Media-icmal 25.09.20

Koronavirusa qarşı mübarizə, onlayn dərslərin texniki təchizatı, toy mərasimlərinin keçirilməsi şərtləri,  psixoloqdan xəbərdarlıq və s. məsələlər medianın aparıcı mövzuları sırasındadır.

“Azərbaycan” qəzeti  “Azərbaycan peyvəndi əldə edən ilk ölkələrdən biri olacaq” sərlövhəli məqalədə koronavirusa qarşı peyvəndin yerindən danışır.

Müəllif deyir ki, bu virusdan tamamilə xilas olmağın yolu peyvənd olunmaqdan keçir. 

Müəllif  əlavə edir ki, hazırda dünyada yalnız 9 şirkət peyvənd hazırlığının 3-cü mərhələsindədir, odur ki, vaksinin tətbiqinə qədər insanlar maska taxmaq, sosial məsafə gözləmək, gigiyenaya əməl etmək kimi şərtlərə əməl etməlidirlər.

Yazıda vurğulanır ki, Azərbaycanda koronavirus infeksiyasına qarşı mübarizə ardıcıl davam edir, əhalinin sağlamlığı bütün mümkün üsullarla qorunur.

Müəllifə görə, elə bu səbəblə iyul ayının sonundan təhlükəli infeksiyaya yoluxma dinamikasında müsbət tendensiya müşahidə olunur, yoluxma halları azalıb. “Xəstəxanalarda müalicə alan və reanimasiyada olan koronaviruslu xəstələrin sayı da xeyli aşağı düşüb. Ölkə ərazisində tətbiq olunan sərt karantin rejimi yumşaldılıb, xeyli məhdudiyyət aradan qaldırılıb və qarşıda da bu istiqamətdə növbəti addımların atılacağı gözlənilir”.

Müəllif vurğulayır ki, indiyə qədər Azərbaycan koronavirusla mübarizəyə dəstək olmaq üçün həm də dünyanın 30-dan çox ölkəsinə humanitar və maliyyə yardımı göstərib.

Müəllifə görə, ölkə bütün potensialını pandemiyaya qarşı səfərbər edib,  çünki hər zaman dövlətiin əsas prioritetini vətəndaşlarının sağlamlığı və təhlükəsizliyinin etibarlı müdafiəsi təşkil edir.

“Redaktor.az”  saytı “Müəllimlərə pulsuz kompüter, şagirdlərə planşet... – kimlərə verilə bilər?” məqaləsində verilən suala cavab axtarır.

Müəllif yada salır ki, COVİD-19 pandemiyası ilə bağlı yeni dərs ili onlayn sistem üzərində qurulub. Lakin  bir çox şagirdlər tədris prosesinə qoşula bilmirlər.  Odur ki, müəllif “Maraqlıdır, belə bir onlayn tədrisin effekti necə olacaq?” sualını gündəmə gətirir.

Təhsil eksperti Elşən Qafarova görə, Təhsil Nazirliyi Virtual Məktəb platformasını təkmilləşdirmək üçün müəyyən addımlar atmalıdır: “Ölkənin bütün ərazilərini normal İnternetlə, təhsil alanları planşetlə, müəllimləri isə komputerlə təmin etmək olardı. Həmçinin Virtual Məktəb platformasından istifadə edənlərin İnternetə haqq ödəmədən istifadə etmələri mümkün idi”.  

E.Qafarova görə, bunların heç biri olmadı, nəticədə tədris ilinin əvvəlində artıq virtual məktəblərə qoşulmaların sayı çoxaldı. “Bununla da Virtual Məktəb platformasında ciddi problemlər yarandı, ölkədə doğrudan da İnternet problemi var”, - ekspert bildirib.

E.Qafarov deyir ki, istər müəllimlər, istər şagirdlər kompüter və planşet qıtlığı yaşayırlar. Onun sözlərinə görə, yaranmış vəziyyətlə bağlı teledərs layihəsi müəyyən qədər problemi deyə yüngülləşdirir.

Onun fikrincə, əgər İnternet problemi həll olunarsa, İKT vasitələri təhsil prosesinin  iştirakçılarına hansısa formada verilərsə, bu, qismən vəziyyəti yüngülləşdirə bilər”.

“Yeniavaz.com” saytı  “Toyların dayandırılması demoqrafik baxımdan təhlükəlidir” sərlövhəli məqalədə müəllif toy şənliklərinə qoyulan qadağalar və nəticələri barədə deputat Jalə Əliyeva ilə söhbətləşir. 

Deputat toy mərasimlərinin pandemiyadan əvvəlki vaxtlardakı kimi çoxsaylı tərkibdə keçirilməsini artıq mümkünsüz adlandırır: “Bundan əlavə, məhdud sayda insanın toplaşması da əsas şərtlərdəndir. Bizim vətəndaşlarımız bu şərtlər altında öz toyları və yaslarını keçirməyə hazırdırlarsa, qadağalar nisbətən aradan götürülə bilər”, - deputat vurğulayıb.

J.Əliyeva toyların dayandırılmasının mənfi tərəfinə də toxunub: Demorafik baxımdan da təhlükəli haldır. Statistikalar göstərir ki, son 7-8 ayda toyların dayandırılması bir ildən sonra doğum sayının azalmasına da səbəb ola bilər. Burada bir-birinə bağlı çoxlu nüanslar var. Həm insani, həm sosial, həm də iqtisadi məsələlər nəzərə alınmaqla toyların keçirilməsinə qoyulan qadağa ilə bağlı qərar veriləcək,

Deputat qeyd edir ki, məhdud sayda, ara məsafəsi gözlənilməklə, masalar arasında məsafə saxlanılmaqla, qısa müddətdə və maskadan istifadə ilə toyların keçirilməsinə qoyulan qadağanı aradan qaldırmaq olar:

“Mətbuat.az  saytı “Psixoloqdan valideynlərə intihar xəbərdarlığı “Ali məktəbə girməyən uşaqlara” sərlövhəli məqalədə ekspertlər valideynlərə müraciət edirlər.

Müraciətin səbəbi də budur ki, ali məktəblərə imtahanlar başa çatıb, qəbul olmayan gənclər bunu faciə sayaraq bəzən intihara əl atırlar.

Psixoloq İlahə Dəmirbəyə görə, valideynlər bu dönəmdə övladlarına dəstək olmalıdırlar.

İ.Dəmirbəy hesab edir ki, ixtisas seçimində və s. valideynlər uşağı nəyəsə məcbur etməməlidirlər.

Digər psixoloq Gülnar Orucova da iddia edir ki,  uşaqların intihara əl atmasının səbəbi sırf valideynlərin davranışı olur: “Universitetə qəbul olmayan gənclərin intihar hadisələrini demək olar hər il görürük. Lakin illər öncə biz bunu görmürdük, son 3-5 ildə tez-tez bu intiharlarla rastlaşırıq. Bəzən valideynlər universitetə girməyi uşaqların gözündə o qədər böyüdür ki, uşaqlar universitetə girməməyin dünyanın sonu olduğunu düşünürlər.

Onun fikrincə, ali məktəbə daxil olmağı həyatda əsas məqsəd sayn gənc bu məqsədə çatmadıqda intihara əl atmağı çıxış yolu sayır.

“Universitetə daxil olmamaq dünyanın sonu deyil, valideynlər hər bir halda övladlarının yanında olmalıdırlar. Əgər bunu etməsələr, uşaq depressiv vəziyyətə düşür və intihara əl atır”, - psixoloq xəbərdarlıq edir.