Media-icmal 23.04.21

“Yenisabah.az” saytı “İşdə “tumarlanan“ katibələr - ekspert nələr dedi?” (https://yenisabah.az/isde-tumarlanan-katibeler-ekspert-neler-dedi) sərlövhəli məqalədə “Təmiz Dünya" Qadınlara Yardım İctimai Birliyinin rəhbəri Mehriban Zeynalova iş yerlərində xanım əməkdaşlara seksual qısnamalar barədə danışır.

Onun deməsinə görə, vəzıfəli şəxslər tərəfindən təkcə katibələrə deyil, orada çalışan qadınlara qarşı seksual qısnamalar var, amma bununla bağlı heç bir müraciət yoxdur, səbəb də budur ki, qadınlar iş yerini itirmək istəmirlər.

Müəllif  deyir ki, ötən gün sosial şəbəkələrdə yayılan Milli Məclisin keçmiş deputatı, Yenı Azərbaycan Partiyasının Veteranlar Şurasının üzvü Hüseynbala Mirələmovun videosu geniş müzakirələrə səbəb olmaqla, həm də bu məsələni aktuallaşdırıb.

Mehriban Zeynalova iddia edir ki, katibə işləyən qadınların çoxu məhz belə halla üzləşir və bunun səbəblərini izah edir.

Birlik sədri iddia edir ki, katibələr bütün məlumatları bilirlər, müdirin bütün ehtiyaclarını ödəyən fiqura çevrilirlər və adətən katibə seçilən xanımın bilik və bacarığı deyil, seksual görünüşü diqqətçəkici olur.

Mehriban Zeynalova deyir ki, əslində bəzi qadınlar onlara qarşı belə münasibətin olmasına razılaşırlar: “Buna səbəb isə oradakı imtiyazlardan bəhrələnəcəklər. Bura onun yaxşı yaşaması üçün yaradılan şərait, müəyyən resursların əlçatan olması və maddi imkanlarının genişlənməsi aiddir. Əgər qadınlar belə problemlərə görə vaxtında müraciət etsələr belə hallarla rastlaşılmaz”.

Birlik sədri hesab edir ki, iş yerlərində baş verən seksual qısnamalara görə heç bir qadın susmamalı, belə hadisələrin şahidi olan insanlar da səssiz qalmamalıdır.

“Yeniavaz.com”  saytı isə “Internat məktəbi 1 manatlıq içməli suyu niyə 4,2 manata alır? – müəmma” (https://www.yeniavaz.com/az/news/165900/internat-mektebi-1-manatliq-icmeli-suyu-niye-42-manata-alir-muemma) sərlövhəli məqalədə bəhs olunan məsələni dəyərləndirir.

Müəllif deyir ki, 11 saylı İnteqrasiya Təlim İnternat Məktəbi tərəfindən keçirilən tenderin qalibi “Dostluq Servis” məhdud məsuliyyətli cəmiyyət olub.

Müsabiqənin şərtlərinə əsasən bu məhdud məsuliyyətli cəmiyyət məktəbə 85 min manat dəyərində 20 min kub metr içməli su daşıyacaq, rəqəmlərdən də göründyü kimi, 1 kub metr içməli susuya 4 manat 25 qəpik ödəniləcək.

Müəllifə görə, bu qiymətlər “Azərsu” Açıq Səhmdar Cəmiyyətinin əhaliyə satdığı içməli suyun qiymətilə (1 kub metr/1 manat) müqayisədə dəfələrlə çoxdur.

Müəllif deyir ki, məktəb 2 ay əvvəl – bu ilin fevral ayında “Epsılon Servis” məhdud məsuliyyətli cəmiyyət adlı bir şirkətdən 76 min manat dəyərində 20 min kub metr, 2020-ci ilin mart ayında isə yenə də  “Dostluq Servis” məhdud məsuliyyətli cəmiyyətdən 80 min manat dəyərində 20 min kub metr içməli su alıb.

Müəllif diqqəti son bir ildə alınan içməli suyun qiymətinin bir-birindən fərqli olmasına çəkir.

Müəllifə görə, alınan suyun qiyməti fərqli olsa da, tenderin qalibi olan şirkətlər arasında bağlılıq var, belə ki, “Epsılon Servis” məhdud məsuliyyətli cəmiyyət 08.06.2016-cı ildə dövlət qeydiyyatına alındığı, nizamnamə kapitalının 200 manat olduğu qeyd olunub. Hüquqi ünvanı Yasamal rayonu, 8-ci keçid, ev 11-də yerləşən şirkətin qanuni təmsilçisi Rahim Yəhyayevdir.

Diqqət çəkən məqam odur ki, “Epsılon Servis” məhdud məsuliyyətli cəmiyyət ilə eyni gündə (08.06.2016-cı il) və eyni nizamnamı kapitalı (200 manat) ilə qeydiyyata alınan “Dostluq Konsaltinq” məhdud məsuliyyətli cəmiyyət də daha əvvəl "Çirkab suların daşınması" və "İçməli və texniki suyun satın alınması" məqsədlə internat məktəblər ilə müqavilə imzalayıb.

“Dostluq Konsaltinq” məhdud məsuliyyətli cəmiyyət ilə “Dostluq Servis” məhdud məsuliyyətli cəmiyyət isə eyni hüquqi ünvanda - Bakı şəhəri, Binəqədi rayonu, Azadlıq prospekti ev 187, mənzil 79 – da qeydiyyata alınıb, hər iki şirkətin qanuni təmsilçiləri  də  Famil Miriyevdir.

Müəllif deyir ki, təkcə Bilgəh qəsəbəsindəki 11 nömrəli məktəb deyil, Türkan, Şüvələn, Buzovna qəsəbələrində yerləşən bir çox təhsil və səhiyyə müəssisələri eyni şirkətlərə içməli su və kanalizasiya xidmətləri üçün yüz minlərlə manat vəsait ayırırlar.

Müəllifə görə, son illərdə yüksək səviyyədə yenidən qurulan bu müəssisələrin yaxınlığında yerləşən digər tikililərdə və ərazilərdə içməli su mövcud olsa da adları qeyd olunan müəssisələrdə içməli su və kanalizasiya xətti mövcud deyil.

“Bizimyolinfo”  saytı isə “Rusiya Xarici İşlər Nazirliyi: "Revanşist ritorika regionu yenidən müharibə astanasına sala bilər" (https://www.bizimyol.info/az/news/338177.html) sərlövəhli məqalədə isə Rusiya Xarici İşlər Nazirliyinin sözçüsü Mariya Zaxarova Qarabağdakı mövcud vəziyyəti dəyərləndirir.

Onun deməsinə görə, Qarabağda çox böyük bədəl ödəndi, insanlar həyatlarını itirdilər, həm faciəli, həm də gələcəyə ümid verən bu andan dinc və yaradıcı məqsədlər üçün istifadə edilməlidir, daha vəziyyəti daha da gərginləşdirmək üçün yox. Yeni ayırıcı xətlər və qıcıqlandırıcılar yaratmağa ehtiyac yoxdur” deyə M.Zaxarova məəslənin tam həllini tapmadığını gözardı edir.

O, öz iddialarını da ortaya qoyur: “Bəli, bu çox çətindir, xüsusilə də silahlı qarşıdurmadan sonra, həmçinin psixoloji cəhətdən də”

Onun fikrincə, çoxları razı deyil, çoxları davam və ya revanş almaq istəyir. Hesab edir ki, bu, məqsəd olmamalıdır, əsas məqsəd sülhün əldə olunmasıdır.

Amma Mariya Zaxarova kimlərin davam etmək, kimlərin revanşist olmalarını açqlamır, bunun sülhə faydası olmayacağını deyir. O zaman da belə sual yaranır ki, vəziyyətin sülhə, problemin birmənalı həllinə faydası olmayacaqsa, bu vəziyyət kimə lazımdır?

Xatırladaq ki, Azərbaycan Dövlət Sərhəd Xidməti aprelin 22-də Ermənistan tərəfin sərhəddə təxribatlar törətməsi barədə məlumat yaymışdı.

“Sfera.az” saytı isə həbs olunan baş həkimlərə hansı cəza veriləcək? – “Rüşvətxorları ömürlük həbs etmək...” sərlövhəli məqalədə rüşvətə görə həbs olunan şəxslərə hansı cəza verilməli olduğunu hüquqşünas Əkrəm Həsənovla müzakirə edir (https://sfera.az/hebs-olunan-bas-hekimlere-hansi-ceza-verilecek-rusvetxorlari-omurluk-hebs-etmek/).

Əkrəm Həsənov bu düşüncədədir ki, rüşvətxorları ömürlük həbs etmək lazımdır, onları bağışlamaq olmaz .

Aprelin 22-də tibb sahəsində bəzi həkimlərin rüşvət faktına görə həbs olunmaları ilə məsələ aktual əhəmiyyət kəsb etmyə başlayıb.

Əkrəm Həsənov deyir ki, tibb sahəsində korrupsiya olması məlum məsələ idi, amma bunu edənlərdə belə rahatlıq var idi ki, nə istəsələr edə bilərlər, onlara toxunan olmayacaq. Hüquqşünas deyir ki, korrupsiyanın qarşısını almağın üç əsas yolu var. İlk növbədə bu insanların maaşı yüksək olmalıdır, onlara aşağı maaş verilsə, rüşvət  almayacaqlarını gözləmək sadəlövhlük olardı.

Bu cinayətlərə görə cəza çox sərt olmalı yəni aldığı məbləğdən asılı olmadan ömürlük həbs etmək lazımdır və əfvə düşməməlidirlər, 

Üçüncüsü, məmurların gəlir və xərclərinin bəyannaməsi olmalı, məmurlar və ailələri şəffaf olmalıdır.

Hüquqşünas hesab edir ki, rüşvətin qarşısını almaq üçün ilk növbədə məmurların hesabatlılığı, vətəndaş cəmiyyəti tərəfindən sorğu-suala çəkilməsi asan olmalıdır. Bahalı maşınları, mülkləri üzə çıxdıqda vətəndaş cəmiyyətinin “bu, sənə haradandır?” sualı verilməsi və sorğu-suala başlanılması mümkün olmalıdır.

Əkrəm Həsənov hesab edir ki, dövlət orqanlarının bir-biri üzərində nəzarəti təəssüf ki, özünü doğrultmur.

“Mətbuat.az” saytı isə “100 illik işğalın üstündən xətt çəkildi: Azərbaycanın Zəngəzur planı nədir?” sərlövhəli məqalədə azərbaycanlıların Zəngəzura qayıdacaqlarını dəyərləndirir.

Müəllif yada salır ki, bu günlərdə ölkə başçısı İlham Əliyev azərbaycanlıların 101 il öncə əlindən alınmış Zəngəzura qayıda biləcəkləri barədə açıqlama verib. Müəllif hesab edir ki, dövlət başçısının bu fikri təsadüf sayılmaz.  

Məsələ ilə bağlı açıqlama verən ekspert Samir Hümbətov bildirib ki, prezident İlham Əliyevin açıqlaması əsasən 1988-ci ilə qədər Ermənistan, xüsusilə Zəngəzur, Göyçə, və digər ərazilərdə yaşayan deportasiya olunmuş azərbaycanlıların geri qaytarılmasına hesablanmış fikirdir.

Politoloq hesab edir ki, Göyçə, Zəngəzur və digər ərazilər artıq Ermənistan ərazisi kimi tanındığı üçün söhbət həmin ərazilərdən getmir və Azərbaycanın Ermənistan əraziləri kimi tanınan yerləri işğal etmək fikri yoxdur. 

“Bu açıqlamanın izahı odur ki, həmin ərazilərdə yaşayan, amma qovulmuş azərbaycanlılar yenidən o torpaqlara qayıdaraq yaşamaq hüququ əldə edə biləcəklər, amma buna müəyyən bir zaman lazımdır”, - Samir Hümbətov şərh verir.

Siyasi şərhçi önəmli bir məsələyə diqqət yönəldərək vurğulayır ki, əgər qoyulan şərtlər yerinə yetirilsə, Azərbaycan da qarşılıqlı şəkildə müəyyən addımlar ata bilər.