Media-icmal 25.02.2016

Ölkənin pul-monetar siyasətinin kəskin devalvasiyaya səbəb ola bilməsi, Salyanda sovet tipli müəssisə yaradılmasına cəhd, ölkənin maliyyə resurslasına ciddi ehtiyacın yaranması, hakimiyyət komandasında “yenilənmə” medianın aparıcı mövzusudur.

Rəsmi qəzetlər hələ də dövlət başçısı İhamƏliyevin İran səfəri bi səfərin mahiyyəti haqda yazırlar.

“Rəsmi Bakının İranla mehriban qonşuluq münasibətlərinin tərəfdarı kimi çıxış etməsi son illər ölkələrimiz arasında əlaqələrin ən müxtəlif səviyyələrdə inkişafına ciddi təkan verib. Həm İranın, həm də Azərbaycanın mühüm coğrafi mövqedə yerləşməsi və zəngin iqtisadi potensiala malik olması mövcud əməkdaşlığın daha da dərinləşdirilməsini zəruri edir”, - “Azərbaycan” qəzeti yazır.

“Manatın məzənnəsinin süni saxlanılması növbəti kəskin devalvasiya üçün zəmin yaradır”, - ekspert Samir Əliyev “Azadlıq” qəzetinə şərhində belə deyib.

Onun fikrincə, son zamanlar bankların dollar alınmasına artan tələbləri bir daha onu göstərir ki, tələbatın qarşısı inzibati yolla alınıb. S.Əliyev bu gün manatın bahalaşmasının heç bir iqtisadi əsasın olmadığını da deyir. “Sırf inzibati metodlardan istifadə etməklə bu kurs saxlanılır bunun da bazaar ancaq psixoloji təsiri ola bilər”, - ekspert öz mövqeyini izah edib.

S.Əliyevə görə, məntiqlə dollara olan tələbat artdıqdan sonra dollar bahalaşmalı idi. “Amma yenə də də Mərkəzi Bank birinci devalvasiyadan sonra buraxdığı səhvləri təkrarlayır. Manatın məzənnəsinin süni saxlanılması növbəti kəskin devalvasiya üçün zəmin yaradır”, - iqtisadçı manatın pespektivi barədə proqnoz verib.

“İrihəcmli təsərrüfat vahidləri yaratmaq üçün son vaxtlar fermer təsərrüfatlarını birləşdirmək səyləri artır, elə bu kolxozların yaranması deməkdir ki, son mərhələdə də sovxoza dönəcəklər”, - “Exo” qəzeti aqrar sahədəki proses barədə yazır. Qəzet bu addımları səmərəsiz addımlar kimi dəyərləndirir.

“Kolxozların yaradılması cəhdləri yaxşı nəticəyə gətirməyəcək, bu mənada bolşeviklərin səhvlərini təkrar etməyə ehtiyac yoxdur, üstəlik artıq xalqın düşüncəsi də dəyişib. Kənd təsərrüfatının inkişafı və iri təsərrüfatların yaradılması üçün zəruri şəkildə fermerlərə kömək etmək lazımdır”, - çıxış yolu göstərilir.

Qəzet yazır ki, Salyanın ilkin olaraq 4 kəndində belə sovet tipli müəssisənin yaradılması nəzərdə tutulur. “Belə təsərrüfatlar istehsalın intensivliyini təmin edəcək, iqtisadi rentabelliyi artıracaq, əhalinin məşğulluğu artacaq, yeni iş yerləri yaranacaq”. Bunu isə Salyan rayon icra başçısı Tahir Kərimov Qarabağlı, Kərimbəlyi, Təzəkənd və Kolanı kəndlərini əhatə edən sovet tipli müəssisə haqqında deyib.

“Mərkəzi Bank  bankların valyuta tələbatını ödəyə bilmir”, - “Novoye Vremya” qəzeti çıxış edir. Bu həm də adı çəkilən qəzetdəki məqalənin sərlövhəsidir.

“Situasiya göstərir ki, milli valyutanın gələcəyi birbaşa dünya bazarında neftin qiymətindən asılıdır. Birjalardan isə hələlik bədbin informasiyalar gəlir. Bütün bu böhran təkcə neftin dəyərinin ucuzlaşmasına bağlı deyil, həm də fəaliyyət planı olmayan hakimiyyətin belə hallara hazır olmamasına bağlıdır”, - qəzet ölkənin maliyyə həyatında baş verənlərə toxunur. Qəzet bununla yanaşı ölkəyə xaricdən daxil olan valyutanın azaldığını da vurğulayır.

Mərkəzi Bankın manatın kursunu sabit saxlamaq üçün 10 milyard dollardan artıq vəsait xərclədiyini yazan qəzet nəticədə inflyasiyanın başladığını, qiymətlərin artdığını qeyd edir.

Maliyyə vəsaitlərinin əldə edilməsi üçün beynəlxalq maliyyə qurumları ilə danışıqların nəticə vermədiyini yazan qəzet Fars körfəzindəki avtoritar rejimlərdən də maliyyə dəstəyi almaq cəhdlərinin hələ ki səmərə vermədiyini xüsusi vurğulayır.  

“Yeni Müsavat” qəzeti “Hakimiyyət yeni “kadr bankı” yaradır” başlıqlı məqalə ilə çıxış edir. Hətta qəzet buna “Gənc mütəxəssislər iqtidar yolunda!” kimi deviz də müəyyən edib.

Qəzet yazır ki, xaricdə, xüsusilə diplomatiya, iqtisadiyyat, menecment, təhsil və digər sahələrdə uğurlu fəaliyyəti olan gənclərin ölkəyə qaytarılması başlayıb. Onlara söz verilib ki, iqtidarın gələcək nazir müavinləri, idarə rəhbərləri, hətta nazirləri ola bilərlər.

Qəzet hakimiyyətə yaxın mənbəsinə isnadən bu kadrlara ilkin olaraq nazirlik və dövlət komitələrində aşağı statuslu vəzifələrdə iş verildiyini deyir. Qəzetə görə, hətta həmin gənclərə xüsusi nəzarət də var ki, onların yersiz sıxışdırılması mümkün olmasın.

“Hakimiyyətdə vəzifədə oturanların əksəriyyətinin yaş həddi nəinki Qərb, hətta postsovet ölkələrinin bir çoxu ilə müqayisə edilməyəcək dərəcədə yuxarıdır”,- qəzet hakimiyyət komandasının dəyişmə səbəblərindən birinə toxunur.