Media-icmal 25.05.21

“Bizimyolinfo.az” saytı “ABŞ Qarabağa kimin müttəfiqi olaraq gəlmək istəyir..” sərlövhəli məqalədə ABŞ-ın Qarabağa kimin müttəfiqi olaraq gələ bilməsi politoloq Fərhad Məmmədovla müzakirə edilir.

Məmmədov deyir ki, hazırda Qarabağda Rusiya və Türkiyə var, ABŞ-ın  regiona kimin qoluna girərək gələcəyi isə maraq doğurur.

Politoloq hesab edir ki, Fransa Azərbaycanın əleyhinə çıxmaqla Qafqazda  mövqeyini itirib, bununla belə, həmsədrlikdən uzaqlaşdırıldığı, neytrallıq öhdəliyi üstündə qalmadığı halda Fransanı daha çox dəstəkləyəcəyini bildirir. 

Məmmədovun fikrincə, ABŞ-da isə regiona gəlmək üçün resursu çoxdur və onun bölgəyə hansı müttəfiqlə gələcəyi Azərbaycan üçün mühümdür.

O deyir ki, iyun ayında Bayden-Ərdoğan görüşündə çox vacib məsələlər müzakirə olunacaq: “Türkiyə bu gün NATO-nun ən güclü, həm sözünü deyən, həm də hərəkət edən dövlətidir. O, ABŞ-a sözünü deməyi də bacarıb, qarşısında durmağı da” deyə Məmmədov qeyd edir.

Məmmədova görə, bu görüşdən sonra Türkiyə Ermənistanla sərhədləri açsa, Ermənistan daha çox müstəqil olacaq və 5-10 il sonra onun Avropaya çıxışı daha da genişlənəcək.

Politoloqun fikrincə, nə qədər paradoksal görünsə də, Ermənistanın azad siyasət yürütməsi Azərbaycanın marağındadır.

“Yenisabah.az” saytı “Ermənistan niyə Qazaxın kəndlərini geri vermir? sərlövhəli məqalədə bəhs olunan məsələni müzakirə edir.

Müəllif deyir ki, Qazax rayonunun 7 kəndinin qaytarılması ilə bağlı uzun müddətdir ki, danışıqlar gedir, amma hələ də problem həllini tapmayıb.  

Müəllif vurğulayır ki, 2020-ci il 10 noyabr anlaşması ilə bağlı Azərbaycanın yaydığı sənəddə göstərilirdi ki, Ermənistan noyabrın 20-nə kimi Qazaxın kəndlərini geri verməlidir. Ancaq Rusiyanın anlaşma ilə bağlı yaydığı sənəddən bu bənd çıxarılmışdı və ona görə də bu məsələ indiyə qədər uzanıb.

Həmin kəndlər ərazi baxımından çox kiçik, strateji baxımdan cox böyükdür.  Söhbət ondan gedir ki, Tiflisdən İrəvana gedən əsas yol məhz həmin ərazidən, Azərbaycan ərazisindən keçir.

Yəni, “Google Maps” tanınmış beynəlxlaq sərhədləri tanıdığna görə bu ərazini Azərbaycanın tərkib hissəsi kimi göstərir, reallıqda isə həmin kəndlər hələ də ermənilərin nəzarəti altındadır. Amma istər Ermənistan, istər Gürcüstan enində-sonunda bu kəndlərin Azərbaycana qaytarılacağına əmindirlər.

“Müsavat.com” saytı “Paytaxtda məktəbi zülmətə qərq edəcək bina tikintisi” etiraz doğurdu” sərlövhəli məqalədə Nəsimi rayonu Akademik Mirqasımov küçəsi, 4 saylı ünvanda yerləşən 3 mərtəbəli binaların sökülməsi haqda qərarın sakinlərin etirazına səbəb olmasını dəyərləndirir.

Müəllifə görə, Nəsimi rayonu tikinti şirkətlərinin qanunsuzluqlarının meydanına çevrilib. Rayonun Akademik Mirqasımov küçəsi, 4 saylı ünvanında yerləşən 3 mərtəbəli evin sökülməsi haqda qərar sakinlərin ciddi etirazına səbəb olub.

Sakinlər  deyirlər ki, “42 saylı məktəbin 3 tərəfində binalar tikilib. İndi məktəbin gündoğan istiqamətində olan 3 mərtəbəli binaları da söküb yerində çoxmərtəbəli binalar tikmək üçün hazırlıqlar başlayıb: “Burada çoxmərtəbəli bina tiksələr, məktəb günəş işığından tamamilə məhrum olacaq. Hava axınlarının da qarşısı alınacaq, Üstəlik, buradakı hündür binalarda yaşayanların hesabına burada çox böyük sıxlıq yaranacaq. Burada çoxmərtəbəli binanın tikintisi şəhərsalma prinsiplərinə açıq-aşkar ziddir”, - sakinlər belə deyirlər.

Ərazidə yaşayan 60-a yaxın vətəndaş baş verənlərə etirazını yazılı şəkildə dövlət qurumlarına çatdırıblar.