Media-icmal 24.06.20

Koronavirus pandemiyası və ona qarşı mübarizə gündəmi zəbt etməkdə davam edir.

Pandemiyaya qarşı mübarizə, indiki halda dondurma yeməyin təhlükələri, xaricə daşınmış maliyyə vəsaitlərinin ölkəyə qaytarılması mümkünlüyü və s. məsələlər medianın aparıcı mövzusu olmaqda davam edir...

Mübarizə davam edir 

Rəsmi "Azərbaycan" qəzeti "Qlobal pandemiya ilə mübarizə davam edir" sərlövhəli məqalədə koronavirus pandemiyasına qarşı mübarizəni dəyərləndirir.

Məüllif deyir ki, artıq yarım ildir koronavirus, "COVID-19" dünyanın altını üstünə çevirib, demək olar ki, bütün sahələri iflic edib, tibb elmi buna qarşı vaksin axtarışında olsa da, peyvəndin yaxın zamanlarda tətbiqinin gözlənilmədiyi vurğulanır.

"Göründüyü kimi, artıq "COVID-19" həyatımızın bir parçasına çevrilib və biz onunla yaşamağa öyrəşməliyik. Özü də bu virusun diktə etdiyi şərtlərlə: sosial izolyasiyanı gözləməklə, maska taxmaqla, şəxsi gigiyena qaydalarına əməl etməklə", deyə müəllif vurğulayır.

Bu sahədə Azərbaycanda vəziyyətə gəlincə, müəlif deyir ki, Azərbaycanda ona qarşı çevik və qabaqlayıcı tədbirlərə start verildi, ölkədə geniş yayılmasının və kütləvi insan ölümlərinin qarşısı alındı.

Hazırda Azərbaycanda koronavirusa qarşı mübarizə davam edir, xüsusilə virusun yayılma sürətini azaltmaq üçün mühüm addımlar atılır və bu istiqamətdə görülən zəruri tədbirlərdən biri də yoluxma hallarının müəyyənləşdirilməsi istiqamətində testlərin olunması zəruri tədbirdir: "İyunun 22-nə olan statistikaya əsasən, son sutka ərzində 4345 test aparılıb. Ölkədə aparılmış koronavirus testlərinin ümumi sayı isə 426 394-dür".

Son olaraq isə müəllif karantin qaydalarının pozulması hallarına toxunaraq, bunu yolverilməz və hər kəsin sağlamlığını təhlükəyə atmaq adlandırır.
Müəllif hesab edir ki, qaydalara əməl etmək həm də vaksin tapılana qədər bu təhlükəli virusa yoluxmamaq anlamına gəlir. 

Professordan dondurma xəbərdarlığı

Dondurmalar koronavirusa qapı açır  Bu xəbərdarlığı tanınmış tibb professoru Adil Qeybulla edir.

Müəllif deyir ki, havalar qızdığı üçün insanlar soyuq su içməyə, dondurma yeməyə daha çox meyl edirlər.

Hazırda Azərbaycanda koronavirusa yoluxmanın sürətlə yayıldığı vaxtda bunun nə qədər münasib olması barədə danışan A.Qeybulla pandemiya dövründə  dondurma və soyuq içkilərdən uzaq durmağı tövsiyə edib. 

Onun fikrincə, insanların ehtiyatlı olmasında fayda var, çünki dondurma, soyuq içkilər insanların səhhətində ağırlaşma, soyuqdəymə, yuxarı tənəffüs yollarının soyuqdəyməsini yaradır, virusun da buna qoşulması vəziyyəti ağırlaşdıra bilər: "Ona görə də dondurmadan istifadədə diqqətli olmaq lazımdır. Soyuqdəyməsi, xroniki xəstəlikləri olan şəxslər, yaxşı olar ki, dondurmalardan, soyuq içkilərdən çəkinsinlər".

"Bu vəsaitlər Azərbaycana gətirilsə, 5 il ərzində neft gəlirlərindən istifadə etmədən, investisiya qoyuluşunu təmin edə, eyni zamanda indiyə kimi görülən işlər qədər sosial yönümlü layihələr gerçəkləşdirə bilərdik". Bunu iqtisadçı ekspert Fuad İbrahimov bildirib.

Onun sözlərinə görə, ən azından müstəqillik illərində Azərbaycana gələn neft gəlirləri, rəsmi xərclənən vəsaitlərin 50 faizindən çoxu təyinatı üzrə xərclənməyib: "Deməli, həmin yerdə qalan vəsaitlər hər hansı bir yolla mənimsənilib. Belə deyək ki, 1995-ci ildən bəri Azərbaycanda görülən işlərə xərclənən maliyyədən bir qədər artıq vəsait təyinatından kənarlaşdırılıb".

İqtisadçı-ekspert Natiq Cəfərliyə görə isə, bu hal Azərbaycan məmurlarının ölkənin gələcəyinə inanmamasının göstəricisidir: "Belə çıxır ki, Azərbaycan məmurları ölkənin gələcəyinə inanmır. Gələcəyə qoyulmuş investisiyaların dayanıqlığına, həmin pulların əllərindən alınmayacağına inansaydılar bəlkə də bu vəsaitləri Azərbaycana yönəldərdilər". 

N.Cəfərli hesab edir ki, bu isə ölkədə yeni iş yerlərinin yaranmasına, yeni iqtisadi aktivliyin baş qaldırmasına kömək olardı. 

Ekspert deyir ki, istənilən işdən çıxarılan və yaxud fəaliyyətdə olan məmurun malik olduğu daşınar və daşınmaz əmlakı araşdırılarkən məlum olur ki, əksər yatırımları Amerikada, Avropada, əsasən də Böyük Britaniyadadır: "Bu, həm də onu göstərir ki, onlar Azərbaycanın hüquq sisteminə, gələcəyinə, yatırımlarına da inanmırlar. Onlar həmin vəsaitləri qeyri-qanuni yolla əldə etdiklərini də anlayaraq bu işi görürlər".

İqtisadçıya görə, qlobal, sistemli şəkildə məsələnin həlli yolu geniş maliyyə amnistisiyasından keçir, bu olmayınca, məmurların istənilən yolla əldə etdikləri vəsaitlərin təminatı yaranmasa, vəziyyət indiki şəkildə davam edəcək.