Media-icmal 23.05.20

Korrupsiya və rüşvətxorluğa qarşı mübarizə, kölgə iqtisadiyyatının daraldılması yolları, dünya neft bazarının yaratdığı problemlər və s. məsələlər medianın aparıcı mövzuları sırasındadır...

Rəsmi “Azərbaycan” qəzeti “İlham Əliyevdən növbəti sərt xəbərdarlıq” sərlövhəli məqalədə ölkədə korupsiya və rüşvət əleyhinə aparılan mübarizəni dəyərləndirir.

Müəllif deyir ki, dövlət baçısı İlham Əliyev bu günlərdə Ağstafa və İmişli rayonlarına yeni icra başçları təyin edilən şəxsləri görünütülü formatda qəbul edərkən Azərbaycanda korrupsiyaya, rüşvətxorluğa, talançılığa qarşı mübarizənin sözdə yox, əməldə aparıldığını və bundan sonra da aparılacağını bildirib.

“Korrupsiyaya, rüşvətxorluğa qarşı amansız mübarizə aparılmalı və bunun kökü kəsilməlidir. Bu məsələ ilə bağlı mən öz fikirlərimi bildirmişdim, bir daha demək istəyirəm ki, Azərbaycanın uğurlu inkişafı, ölkəmizin dayanıqlı inkişafı üçün xoşagəlməz hallara son qoyulmalıdır”.

Müəllifin sözlərinə görə, ölkə başçısı yeni təyin olunmuş məmurlara rəhbərlik edəcəkləri rayonlarda bütün xoşagəlməz hallara qarşı ciddi mübarizə aparmalı olduqlarını, korrupsiyanın, rüşvətxorluğun, talançılığın kökünün kəsilməsi üçün ciddi çalışmalarının vacibliyini vurğulayıb.

Müəllifin sözlərinə görə, Azərbaycanda çox böyük sahibkarlıq sinfi formalaşıb, amma iş adamları hansısa layihəni icra etmək istəyəndə və s. məmurlar tərəfindən problemlərlə qarşılaşırlar: “Bəzi məmurlar onların layihələrinə şərik çıxmaq istəyirlər, bəzi məmurlar onların gəlirlərinə göz dikirlər. Buna qətiyyən yol vermək olmaz, əksinə, siz sahibkarları cəlb etməlisiniz, siz onları inandırmalısınız”.

Daha sonra son 17 il ərzində bölgələrdə reallaşan layihələri dəyərləndirən müəllfin sözlərinə görə, bu müddətdə ölkədə həyata keçirilən dövlət proqramları çərçivəsində 16 min kilometr avtomobil yolu çəkilib, bütün elektrik təsərrüfatı, demək olar ki, yenidən qurulub, qazlaşdırma təxminən 100 faizə çatdırılıb, 3500-dən çox məktəb, 700-dən çox tibb ocağı, 50-yə yaxın olimpiya idman mərkəzi tikilib.

Müəllif deyir ki, dövlət başçısı kadrlara onların fəaliyyətindən çox şey asılı olduğunu deyərək, fəaliyytləri ilə insanları özlərinə inandırmalı, dəstəkçilərinə çevirməli olduqlarını vurğulayıb.

“Bizimyol.info.az” “Kölgə iqtisadiyyatı ilə mübarizə bizim üçün indi əsas məsələlərdən biridir” sərlövhəli məqalədə müəllif kölgə iqtisadiyyatı ilə mübarizə məsələsini deputat Anar Məmmədovla gündəmin  müzakirəsinə daşıyır.

Deputat Anar Məmmədov hesab edir ki, ölkədə sahibkarlığın inkişafı sahəsində şəffaflığın təmin edilməsi, kölgə iqtisadiyyatına qarşı mübarizə vacib məsələlərdən biridir: “Şəffaflığın yüksəldilməsi, hesabatlılığın, uçot və nəzarət sisteminin təkmilləşdirilməsi, vergi siyasəti və kölgə iqtisadiyyatına qarşı mübarizə müstəsna əhəmiyyət daşıyır”.

Deputatın sözlərinə görə, belə olan təqdirdə kölgə iqtisadiyyatına qarşı mübarizənin xarakteri iqtisadi qanunvericiliyin daha da təkmilləşdirilməsini, ölkədə sahibkarlığın inkişafı sahəsində şəffaflığın təmin olunmasını tələb edir.

Deputat rəsmi statistikaya istinadən deyir ki, 2019-cu ildə əmək müqavilələrinin sayı 153 min artmış, bu artımın 99 mini özəl sektorun payına düşmüşdür.

Deputatın bildirdiyinə görə, ümumi iqtisadi vəziyyət nə qədər yaxşı olsa da, problemlərin mövcudluğu gizlədilmir, həlli yolları üzərində çalışılır.

Deputata görə, kölgə iqtisadiyyatının mövcudluğu əsas problemdir və onun aradan qaldırılması əsas vəzifədir.

“Moderator.az” “Neftin qiymətlərinin son 5 ildə 2 dəfə yaşatdığı problemlərlə 3-cü dəfə üzləşmək istəmiriksə...” sərlövhəli məqalədə müəllif Azərbaycan iqtisadiyyatının aktual problemlərini ekspert Fikrət Yusifovla müzakirə edir.

Ekspert hesab edir ki, postpandemiya dövründə Azərbaycan iqtisadiyyatı yeni inkişaf mərhələsinə qədəm qoymalıdır və bunun alternativi yoxdur.

İqtisadçı əlavə edir ki, son 5 ildə ölkə iqtisadiyyatı dünya bazarında neftin qiymətinin birdən-birə kəskin ucuzlaşması səbəbilə ikinci dəfə tənəzzül yaşamağa məhkum olur: “Üçüncü dəfə bu problemi yaşamamaq üçün iqtisadiyyatın qeyri-neft sektorunun zəruri artım sürətini təmin edə biləcək xüsusi dövlət proqramı işləyib ortaya qoyulmalıdır. Bu, hələ problemin həlli demək deyil, belə bir proqram o zaman uğurla reallaşdırıla bilər ki, onun gerçək maliyyə təminatı olsun”.

Ekspert hesab edir ki, ölkənin bütün regionlarında yüzlərlə kiçik və orta müəssisələrin yaradılmasını hədəfləyən dövlət proqramının maliyyə təminatı üçün valyuta ehtiyatlarının 20%-ə qədərini (təxminən 10 milyard dollar) çəkinmədən bu məqsəd üçün istifadə etmək lazımdır.

Ekspert hesab edir ki, daha bir yol ölkə iqtisadiyyatına xarici investisiyaları maksimum cəlb etməkdən keçir.

İqtisadçının fikrincə, daha bir yol isə bankların üzünü real sektora çevirməkdir, hazırda isə bank sektoru iqtisadiyyatın real sektorunu, demək olar ki, kreditləşdirmir: “İqtisadiyyatın qeyri-neft sənayesi, kənd təsərrüfatı və tikinti sektorunun kredit yükü 2012-ci ildəki 10,9%-dən 2019-cu ildə 3,76%-ə qədər azalıb”.