Media-icmal 22.05.21

Azərbaycanla Ermənistan arasında sülh sazişi imzalana bilməsi mümkünlüyü, korrupsiya və rüşvətə görə həbslərin səbəbləri, Bakıdan cənub istiqamətində Xəzərə çıxış olan sonuncu zolağın hasarlanması və s. məsələlər medianın aparıcı mövzuları sırasındadır... 

“Yenisabah.az” saytında “İstəmirlərsə, imzalamasınlar, blokadada canları çıxsın!” sərlövhəli məqalədə Azərbaycanla Ermənistan arasında mümkün sülh sazişi imzalana bilməsi dəyərləndirilir.

Məqalədə sülh sazişinin ilk növbədə Ermənistan və Rusiyanın işinə yaradığı vurğulanır. Eyni zamanda, açılması nəzərdə tutulan “Mehri dəhlizi”nin türk dünyasını birləşdirəcəyi barədə deyimlər doğru sayılmır. 

Məqalədə iddia edilir ki, ilk növbədə Ermənistanın, Rusiyanın xeyrinə olan bir layihəni şişirdib Azərbaycan və Türkiyənin qələbəsi elan edirlər.

“Demirəm ki, lehimizə deyil, sadəcə birinci növbədə bu dəhliz Ermənistana lazımdır ki, blokadadan çıxsın. İstəmirlərsə, sülh sazişini imzalamasınlar, canları da blokadada çıxsın”, deyə  “Mehri dəhlizi” məsələsinə dəyərləndirmə verilir.

Ermənistanın sülh sazişi imzalaması üçün Moskva Ermənistana təzyiq göstərir, Rusiya ilə Azərbaycanın əsas fikri “Mehri dəhlizi”nin açılmasıdır. Çünki, Ermənistanda iyun ayında keçirilməsi gözlənilən parlament seçkilərinin nəticələrini 100% proqnozlaşdırmaq mümkün deyil: “... bu səbəblə ola bilər ki, seçkiyə qədərki müddətdə sülh sazişinin müddəalarını razılaşdırıb, sərhədlərin demarkasiyasını başa çatdırıb həmin sənədi imzalamaq mümkün olsun. Bununla bağlı Paşinyanda siyasi iradə hiss edilir”, deyə vurğulanır.    

Məqalədə deyilir ki, Paşinyan seçkidə qalib gələ bilmədiyi halda Moskva da proseslərə nəzarət imkanını itirə bilər, bu isə Azərbaycanı Ermənistanla mübarizənin yeni tarixini başlatmağa vadar edəcək. 

“Azpolitika.info” saytında isə “Məsələ çox ciddidir, heç kimə güzəşt edilməyəcək, onlar öyrəşiblər, əməllərindən əl çəkmək istəmirlər...” sərlövhəli məqalədə son günlərdə korrupsiya və rüşvət faktına görə Bakı Baş Gömrük İdarəsində aparılmış həbslər fonunda qanunçuluğa riayət olunması məsələsi deputat Vahid Əhmədovla dəyərləndirilir.

Deputat hesab edir ki, korrupsiya millət və dövlət üçün təhlükə yaradır, ondan xilas olmaq lazımdır. Amma istər icra başçıları, istər mərkəzi icra orqanları və s. öz işindədir, bu qururmların əməkdaşlarının maaşları artırılsa da, bəziləri “qara əməl”lərindən əl çəkmirlər: “Görünən budur ki, onlar öyrəşiblər və bu əməllərindən əl çəkmək istəmirlər. Lakin məsələ həllini tapmalı, kimliyindən asılı olmadan belə hərəkətlərə yol verənlər qanun qarşısında cavab verməlidirilər”, deputat belə deyir.  

Deputata görə, məsələ çox ciddidir, bu vaxta qədər nə olub, olmayıbsa bunların da haqq-hesabı çəkiləcək, xalqa xidmət üçün dövlət qulluğunda olanlara şərait yaradılsa da, vəzifəli məmurların həbsi bitmək bilmir.

Deputat deyir ki, bu şəkildə fəaliyyət həm Ümumi Daxili Məhsula ziyan vurur, həm də iqtisadiyyatı “kölgə” altında saxlayır, odur ki, komitə ilk növbədə şəffaflığı təmin etməlidir.  

“Müsavat.com” saytı isə “Bibiheybətdə dənizi torpaqla dolduran kimdir? Xəzər yenə hasarlanır, insanların son nəfəsliyi də qapadılır” sərlövhəli məqalədə haqqında bəhs edilən sosial problemi müzakirə müstəvisinə gətirir.

Məqalədə vurğulanır ki, ötən illərdə məmur oliqarxlar Səngəçaldan Bibiheybət məscidinə, Zirədən Novxanıya qədər Xəzəri hasarlayıblar. Cənub istiqamətində Bakıya gəldikdə kiçik bir ərazi qalmışdı ki, vətəndaşlar oradan doğma Xəzərin sahilinə sərbəst daxil ola bilirdilər, artıq onu da bağlayıblar.

Deyilir ki, bu qədər islahatlara, qanunsuzluğa görə həbslərə baxmayaraq, işbazlar yenə də Xəzəri torpaqlayıb doldurmaqdan çəkinmirlər. Bibiheybət məscidinin arxasında çox kiçik bir ərazi qalmışdı ki, insanlar ora gedib balıq tutur, hava alırdılar, dincəlirdilər, artıq neçə gündür həmin ərazini də hasarlayırlar.

Müəllifə görə, həmin ərazini alan şəxs sahil mühafizə zolağını torpaqla dolduraraq dənizin içinə girib, Xəzər Dəniz Gəmiçiliyi İdarəsinin ərazisini də zəbt edir.

Bir qrup vətəndaş isə bu özbaşınalıqla bağlı ölkə rəhbərliyinə müraciət ünvanlamağı qərara alıb. Ölkə qanunvericiliyinə görə, sahildən 150 metr məsafədə dəniz sahili çəpərlənə, özəlləşdirilə bilməz, amma bəziləri dənizin özünü torpaqla doldurur.