Media-icmal 24.04.21

Azərbaycan ərazisində Ermənistan şirkətinin açılması, “Zəngəzur dəhlizi” istiqamətində baş verən hadisələrin səbəbləri, cavan kadrların rüşvətxorluğu, Rusiyanın beynəlxalq hüquq və etik qaydaları tapdaması və s. məsələlər medianın aparıcı mövzuları sırasındadır...  

“Bizimyolinfo.az” saytı  “Ermənistan Azərbaycan ərazisində şirkət açır” sərlövhəli məqalədə bəhs olunan məsələni politoloq Məhəmməd Əsədullazadə ilə dəyərləndirir.

Politoloq hesab edir ki, Ermənistanın bu addımı Azərbaycanın ərazi bütövlüyünü tanımamaq deməkdir.

M.Əsədullazadə deyir ki, erməni tərəfin iddiasına görə,  2020-ci il noyabrın 10-da imzalanmış üçtərəfli bəyanatda “Zəngəzur dəhlizi” məsələsi əksini tapmayıb, halbuki, bu məsələ xüsusi qeyd olunur.

Həmin sənəddə status məsələsi əksini tapmasa da, əksinə, erməni tərəf iddia edir ki, status məəsləsi sənəddə əksini tapır. Erməni silahlılarının Qarabağdan çıxarılması vurğulansa da, bu müddəaya əməl edilmir: “Buna baxmayaraq, Ermənistan Azərbaycan ərazisində şirkət açır. Rəsmi Bakı bu məsələyə sərt reaksiya verməli və Yerevanın bu kimi təcavüz aktlarının qarşısını almalıdır”.

Politoloq deyir ki, Ermənistanın “Shtigen” günəş enerjisi şirkəti Xankəndində filialını açıb. Şirkətin sahibi Ayk Şekyan isə bildirib ki, filialın açılmasında əsas məqsəd özəl və dövlət sektorunun geniş iştirakı ilə bu bölgənin enerji təhlükəsizliyini və müstəqilliyini təmin etmək üçün geniş proqramların həyata keçirilməsidir.

“Redaktor.az” saytı isə “Zəngəzur istiqamətində  nə baş verir? – atəş səsləri- cavab” sərlövhəli məqalədə bu günlərdə Zəngəzur istiqamətində Azərbaycanla sərhəddə erməni yaraqlılarının silah tətbiq etməsini hərbi ekspert Ramin Məmmədli ilə şərh edir. 

Ekspert hesab edir ki, belə halların baş verəcəyi bəlli idi, çünki 2020-ci il noyabrın 10-da atəşkəsin təmin olunması ilə bağlı imzalanan bəyanatdan sonra Ermənistan tərəfində narahatlıq var və bu, məğlubiyyət sindromu ilə bağlıdır”.

Ekspertə görə, Ermənistanda vəziyyəti gərginləşdirmək, hərbi əməliyyatlar aparmaq istəyən qüvvələr var, orduda kök atıblar, Azərbaycan tərəfinə atəş açılması da bununla bağlıdır:

R.Məmmədli hesab edir ki, erməni əsgərlərinin içkili vəziyyətdə Azərbaycan tərəfə atəş açması barədə Rusiya tərəfin açıqlama verməsi inandırıcı deyil və vəziyyətin gərginləşməməsi üçün Azərbaycana belə məlumat təqdim edilib.

“Müsavat.com” saytı “Cavan kadr cildində… canavarlar” sərlövhəli məqalədə son günlər rüşvət faktlarına görə həkimlərin həbs olunmalarını və işdən kənarlaşdırılmalarını dəyərləndirir.  

Müəllif hesab edir ki, bu, sadəcə pul yığmaq görməmişliyi, cinayət məcəlləsində hansısa maddə ilə nəzərdə tutulan qanunsuzluq deyil, həm də dövlət siyasətini sabotaj etməkdir.

Müəllif deyir ki, koronavirus xəstəxanalarının baş həkimlərinin həbsi səhiyyə sistemində korrupsiyanın daha da irəlilədiyinin gösətircisi və sübutudur.

 Həbs edilən baş həkimlər isə yaxşı təhsil almış, xarici ölkələrdə praktika, prestijli hospitallarda baş həkimlik etmiş şəxslədir.

İndi deyirlər ki, bu biabırçı faktlar barədə əvvəldən də cəmiyyətdə söz-söhbət varmış: “Bu da cavan kadr(lar)... “Ölkədə cavanlara yol açmaq lazımdır” israrının sonu bu imişmi? Bu arxalı cavanlar isə məsuliyyəti beş-on manata dəyişəcək qədər tamahkar çıxıblar”.

Müəllifə görə, bu, daha çox mənəviyyat məsələsidir, bunlar ürəksiz və vicdansız olublar, amma arxasız olmayıblar, yoxsa dövlətin müalicə müəssisəsində açıq bazar açmağa risk etməzdilər.

“Bu adamlar isə hamının gözü qarşısında rüşvət alıblar, siyahılar tutublar, xəstələri “pullu”-“pulsuz” deyib sortlara, həm də “yaxşı”-“pis” palatalara ayırıblar. Pullu xəstələrə VİP otaqlar verilib, yaxşı müalicə vəd edilib.

Başqaları da qalıb yəqin digər həkimlərin, tibb personalının vicdanına”, deyə müəllif vəziyyətin acınacaqlı olmasını diqqətə çatdırır.

Bu korona qədər təhlükəli və yoluxdurucu rüşvət həbsləri ölkənin onsuz da “xəstə” olan səhiyyəsində daha bir yara açdı, etibarını ciddi zədələdi.

Azərbaycan tibb elminin elmi kəşf baxımından koronavirus ilə mübarizəyə heç nə ilə qatqısı yoxdur.

“Bu, sadəcə pul toplamaq görməmişliyi, cinayət məcəlləsində hansısa maddə ilə nəzərdə tutulan qanunsuzluq deyil, həm də dövlət siyasətinin sabotajdır, dövlətə inamın sarsıdılması əməlidir”!

“Azpolitika.info” saytında isə “İpə-sapa yatmayan İvan - Putin küncə sıxışdırıldıqca, bütün əndazələri aşır” sərlövhəli məqalədə müəllif RF prezidentinin dünyanı təhdid edən çıxışını dyərləndirir.

Müəllif deyir ki, XX əsrin 50-ci, 60-cı, 80-ci illərində Rusiyanın bəzi Avropa ölkələrinə soxulmasına etiraz olaraq bəzi şüarlar səsləndirildi, bunlardan biri də “İvan, idi domoy!” kimi səslənirdi.

Müəllif əlavə edir ki, nə o vaxt, nə ondan öncə və ya sonra İvan həmin torpaqlardan könüllü çıxmadı, müflisləşmə, çöküşün başlanması Rusiyanı buna vadar etdi: “Elə indi də əslində ağır günlərini yaşayan bu imperiya təfəkkürünün hakim olduğu dövlət sanksiyalar, təzyiqlər, iqtisadi, sosial, demoqraik çətinliklər səbəbindən küncə sıxılmış halda olsa da, Ukraynadan Moldovaya, Gürcüstandan Azərbaycana kimi və s. nə qədər “İvan, idi domoy” deyilsə də, heç cür ev-eşiyinə yığışmaq istəmir. 

Müəllif  hesab edir ki, V.Putin Federal Məclisə son müraciətində bir daha Rusiyanın nə beynəlxalq hüquq, nə dövlətlər arasında bərabərhüquqlu münasibətlər, nə də adi etik davranışlar kimi anlayışlara məhəl qoymadığını nümayiş etdirib.

Müəllif ona da diqqət çəkir ki, Putin dünyanı təhdid edir, kriminal küçə leksikonuna əl atır, Ukrayna, Polşa, Çexiya ilə bu “dildə” danışır və bundan utanmır da…

Putin SSRİ-nin dağılmasını XX əsrin böyük geosiyasi fəlakəti adlandırır, özünü dövlət başçısından daha çox həm imperiya, həm də kriminal avtoritet kimi apararaq onun yanında olmayanları təhqir və təhdiddən belə çəkinmir.

Putin çıxışnda heç kəsin Rusiyanın “qırmızı xətləri”ni keçməyi düşünmədiyinə ümid etdiyini bildirir, bu xəttin hər bir konkret halda harada olcağını Rusiya özü müəyyən edəcək, bu o deməkdir ki, Rusiyanın bu “qırmızı xətti” Ukraynanın, Gürcüstanın, Moldovanın, Pribaltikanın, ya Azərbaycanın ərazisindən keçə bilər.

Əslinə qalarsa, “İskəndər-.M” raketinin Şuşaya atılması ilə bağlı suala indiyə kimi Rusiyanın Azərbaycana cavab verməməsi “bu qırmzı xətt” barədə dolğun təsəvvür yaradır.