Media-icmal 22.08.20

Pandemiya ilə mübarizə, tikintidə bədbəxt hadisələrin səbəbləri,  toylara icazə verilməsinə baxış və s. məsələlər medianın aparıcı mövzuları sırasındadır. 

Pandemiya hələlik buralarda

“Azərbaycan” qəzeti  “Pandemiya ilə mübarizədə yeni mərhələ başlayır” sərlövhəli məqalədə koronavirus pandemiyasına qarşı mübarizəni dəyərləndirir.

Müəllif tibb ekspertlərinə istinadən deyir ki,  COVİD-19 pandemiyasının yaxın vaxtlarda bitəcəyi görünmür, dünya kimi Azərbaycanda da bu virusa qarşı mübarizə davam edir, son zamanlar virusa yoluxma sayında müsbət tendensiyaya nail olunub və sərt karantin rejimindən yumşaldılmalara doğru addımlar atılır.

Aidiyyatı qurumlar sərt karantin rejiminin mövcud olan şəhər və rayonlarda, eləcə də ölkə üzrə bəzi yumşalmaların tətbiqinə qərar verib.

Avqustun 5-dən SMS icazə sistemi ləğv edilib, çimərliklər açılıb, bu ayın 10-dan baəzi sahələr fəaliyyətə başlayıb, iri ticarət mərkəzləri və "Mall”lardan başqa qeyri-ərzaq məhsullarının satışı ilə məşğul olan mağazalar açılıb və s.

Amma hələlik təhsil məsələsinin ənənəvi, yoxsa on-layn formatda keçiriləcəyi məlum deyil, yeni tədris ili ilə bağlı qəti qərar verilməsə də dərslərin pandemiya şərtlərinə uyğunlaşdırılaraq tədris olunacağı gözlənilir.

Məhərrəmlik ayı başlasa da bu ayda dini təziyələrin keçirilməsinə icazə verilmədi: “Məhərrəm ayında məscid və ziyarətgahlarda təziyə mərasimlərinin qadağan edilməsi koronavirus infeksiyasının yayılmasının qarşısını almağa xidmət edir”, - müəllif bildirir.

Ümumdünya Səhiyyə Təşkilatının Azərbaycan nümayəndəliyinin rəhbəri Hande Harmancı məlumat verib ki, koronavirus ən azı 1-2 il, bəlkə də daha çox davam edərək: “Peyvəndin tapılması üçün ümid var, ancaq hələ ki ortada sübutlar yoxdur. Peyvənd tapılsa belə, hər kəsə çatması uzun vaxt tələb edə bilər”.

Tikinti meydanlarında nələrə əməl olunmur?

“Yenisabah.az”  “Bir tikə çörəyə qurban gedənlər...” sərlövhəli məqalədə istehsalat, xüsusilə tikinti sahəsində baş verən bədbəxt hadisələr xəsarətləri təhlükəsizlik eksperti Elməddin Nurəliyevlə müzakirə olunur.

Müəllif deyir ki, tikinti sahəsində çalışanlar hər an təhlükə ilə qarşılaşırlar və təəssüflər olsun ki, tikintidə təhlükəsizlik qaydalarına riayət edilmir: “Hər il Azərbaycanda 100-dən çox istehsalat qəzası baş verir” deyən müəllif qəzalardan qorunmağın yolları barədə ekspertlə müzakirə aparır.

Ekspertə görə, ilk növbədə işçilərlə əmək müqaviləsi bağlanmalıdır: Bir çox problemlərin yaranmasının əsas səbəbi ustalarla və ya fəhlələrlə əmək müqaviləsinin bağlanmamasıdır.

İşçilər iş yerlərində, tikintidə işləyərkən qoruyucu vasitələrlə təmin olunmalıdırlar: “Sahibkarların da vəzifə öhdəliyi və borcudur ki, işçilərin təhlükəsizliyini tam qorusun və onların təhlükəsizliyi üçün lazım olan ləvazimatlarla onları təmin etsin", - ekspert bunu bildirir.

Yazıda vurğulanır ki, müşahidələr zamanı hündürlükdə çalışan fəhlələrin  qoruyucu kəmərləri, başlrında isə kaskaları olmadığı, ayaqlarında rezin çəkmə əvəzinə, gündəlik həyatda geydikləri adi ayaqqabların olması özünü göstərib.

Müəllif bu mənzərənin özünü potensial təhlükə sayaraq iş yerlərində bədbəxt hadisələrin baş verməsini bu laqeydliyin nəticəsi adlandırır.

Bundan irəli gələrək müəllif işçilər üçün təhlükəsiz əmək şəraitinin yaradılmasını  çox vacib hesab edir.

Toylara icazə verilsinmi?

“Yeniavaz.com” isə “Belə bir şəraitdə toyları keçirmək lazım deyil...” sərlövhəli məqalədə isə müəllif toyların keçirilib- keçirilməməsi barədə Milli Məclisin İqtisadi siyasət, sənaye və sahibkarlıq komitəsinin üzvü, deputat Vahid Əhmədovla söhbətləşir.

Deputat V.Əhmədov toyların keçirilməsi ilə bağlı məsələni çox vacib məsələ kimi dəyərləndirir və hesab edir ki, Nazirlər Kabineti yanında Operativ Qərargah bununla əlaqədar öz qərarını verməlidir.

V.Əhmədov heab edir ki, toyların keçirilməsinə müəyyən şərtlər daxilində icazə verilməlidir: “Belə ki, insanlar karantin qaydalarına əməl etməli, tibbi maskadan istifadə etməli və ara məsafəsini qorumalıdır. Toyda iştirakla bağlı müəyyən say həddi tətbiq edilməlidir".

Vahid Əhmədov son günlər sosial şəbəkələrdə yayılan toy görüntülərinə də münasibət bildirib: “Bəzi şəxslər var ki, 1-2 ildir ki, nişanlıdır. Elə məqam gəlir çatır ki, onlar bu toyu etmək istəyirlər. Bunu qınamaq da olmur, Hesab edirəm ki, toyların keçirilməsinə icazə vermək lazımdır”, - deputat mövqeyini bildirir”,

Onun fikrincə, hazırda toyların keçirilməsi müəyyən problemlər yarada, xəstəliyin artmasına səbəb ola bilər: “Ancaq hazırda Operativ Qərargah tərəfindən toyların keçirilməsi qadağan edilib. Belə bir şəraitdə toyları keçirmək lazım deyil. Hər bir şəxs müəyyən olunan qaydalara əməl etməlidir”, - V.Əhmədov qeyd edib.

Xatırladaq ki, bu günlərdə Milli Elmlər Akademiyasının prezdienti Ramiz Mehdiyev nəvəsinə toy edib, bu media və sosial şəbəkələrdə müzakirələrə səbəb olub. Pandemiya ilə bağlı ölkədə toylara qadağa qoyulub.