbat

"Azərbaycan" qəzeti "Yeni əkin sahələri suya tələbatı artırıb" sərlövhəli məqalədə Balakən rayonunda suvarma suyuna tələbatın artmasını dəyərləndirir.

Müəllif deyir ki, Balakən rayonunda əkin dövriyyəsinə yeni torpaq sahələrinin cəlb olunması suvarma suyuna tələbatı artırıb və rayonun Suvarma Sistemləri İdarəsinin rəisi Ruslan Poladova istinadən balansda 6822 hektar suvarılan torpaq sahəsinin olduğunu bildirir: "Sahələr əsasən kanallar hesabına suvarılır. Onların ümumi uzunluğu 203,8 kilometrdir. 39,9 kilometr təsərrüfatlararası, qalanı təsərrüfatdaxili kanallardır. Kanallar mənbəyini əsasən dağ çaylarından - Katex, Balakən, Mazımdan götürür", - idarə rəisi bildirib.

Müəllif deyir ki, ötən dövrdə suvarma kanallarında 443 min kubmetr təmizləmə işləri aparılıb, Mazım-Tuqay, Balakən-Tuqay suvarma kanalları, eləcə də Talalar, Katex, Püştətala, İtitala, Şambul və Meşəşambul kəndlərinin ərazilərindəki kanallar tam təmizlənib. Balakənçayda Mahamalar kəndinin sel sularından müdafiəsi üçün qurulmuş daş-beton bəndlərdə əsaslı təmir işləri görülüb.

Müəllifin deməsinə görə, Qanıx çayının yatağını rayon ərazisinə dəyişməsi prosesinin qarşısının alınması məqsədilə ümumilikdə 2445 paqonometr məsafədə sahilbərkitmə işlərinin görülməsi nəzərdə tutulub, keçən il 330 paqonometr iş görülüb və həmin işlər cari ildə davam etdirilir.

Məqalədə vurğulanır ki, çaylarda daşqın təhlükəsi hər zaman var, kənd sakinlərinin şəxsi təsərrüfatları, pay torpaqları bundan zərər çəkir, belə halların qarşısını almaq üçün davamlı tədbirlərin görülməsinə ehtiyac yaranır.

Yazı müəllifi deyir ki, Balakənin 1450 hektar suvarılan torpaq sahəsi Şəki Artezian və Subartezian Quyularının İstismarı İdarəsinin balansındadır, bu idarə rayonda 132 quyu istismar edir ki, onlardan 70-i artezian, 62-i subartezian quyularıdır, yeni quyular da qazılır və belə quyulara Qazma, Şambul, Qaysa, Püştətala, İtitala və digər kəndlərdə ehtiyac çoxdur.

Müəllif isə deyir ki, əkin sahələrinin çoxalması rayonda suvarmaya tələbatı daha da artırıb, əvvəllər bir-iki dəfə suvarılan sahələrin indi 3-4 dəfə, quraqlıq olanda daha çox suvarılmasına ehtiyac yaranıb, həmin tələbatı ödəmək üçün Qabaqçöl kəndində İnterçay üzərində böyük suqəbuledicbi qurulub və bunun sayəsində 1300 hektar torpağa su veriləcək.

Standartlaşdırma işinə kim baxır- sual?

"Yeni Sabah.az"da isə "Nazirlik bu dəfə lap "gül" vurub"- ekspert" sərlövhəli məqalə oxumaq olar.

Müəllif ölkədə satndartlaşdırma sahəsindəki vəziyyəti informasiya kommuniksiya texnologiyaları üzrə ekspert, Azərbaycan İnternet Forum prezidenti Osman Gündüzlə müzakirə edir.

O.Gündüz Azərbaycanda standartlaşdırma ilə məşğul olan qurumun olmadığını deyərək vaxtilə fəaliyyət göstərən Standartlaşdırma, Patent Komitəsinin ləğvinə işarə edir.

"Azərbaycanda standartlaşdırma qurumu yoxdur, standartlaşdırmanın keçmiş işçiləri evlərində dincəlirlər. Amma Nəqliyyat, Rabitə və Yüksək Texnologiyalar Nazirliyi (NRYTN) mövzu ilə bağlı tədbir keçirib. Bunu isə ekspert O.Gündüz "Yeni Sabah"a bildirib.

O.Gündüz nazilriyin bu yaxınlarda ki, Ümumdünya İnformasiya Cəmiyyəti Günü ilə bağlı tədbir keçirdiyini, amma bu sayaq tədbirlərin mənasızlığını, bəhs edilən sahə üzrə təcrübi fəaliyyətə hər hansı təsir göstərmədiyini vurğulayır: "Son zamanlar qurumun məsul şəxsləri tərəfindən tez-tez bəsit və mənasız, dar çərçivədə, maraqlı tərəfləri cəlb etmədən tədbirlərin təşkil olunması etməsi heç kimə sirr deyil, amma baxıram ki, bu dəfə lap "gül" vurublar".

Ekspert deyir ki, bu il Ümumdünya İnformasiya Cəmiyyəti Gününün mövzusu "Standartlaşdırmada fərqliliyin aradan qaldırılması" idi, mövzunu əvvəlcədən bildiyi üçün qabaqcadan düşünürmüş ki, nəhayət, bir il davam edən problemə münasibət bildiriləcək.

"Problem isə ondan ibarətdir ki, indiki anda ölkədə standartlaşdırma səlahiyyətlərinə malik olan qurum faktiki olaraq mövcud deyil və nə qədər qəribə olsa da, bir ildir ki, vəziyyət beləcə də davam etməkdədir".

Müəllif vurğulayır ki, 2018-ci il aprelin 20-də "İstehlak bazarına nəzarət, standartlaşdırma, metrologiya və əqli mülkiyyət hüquqları obyektlərinin mühafizəsi sahəsində idarəetmənin təkmilləşdirilməsi ilə bağlı tədbirlər haqqında" prezident Fərmanı ilə Standartlaşdırma, Metrologiya və Patent üzrə Dövlət Komitəsi ləğv edilib.

Yazı müəllifi xatırladır ki, standartlaşma ilə bağlı səlahiyyətlər yeni yaranan Antiinhisar və İstehlak Bazarına Nəzarət Dövlət Agentliyinə verilib, amma bu Dövlət Agentliyinin indiyədək nə strukturu, nə də Əsasnaməsi təsdiq edilib, qurum faktiki olaraq köhnə Əsasnamə və köhnə struktur əsasında fəaliyyət göstərir.

Müəllif deyir ki, standartlaşmanın keçmiş işçiləri isə 1 ildir ki evlərində oturub yeni strukturun yaradılmasını gözləyirlər.

Müəllif deyir ki, NRYTN-in Ümumdünya İnformasiya Cəmiyyəti Günü ilə bağlı keçirdiyi tədbirdə isə bir ildir davam edən problemlə bağlı isə danışılmayıb və bununla bağlı hər hansı açıqlama verilməyib.

Avtomobil adına gələn metal-tullantı

"Modern.az"da isə "Azərbaycanda avtomobil parkı: Xəstəlik, ölüm mənbəyi... - "Leş maşınlar"ın axını" sərlövhəli məqalə diqqəti çəkir.

Müəllif Azərbaycanın avtomobil bazasındakı durumu təhlil etməyə səy göstərir.

Müəllif deyir ki, bütün dünyada olduğu kimi, Azərbaycanda da avtomobillərin sayı artır, avtomobilləşmənin artmasının müsbət tərəfləri olduğu kimi, mənfi tərəfləri də var.

Yazı müəllifi hesab edir ki, bu məsələnin həllində ən önəmli addımlardan biri avtomobil parkının yenilənməsidir, belə ki, bununla bağlı dünyada tələblər sərtləşdirilir.

Azərbaycana gəlincə, müəllif ekspertlərə istinadən bildirir ki, bununla bağlı müəyyən addımlar atılsa da, yetərli deyil.

Müəllifin deməsinə görə, Azərbaycanda dövriyyəyə buraxılan avtomobil vasitələrinə atmosferə zərərlərə görə "avro-4" ekoloji normaları tətbiq edilir, beləliklə 2014-cü il aprelin 1-dən ölkəyə idxal olunan nəqliyyat vasitələrinin buraxılış illəri ilə yanaşı, "avro-4 ekoloji normalara uyğun olması da əsas götürülür.

Yazı müəllifi vurğulayır ki, ölkəyə yeni minik avromobillərinin gətirilməsi isə azalır, belə ki, 2015-ci ildə ölkəyə 20801 yeni avtomobil alınmışdısa, bu rəqəm 2018-ci ildə 9782-ə düşüb, "ikinci əl" satışları isə 2015-ci ildə 1475 ədəd olubsa, 2018-ci ildə bu rəqəm sürətlə artaraq 16495-ə çatıb.

Müəllifə görə, daha təhlükəli bir məsələ ölkəyə gətirilən dizellə işləyən avtomobillərdir, Avropa ölkələrində belə avtomobillərdən istifadə şərtləri ağırlaşdırılır, bu halda bu avtomobillər Azərbaycan kimi ölkələrin bazarına ayaq açır.

"2018-ci ildə Azərbaycana 7845 avtomobil idxal olunub, bu avtomobillərdən 40 faizinin orta idxal dəyəri cəmi 4,601 dollar təşkil edir ki, həmin qiymətə ancaq təhlükə mənbəyi olan "metal tullantı" almaq mümkündür" deyə müəllif bu sahədə durumu diqqətə çatdırır.

Müəllif deyir ki, "106.3 radiosu"nda "Masterclass" verilişinin aparıcısı Raqif Raufoğlu "modern.az"a bildirir ki, hazırda xaricdən gətirilən maşınlar ölkədə təkrar bazarı köhnəldir: "Çünki yeni avtomobillərin qiymətləri bahadır. Yeni avtomobillərin qiyməti bahadır deyə, biz təkrar köhnə avtomobillərə qayıdırıq. Kredit şərtləri sərf eləmir deyə, hamı gedib köhnə avtomobil gətirməyə çalşır. O mənada avtomobil parkımız köhnəlməyə doğru gedir".

R.Raufoğlu deyir ki, Azərbaycanda daxili bazarın yenilənməsi üçün yeni avtomobillərə güzəşt etmək, çox ciddi addımlar lazımdır ki, köhnə park yığışdırılsın.

Ekspert hesab edir ki, ən böyük problem odur ki, "Avro 4" tələblərinə uyğun maşın tələb edilir, amma öncə yanacaq o tələbə cavab verməlidir ki, həmin "Avro-4" standartlarına uyğun avtomobilləri gətirmək mümkün olsun.

"Acınacaqlı durum odur ki, bu gün dünyanın istənilən ölkəsindən Gürcüstana el dili ilə desək "leş" maşınlar gətirilir. Ondan da acınacaqlısı odur ki, insana qənim kəsilən bu avtomobillər Azərbaycana daşınır, demək olar ki, belə avtomobillər Gürcüstandan Azərbaycana "axır"" R.Raufoğlu belə deyir.