Media-icmal 25.10.18

ABŞ prezidentinin milli təhlükəsizlik məsələləri üzrə müşavirinin Azərbaycana səfəri, boşanmaların artması, bölgələrdən paytaxta əhali axınının davam etməsi və s. məsələlər bugünkü (25 oktyabr, 2018-ci il) medianın aparıcı mövzularındandır.

Əlaqələrin daha da dərinləşməsi üçün imkan səfəri

"Azərbaycan" qəzeti "Con Boltonun səfəri Azərbaycan-ABŞ əlaqələrinin daha da dərinləşməsi üçün əlverişli imkanlar yaradır" sərlövhəli məqalədə ABŞ prezidentinin milli təhlükəsizlik məsələləri üzrə müşaviri Con Boltonun Azərbaycana səfərini dəyərləndirir.

ABŞ rəsmisinin səfərini Azərbaycan Prezident Administrasiyasının xarici siyasət məsələləri şöbəsinin müdir müavini Hikmət Hacıyev şərh edir.

H.Hacıyev deyir ki, bu səfər Azərbaycan ilə ABŞ arasında ikitərəfli əlaqələrin müxtəlif istiqamətlərdə inkişafı və daha da dərinləşməsi üçün əlverişli imkanlar yaradır.

Administrasiya təmsilçisi vurğulayır ki, dövlət başçısı İlham Əliyev ilə ABŞ prezidentinin milli təhlükəsizlik məsələləri üzrə müşaviri Con Bolton arasında görüşün konstruktiv və qarşılıqlı anlaşma şəraitində keçməsi də bunu deməyə əsas verir.

H.Hacıyev deyir ki, görüş çərçivəsində enerji, təhlükəsizlik, terrorizmə qarşı mübarizə kimi sahələrdə əməkdaşlıq məsələlərinə dair geniş fikir mübadiləsi aparılıb: "Azərbaycanın Əfqanıstanda sülhyaratma missiyasına verdiyi dəstək və töhfə təqdir olundu. Həmçinin ölkəmizdə xarici investorlar üçün yaradılmış münbit şərait qeyd olunaraq, iqtisadi sahədə əməkdaşlığın genişləndirilməsi və ABŞ şirkətlərinin və sərmayələrinin daha yaxından Azərbaycan bazarına cəlb edilməsi məsələləri müzakirə olundu".

H.Hacıyev görüşdə dövlət başçısı tərəfindən Ermənistan-Azərbaycan münaqişəsinin həlli məsələsinin xüsusilə vurğulandığını, ABŞ-ın ATƏT-in Minsk Qrupunun həmsədr ölkələrindən biri olduğu nəzərə alınaraq, münaqişənin tezliklə həlli və regionda dayanıqlı sülhün təmin olunması üçün səylərin artırılmasının vacibliyi qeyd olunub.

H.Haciyev bildirir ki, görüşdə regional və beynəlxalq gündəlikdə duran məsələlər barədə də fikir mübadiləsi aparılıb, dövlət başçısı Azərbaycanın qonşu dövlətlərlə işgüzar və dostluq münasibətlərinin olmasını bir daha vurğulayıb.

Artan boşanmalar-dağılan yuvalar

"Modern.az"da isə "8 ayda 9877 boşanma - Qayınana müdaxiləsinin acı sonluğu" sərlövhəli məqalə diqqət çəkir.

Müəllif ölkədə ailə institutunun hazırkı vəziyyətini, ona müdaxilələri və səbəblərini araşdırır.

Müəllif deyir ki, son vaxtlar Azərbaycanda boşanmaların sayı artır və bunun əsas səbəblərindən biri qız analarının yeni cütlüyün şəxsi məsələlərinə müdaxiləsi etməsidir.

Yazı müəllifi vurğulayır ki, bundan əlavə, ekspertlər ailələrin dağılmasına səbəb kimi ailə rəftarından sosial-məişət probleminə kimi bir neçə əsaslar gətirirlər.

Müəllif statistikaya istinadən bildirir ki, bu ilin 8 ayında Azərbaycanda 40235 nikah və 9877 boşanma halı qeydə alınıb.

Məqalə müəllifi bildirir ki, Azərbaycanda ailələrin dağılmasının artması tendensiyası 2004-cü ildən müşahidə edilir, əgər 2004-cü ildə 7 minə yaxın boşanma faktı qeydə alınmışdısa, 2004-cü il ilə müqayisədə 2017-ci ildə boşanmalar 2 dəfədən çox artaraq 14514 həddinə çatıb.

Yazı müəllifi deyir ki, 2017-ci ildə boşanmalar daha çox 30-34 yaşlı kişilər və 25-29 yaşlı qadınlar arasında çox olub.

Ailə məsələləri üzrə tədqiqatçı, "Təmiz Dünya" İctimai Birliyinin sədri Mehriban Zeynalova sayta bildirib ki, yeni qurulan ailələrə müdaxilə məsələsi çox ciddi problem olaraq qalır.

M.Zeynalova deyir ki, maddi baxımdan üstün olan qız ailələri onları yönləndirir, bu imkanı ilə ailədə sözünün keçərliliyini təmin edir, belə hal isə sağlam ailə üçün təməl ola bilməz.

Ekspert hesab edir ki, ailələrin dağılmasının qarşısını almaq üçün hər iki tərəf neqativ müdaxilələri dayandırmalıdır, gənc ailələrin bu müdaxilələrə "yox" deyə bilməmələri isə yeni ailənin xarakterinin formalaşmamasının göstəricisidir: "Valideynlər övladlarının tərəflər arasında nüfuz qazanmasına imkan vermirlər. Nəticədə şəxsi və psixoloji olaraq insanların aşağılanması və qüruruna toxunulması təsiri bağışlayır ki, bu da ailənin dağılmasına gətirir".

M.Zeynalova iddia edir ki, indiki halda sağlam ailə mühiti formalaşdırmaq əvəzinə "kimin sözü keçəcək" kimi lazımsız prinsipə söykənmək arxaiklikdir.

"Boşanmaların əksər səbəbi qadın və kişinin, ər və arvadın bir-biri qarşısında nüfuzunun aşağılanması və yoxa çıxarılması dərəcəsinə çatdırılmasıdır".

Ekspert hesab edir ki, XXI əsrdə belə cılız məsələlərlə ailə münasibətlərinə müdaxilə etmək, geridəqalmışlıqdan başqa bir şey deyil.

Dövlət biznes qurumu deyil

"Oxu.az" saytında "Deputat icra başçılarını yenə tənqid etdi:"Əhali həm də bölgələrdəki özbaşınalıqdan Bakıya axışır" sərlövhəli məqalə oxumaq olar.

Müəllif regionlardan Bakıya axının davam etməsi, yeni paytaxt şəhər salınmasına ehtiyac yaranması kimi məsələləri deputat Qüdrət Həsənquliyev ilə müzakirəyə çıxarır.

"Paytaxtın Bakıdan başqa bir yerə köçürülməsinə və ya yeni paytaxt şəhərinin salınmasına ehtiyac yoxdur. Bakıya axının qarşısının alınması üçün bu, məqbul variant sayıla bilməz və köçürülmə yönündə fikirlərlə razı deyiləm. Pulumuzu, vəsaitimizi iqtisadiyyatın qeyri-neft sektorunun, sənayenin inkişafına yönəltsək, daha yaxşı olar". Deputat sayta düşüncələrini belə ifadə edib.

Deputat iddia edir ki, hazırda ölkə iqtisadiyyatı, büdcə neftin üzərində oturub, ondan asılıdır, ona görə də büdcəni, iqtisadiyyatı neft asılılığından qurtarmaq lazımdır.

Q.Həsənquliyev deyir ki, yaxın keçmişdə baş vermiş proseslər bu asılılığa son qoymağı zərurətə çevirir: "Bir neçə il öncə dünyada neftin qiymətinin kəskin şəkildə düşməsi ilə bağlı Azərbaycan iqtisadiyyatında da bəzi problemlər yarandı, xüsusilə bank sektorunda böyük çöküş əmələ gəldi, iki dəfə sarsıdıcı devalvasiya baş verdi. Bu zaman hökumət büdcənin, iqtisadiyyatın neftdən asılılığını azaltmaq üçün bir sıra addımlara getdi və bunun müsbət nəticələri də görünməyə başladı, qeyri-neft sektorunda canlanma oldu".

Deputat vurğulayır ki, son bir ildə neftin qiyməti qalxan kimi, yenə hər şey unudulmağa başlayıb, indiki halda qeyri-neft sektorunun, sənayenin, aqrar sahənin inkişafına daha ciddi diqqət yetirmək lazımdır.

Q.Həsənquliyev deyir ki, Bakıya təkcə işləmək istəyənlər gəlmirlər, hətta bölgələrdə biznes qurub ayda 30-40 min dollar və ya manat qazanan iş adamları da üz tuturlar.

Deputatın deməsinə görə, bölgələrdən insanlar həm də qanunsuzluq əlindən qaçırlar, belə ki, Bakıda hüquqları qorumaq nisbətən daha asandır: "Həm də açıq şəkildə etiraf etmək lazımdır ki, bölgələrdə məmur özbaşınalığı yaşanır".

Deputat hesab edir ki, buna görə də məmurlarla, icra başçıları ilə bağlı ciddi ölçülər götürülməlidir, icra hakimiyyətləri və başçılarının səlahiyyətlərinin 90 faizi bələdiyyələrə verilməlidir.

Q.Həsənquliyevə görə, vətəndaşların paytaxtdan bölgələrə axınını həll etməyin yolu ciddi iqtisadi və hüquqi islahatlardan, qanunların işləməsindən keçir, dövlət hər şeyi öz üzərinə götürməməli, hər şeyi özündə cəmləşdirməməlidir: "Dövlət bizneslə məşğul ola bilməz və olmamalıdır. Dövlət biznes qurumu deyil".