Media-icmal 24.10.18

Regionların inkişafı, gömrük rüsumlarından azad edildiyinə görə, Aİ-92 arkalı benzinin satış qiymətinin enməsi gözləntiləri, ətin bahalaşması ehtimalı və s. məsələlər bu günkü (24 oktyabr, 2018-ci il) medianın aparıcı mövzularındandır...

Dövlət qayğısı- regionların inkişaf səbəbi

"Azərbaycan" qəzeti "İndi kəndlinin bərəkətli torpağı, bol suyu, rahat yolu var sərlövhəli məqalədə regionlarda kənd təsərrüfatı üçün yaradılan şəraiti dəyərləndirir və müəllif bu dəyərləndirməni oktyabrın 22-də dövlət başçısı İlham Əliyevin İmişli rayonuna səfəri fonunda təqdim edir.

Müəllif deyir ki, regionların sosial-iqtisadi inkişafına yönəldilən dövlət proqramları İmişli rayonunun simasında da özünü aydın göstərir: "Nəticədə bu bölgədə də qeyri-neft sektoru inkişaf edir, yeni iş yerləri açılır, əhalinin güzəranı getdikcə daha da yaxşılaşır. Digər rayonlar kimi, İmişlinin də sosial-iqtisadi inkişafı dövlət başçısının daim diqqət mərkəzindədir. Ölkənin Prezidenti seçildiyi 2003-cü ildən bəri İlham Əliyev 5 dəfə bu rayonda səfərdə olub".

Müəllif vurğulayır ki, bu il oktyabrın 22-də Prezidentin bu rayona səfəri çərçivəsində bir sıra istehsal və sosial yönümlü yeni obyektin açılışında iştirakı da dövlət qayğısının təzahürüdür.

Müəllif deyir ki, bu sırada Araz çayının yeni qol-kanalının istifadəyə verilməsi Saatlı, İmişli və Biləsuvar rayonlarının torpaq sahələrini suvarma suyu ilə təmin etməklə ölkədə qeyri-neft sektorunun daha da inkişafına xidmət göstərəcək.

Müəllif deyir ki, son 15 ildə Azərbaycanda 4 min kilometrə yaxın yeni suvarma kanalları, 2700 kilometr uzunluğunda kollektor-drenaj şəbəkələri yaradılıb, Araz çayının yeni qol-kanalının istifadəyə verilməsi də elə bu tədbirlərin davam etməsi göstəricisidir: "Bu layihəyə birinci mərhələdə 80 milyon manat sərmayə qoyulub. Yeni beton su kanalı 53 min hektar torpağı su ilə təmin edəcək".

Müəllifin deməsinə görə rayonda 40-dan çox kənddə modul tipli su təmizləyici qurğular quraşdırılıb, qazlaşdırma 92 faizə çatıb,elektrik enerjisi təchizatında problem yoxdur.

İmişlidə Avtomatik İdarəetmə və Nəzarət Mərkəzinin istifadəyə verilməsini isə müəllif rayonda enerji infrastrukturunun modernləşməsi kimi dəyərləndirir.

Müəllif istehsal edilən məhsulun bazara rahat daşınmasında yol infrastruktururunun əvəzsiz rolu olduğunu, son dövrlər rayonda yol tikintisinin də vüsət aldığını bildirir.

Müəllif bu çoxcəhətli quruculuğun mahiyyətini elə dövlət başçısı İƏliyevdən sitata gətirməklə təqdim edir: "Bizim siyasətimiz ondan ibarətdir ki, Azərbaycan vətəndaşları daha da yaxşı yaşasınlar, hər bir yerdə, hər bir rayonda, hər bir kənddə yaşayan vətəndaşlar işlə təmin olunsunlar, onların rifah halı yaxşılaşsın və dövlət bu istiqamətdə öz tədbirlərini görür".

Aİ-92-nin qiyməti enə bilərmi...?

"Modern.az"da isə "Aİ-92" markalı benzin ucuzlaşmayacaq" sərlövhəli məqalə oxumaq olar.

Müəllif Azərbaycanda kütləvi istehlak edilən 92 ("Aİ-92") oktanlı benzinin idxalının 3 ay olmaqla müvəqqəti gömrük rüsumlarından azad edildiyini və bu qərarın Nazirlər Kabineti tərəfindən qəbul olunduğunu bildirir.

Müəllif Aİ-92-nin gömrük rüsumlardan azad edilməsinin benzinin satış qiymətinin (hazırda Aİ-92-nin litri 90 qəpikdir) enməsinə səbəb olub-olmayacağını iqtisadçı-ekspert Vüqar Bayramovla incələyir.

Ekspert deyir ki, Azərbaycanda 92 ("Aİ-92") oktanlı benzin idxalının müvəqqəti olaraq gömrük rüsumlarından azad edilməsi qiymətlərə təsir etməyəcək:

"Bunun qiymətlərin aşağı düşməsinə səbəb olacağı gözlənilmir. "Aİ-92" markalı benzinin qiyməti Tarif Şurası tərəfindən tənzimləndiyi üçün bu qiymətə bazarın təsir imkanları məhduddur. Dəyişikliyə əsasən, 92 oktanlı benzin üçün gömrük rüsumları 15%-dən 0%-ə enib, amma bu zaman xərc müşahidələrinə ehtiyac yaranır, amma aydındır ki, 3 aylıq güzəşt müddəti xərclərin monitorinqi və eləcə də qiymətin dəyişməsi üçün kifayət deyil".

V.Bayramovun deməsinə görə, idxal edilən benzinin daxili istehlak qiymətinin aşağı salınması üçün həm güzəşt dairəsinin genişləndirilməsinə, həm də güzəşt müddətinin ən azı 1 illik dövrü əhatə etməsinə ehtiyac var.

Ekspert deyir ki, güzəştlərin 3 aylıq çox qısa müddəti əhatə etməsi yerli benzin istehsalçısı olan Heydər Əliyev adına Bakı Neft Emalı Zavodunda təmir-yenidənqurma işlərinin aparılması ilə bağlıdır. Belə ki, yerli istehsalın azalmasının tələbə təsir etməməsi üçün növbəti 3 ayda idxalda güzəştlər tətbiq ediləcək.

V.Bayramov bildirir ki, bu zaman istehlakçılara yalnız yerli deyil, eyni zamanda oxşar markalı idxal benzini də təklif ediləcək.

Xatırladaq ki, əvvəllər bu növ benzin üçün gömrük rüsumu 15 faiz idi.

Nazirlər Kabinetinin başqa bir qərarı ilə "Aİ-92" markalı benzinin idxalına görə aksiz dərəcəsi bir ton üçün 200 manatdan bir manatadək azalıb.

Bu qərar 2018-ci ilin 1 oktyabr tarixindən tətbiq olunub və 90 gün müddətində qüvvədədir.

Nazirlər Kabinetinin belə qərarı Heydər Əliyev adına Bakı Neft Emalı Zavodunda (NEZ) işlərin planlaşdırılmış profilaktika işlərinə görə müvəqqəti dayandırılması ilə bağlıdır. Buna görə də benzin müəyyən həcmdə xaricdən idxal olunacaq.

Ət bahalaşa bilər?

"Cebhe.info"da isə "Ət bazarına bahalaşma dalğası: Sayılı zaman qaldı" məqalə diqqət çəkir.

Müəllif deyir ki, son vaxtlar heyvan satışı bazarında qiymətlərin bahalaşdığını bildirir və ətin də bahalaşa bilməsi ehtimalını iqtisadçı-ekspert Akif Nəsirli ilə müzakirə edir.

Müəllif deyir ki, Tovuzdakı heyvan bazarında iribuynuzlu heyvanların qiymətində 100, xırdabuynuzlularda isə 30-50 manat artım müşahidə olunub, Bərdə heyvan bazarında 150 kiloqramlıq heyvanlar 1600-1700 manata satılıb..

Müəllifin deməsinə görə, heyvan bazarlarında ətlik heyvanlara tələbat müqayisədə daha çox olub.

Müəllif Bakıdakı qəssablara istinadən bildirir ki, əvvəllər 1000 manata aldıqları heyvanı indi 1300 manatdan alırlar.

İqtisadçı ekspert Akif Nəsirli isə deyir ki, bu son illər kənd təsərrüfatı sektorunda heyvandarlığın inkişafının sıxışdırılmasına bağlı prosesdir.

"Əslində Azərbaycanın təbiəti kənd təsərrüfatının heyvandarlıq istiqaməti üçün daha səmərəlidir. Buna baxmayaraq, hökumət pambıqçılığın inkişafına daha çox dəstək verir.Hətta bir çox ərazilərdə fermalar sökülərək, ərazilər pambıq əkini üçün verilir. Heyvanların qiymətindəki artım bu amillə bağlıdır".

Akif Nəsirli hesab edir ki, bahalaşmanın davamı olacaq:"Yay mövsümü yeni başa çatıb. Hələ bostan, tərəvəz məhsulları bazardan tam olaraq yığışdırılmayıb. İnsanların ətə tələbatı son bir-iki ayda artıb.Qarşıdakı aylarda may-iyuna qədər ətə tələbat yüksək olacaq.Təklif isə məhduddur.Ona görə də hesab edirəm ki, qarşıdakı aylarda da heyvanın, həmçinin ətin qiyməti bahalaşacaq".

Ekspert hesab edir ki, ət tələbatını ödəyə bilmək üçün üstəlik idaxala da üstünlük veriləcək və idxal dövriyyəsi artacaq.

Ekspertə görə, bu durumdan çıxış yolu heyvandarlığın inkişafını stimullaşdırmaqdan keçir."Heyvandarlığın inkişafı stimullaşdırılarsa, nəinki Azərbaycanın daxili tələbatını ödəyər, hətta ixrac potensialı da yarana bilər.

Azərbaycanda yetişən yerli cinslər keyfiyyətinə görə dünyada brend yaratmaq imkanlarına malikdir.Hesab edirəm ki, Azərbaycandan ət ixrac olunarsa, bu Avropada ən azı 30-40 avroya təklif oluna bilər".