Media-icmal 23.02.21

Azərbaycan mediası ölkənin aktual problemlərini müzakirə edir. Belə ki, aviabiletlərin bahalaşması, rus keşişin Qarabağda erməni separatçıların yürüşündə iştirak etməsi, “ağıllı kənd” və “ağıllı şəhər” layihəsi və s. medianın aparıcı mövzuları sırasındadır...       

“Moderator.az” saytı “Biletin qiymətləri kəskin artdı: 350 manatdan 800 manata...” sərlövhəli məqalədə avia biletlərin bahalaşmasının səbəbləri araşdırılır.

Müəllif bu düşüncədədir ki, dünyada bütün istiqamətlər üzrə aviabiletlərin bahalaşmasının səbəbi COVİD-19 pandemiyasıdır.

Müəllif əlavə edir ki, son bir il ərzində, demək olar ki, bütün aviaşirkətlər biletlərin qiymətlərini qaldırıblar və hazırda ötən illə müqayisədə 50 -70 faiz bahalaşma var.

Turizm üzrə ekspert Elgün Babayev də hesab edir ki, bahalaşmaya səbəb pandemiya ilə bağlı aviaşirkətlərin ziyana düşməsidir: “Bu müddət ərzində ləğv edilmiş səfər biletləri üzrə ödənişlərin qaytarılması, təyyarələrə texiki qulluq və s. personal xərcləri qiymətlərin bahalaşmasına səbəb olub. Məhz bu səbəbdən bahalaşma ölkəmizdən də yan keçməyib. Bakıdan hazırda uçuş həyata keçirilən bütün istiqamətlər üzrə qiymətlər artıb.

Ekspertə görə, bütün dünyada dövlət sərhədləri tam açıldıqdan, müntəzəm uçuşlar bərpa edildikdən sonra qiymətlərin tədricən enəcəyi gözlənilir.

Ekspert deyir ki, aviaşirkətlərin ziyanı çox olduğundan qiymətlər pandemiyadan əvvəlki səviyyədə olmaya da bilər.

Bir istiqamətə alınan bilet əvvəl maksimum 350 manat idi isə, indi bu qiymət 800 manatadır.

Xatırladaq ki, 2019-cu ilin dekabrından dünyada koronavirus infeksiyası yayılmağa başlayıb, İndiyə kimi dünyada bu virusa yoluxanların sayı 110 milyonu keçib. Bu xəstəlikdən ölənlərin sayı 2 429 822, sağalanların sayı isə 84 865 039 nəfərdir. Dünya ölkələrinin avia şirkətləri bu səbəb üzündən artıq bir ildən çoxdur ki, müntəzəm uçuşları dayandırıblar.

“Yenisabah.az” saytı isə “Bu, Rusiya dövlətinin erməni separatçılarına dəstəyidir – deputat” sərlövhəli məqalədə rus keşişinin Xankəndində separatçı ermənilərin siyasi aksiyasında iştirakından bəhs edir. 

Məsələ isə belədir, 1988-ci il fevralın 20-də “Dağlıq Qarabağ Muxtar Vilayəti Ermənistanın tərkibinə qatımaq barədə qərar qəbul etdi. Bu tarixdə hər il yürüş keçirirlər. Bu il də elə olub. Amma maraqlı budur ki, bu il rus keşişi də mitinq iştirakçılarından olub.

“Bu, təkcə rus sülhməramlılarının yox, bütövlükdə Rusiya dövlətinin erməni separatçılarına açıq dəstəyidir. Çünki keşiş oraya özbaşına gəlmir, onu göndərənlər var. Tarixdə belə bir həqiqət var ki, xristian dünyasında bünövrədən dövləti yaradan və idarə edənlər kilsələr olub. Bu gün də o proses davam edir, erməni keşişləri bütün dünya kilsələrinə şüvən qaldırıb hay-haray salırlar. “Qeyri-xristianlar bizi qırırlar, məhv edirlər, yaşamağa qoymurlar, bizə kömək edin deyirlər”. Bunu isə Milli Məclisin Xocalıdan seçilən deputatı Elman Məmmədov bildirib.

E.Mmmədov 1992-ci il fevralın 25-də Xocalı qətliyamında 366-cı rus  polkunun azərbaycanlılara tutulan divanda iştirakını yada salır və bu xəttin indi də davam etdiyini bildirir. 

“Bizimyolinfo.az” saytı “Ağıllı kənd” layihəsi: “Hökumət özü də nəyi nəzərdə tutduğunu bilmir” sərlövhəli məqalədə müəllif işğaldan azad edilmiş ərazilərdə “ağıllı kənd” və “ağıllı şəhər” layihələrini ekspert Rəşad Həsənovla dəyərləndirir.

Müəllif deyir ki, bu salınacaq “ağıllı kənd” və ağıllı şəhər” layihələri adlarından tutmuş, burada nəyin hədəf olması, bunun nə qədər vəsait tələb etməsi kimi suallara cavab istəyir.

Ekspert R.Həsənova görə, bu layihələrin icrasına ehtiyac var, lakin burada ifrata gedilərsə, bu, əlavə vəsait itkisinə gətirib çıxara bilər.

R.Həsənov vurğulayır ki, hələ smart layihələrin Bakıda tətbiqində tam uğur əldə olunmayıb. Bu mənada söhbət kəndlərdən, xüsusilə də ucqar regionlardan gedirsə, insanların məlumatlılıq səviyyəsinin, istifadə oluna bilmə məsələsinin geniş şəkildə təhlilə ehtiyacı var.

İqtisadçı yada salır ki, Bakıda Nəqliyyatın İntellektual İdarəetmə mexanizmi yaradılmışdı. Bu sistem yararlı olmadı və işləmədi, nəticədə ölkədə bu layihə çərçivəsində kifayət qədər böyük itkilər müşahidə edildi. İndi bu itkilərə yol verməmək üçün hökumət mümkün qədər əlçatan, ağılabatan smartlaşdırmaya getməlidir.

Ekspertə görə, “ağıllı kənd” layihəsinin azad olunmuş torpaqlarda tətbiqində iki əsas məsələ var: Birincisi, mövcud infrastrukturların yenilənməsi daha xərcli olur və baha başa gəlir. Amma tamamilə dağıdılmış ərazilərdə sıfırdan qurulması, az xərclə başa gələn məsələdir. Böyük ehtimalla, məhz bu nəzərdə tutulur: “Mən əmin deyiləm ki, hökumət özü smart kənd, şəhər dedikdə nəyi nəzərdə tutduğunu bilir. Böyük ehtimalla bu, sadəcə, bir ideyadır və növbəti illərdə bunun araşdırılması qarşıya qoyulan hədəflərdən biridir”.