Media-icmal 25.11.19

Ölkədə qazlaşdırılmanın səviyyəsinə baxış, ölkə futbolunun vəziyyəti, böyük şəhər bələdiyyələrinin yaradılması ətrafında müzakirələr və s. məsələlər bugünkü medianın aparıcı mövzuları sırasındadır.

Qazlaşdırma lideri

“Azərbaycan” qəzeti “Qazlaşdırmanın səviyyəsinə görə də lider ölkəyik” sərlövhəli məqalədə Azərbaycanda qazlaşdırılmanın səviyyəsini dəyərləndirir.

Müəllif deyir ki, qaz xətləri Azərbaycanın ən uzaq ərazilərinə, hətta dağların qoynunda yerləşən kəndlərinə çatıb, qazlaşdırılan yaşayış məntəqələrinin sayı ilbəil çoxalır, başqa sözlə, Azərbaycan bu sahədə də liderdir.

Bu sahədə müəllif bu il yanvarın 29-da "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının yekunlarına həsr olunan konfransdakı nitqində prezident İlham Əliyevdən sitat gətirir: “Ölkədə qazlaşdırmanın səviyyəsi 95 faizdir. Ancaq, əlbəttə, bu, o demək deyil ki, bu, bizi qane edir. Elə kəndlər var ki, oraya hələ də qaz çəkilməyib. Ona görə bu proses davam etdiriləcək”.

Yazı müəllifi əlavə edir ki, hazırda ölkədə qazlaşdırmanın səviyyəsi 96 faizi ötür, bu il noyabrın 1-nə ölkədə təbii qaz istehlakçılarının sayı 2 milyon 257 min 156 nəfər olub, yanvar-oktyabr aylarında əhali sektoru üzrə 74 min 229 yeni abonent qeydiyyata alınıb.

Müəllif vurğulayır ki, bu abnentlərin 41 min 487-si Bakı və Sumqayıt şəhərlərinin, Abşeron rayonunun, 32 min 742-si regionların payına düşür və təkcə oktyabr ayı ərzində əhali sektoru üzrə 9 min 105 yeni abonent qeydiyyata alınıb. Abonentlərin 5196-ı Bakı, Abşeron və Sumqayıtda, 3 min 909-u regionlarda yaşayanlardır.

Bu ilin əvvəlindən qazlaşdırılan yaşayış məntəqələrinin sayı 66 olub, başqa sözlə, qaz təsərrüfatı infrastrukturu getdikcə daha da genişləndirilir.

Müəllifin deməsinə görə, bu ilin ilk 10 ayı ərzində 1559,8 kilometr uzunluğunda müxtəlif diametrli yeni qaz kəmərləri çəkilib, 542,8 kilometrlik qaz kəmərləri əsaslı təmir edilib.

Bundan əlavə, Bakı, Sumqayıt şəhərlərində və regionlarda daxili imkanlar hesabına 299,64 kilometr uzunluğunda müxtəlif diametrli qaz xətləri təmir edilib, yaxud yenisi ilə əvəz olunub,.

Müəlif deyir ki, dövlət proqramına əsasən, bu il 92 yaşayış məntəqəsi və massivində qazlaşdırılma aparılmalıdır, onlardan 66-da bu iş artıq başa çatdırılıb, paytaxtda qazlaşdırılması nəzərdə tutulan 22 yaşayış məntəqəsindən biri artıq mavi yanacaqla təmin olunub. 11 məntəqədə işlər tamamlanıb, daha 10 massivdə isə bu istiqamətdə işlər davam etdirilir.

Yazının sonunda isə oxuyuruq: “Əsas məsələlərdən biri də payız-qış mövsümü üçün nəzərdə tutulan tədbirlərin icrasıdır. Bunların 90 faizdən çoxu yerinə yetirilib və bu sahədə də işlər ardıcıllıqla davam edir”.

Bu futbolun gününə...

“Yenisabah.az”da isə “O qədər pis gündədir ki, 40 arvad yığışıb ağlamalıdır”-deputatlardan sərt tənqid” sərlövhəli məqalə oxumaq olar.

Müəllif  Avropa çempionatının seçmə oyunları mərhələsində Azərbaycan milli yığma komandasının zəif nəticə göstərməsinin səbəbləri barədə deputatlarla söhbətləşir.

Müəllif deyir ki, Azərbaycan komandası 8 oyundan cəmi 1 xal yığa bildi və belə bir nəticə yalnız 24 il əvvəl 1995-ci ildə qeydə alınıb.

Müəllif hesab edir ki, bu biabırçı nəticəyə görə baş məşqçi Nikola Yurçeviçlə birgə AFFA rəhbərliyi də hədəfdədir, futbol cameəsi hazırkı rəhbərliyi tənqid etməklə yanaşı, artıq onların vaxtının dolduğunu düşünür, bu, həm də yalnız millinin uğursuz nəticələri ilə yox, daxili çempionatın da bərbad vəziyyətilə bağlıdır.

Deputat Aqil Abbas hesab edir ki, AFFA rəhbərliyinin istefası ilə heç nə düzəlməyəcək, ölkə futbolunu düzəltmək uzun bir proses başlamalıdır.

AFFA Azərbaycan çempionatı keçirmək əvəzinə Bakı çempionaı keçirir, Azərbaycanın futbol şəhərlərinin hamısı futbolsuz qalıb, nəticə də göz önündədir.  “Birinci bu biabırçılığa görə Nikola Yurçeviç getməlidir, ikinci onu bura gətirənlər. Kim gətiribsə, çıxıb cavab versin, görək, bu Yurçeviçi haradan eşələyib tapıblar? Hansı zibilxanadan gətiriblər? Bu, nə deməkdir, bu, nə futboldur? Futbolda adam udar da, uduzar da, ancaq bu dərəcədə biabırçılıq olmaz. Futbol təsərrüfatı o qədər pis gündədir ki, bunun üçün 40 arvad yığışıb ağlamalıdır”.

Deputat deyir ki, 2005-ci ildə futbolun inkişafı ilə bağlı sərəncam imzalandı, amma sonradan sanki qəflətən bir badalaq gəldi, hamısı dağıldı, “Xəzər Lənkəran” sıardan çıxdı, indi də “Qəbələ” dağılmağın astanasındadır və təbii ki, hamısında günahkar AFFA-dır.

Deputat Fazil Mustafa deyir ki, uğursuzluğun səbəbini tam olaraq AFFA rəhbərliyində görmür, bu sahəyə iş adamları cəlb edilməlidir ki, bu işə pul qoysunlar və yalnız AFFA-nın səyləri ilə belə rəqabətsiz futbolda yetkin komanda formalaşdırmaq mümkün deyil.

“Hesab edirəm ki, futbolu inkişaf etdirmək üçün ilk növbədə bazar iqtisadiyyatı çərçivəsində iş adamları qrupu yaradılmalı və onlar bu işə əl qoymalıdılar. Ancaq demək olar ki, hazırda ölkədə müstəqil iş adamları yoxdur. Təbii ki, AFFA uğursuzluqlara görə məsuliyyət daşıyır. Ancaq futbolun da öz reallıqları var. Gördüyünüz kimi, bütün sahələrdə olduğu kimi, futbolda da problemlər var. Təbii ki, bu məğlubiyyətlər xoşagələn deyil. Ən azı gələcək üçün yaxşı işlər görülməlidir”.

Böyük Şəhər Bələdiyyələri: olsunmu, olmasınmı?

“Modern.az”da isə “Bələdiyyələr sanki “ölü doğulmuş uşaq”dırlar” – üç deputat sərlövhəli məqalə diqqəti çəkir.

Müəllif bu il keçiriləcək bələdiyyə çeçkiləri, ölkə idarəçiliyində bəllədiyyələrin yeri barədə deputatlarla sögbətləşir.

Müəllif deyir ki, bu il dekabrın 23-də Azərbaycanda növbəti bələdiyyə seçkiləri keçiriləcək.

Müəllifin deməsinə görə, effektli bələdiyyə idarəçiliyi üçün bələdiyyələrin səlahiyyətlərinin artırılması, Böyük Şəhər bələdiyyələrinin yaradılması və s. kimi təkliflərin səsləndirildiyini diqqətə çatdırır. Deputat Qüdrət Həsənquliyev “modern.az”a açıqlamasında təklifi müsbət qiymətləndirir və  hesab edir ki, Böyük Şəhər bələdiyyələrinin yaradılmasına ehtiyac var: “Hesab edirəm ki, Bakı Böyük , Gəncə Şəhər Bələdiyyəsi də olmalıdır, amma bu yetərli deyil, Bələdiyyələrin statusu, səlahiyyətləri genişləndirilməlidir”.

Deputata gğrə, Q. Həsənquliyevin fikrincə, bələdiyyələr yaradıldıqda, icra hakimiyyətlərinin səlahiyyətləri məhdudlaşdırılmalı idi, amma təəssüf ki, icra başçılarının səlahiyyətləri olduğu kimi saxlandı, bələdiyyələrə isə heç bir səlahiyyət verilmədi, Ona görə, bələdiyyələr sanki “ölü doğulmuş uşaq”dırlar.

Deputat deyir ki, onlardan böyük gözləntilər yoxdur, odur ki, seçkilərə bir aydan az vaxt qalsa da ölkədə seçki ab-havası hiss olunmur, bu da onunla bağlıdır ki, qurumun statusu yoxdur.

Deputat Arif Rəhimzadə isə Böyük Şəhər bələdiyyələrinin yaradılmasını dəstəkləmir: “Bələdiyyələr əvvəl öz ayaqları üzərində dursunlar. Əhali ilə bələdiyyə arasında lazımi münasibətlər yaransın. Ondan sonra bu haqda düşünmək olar. Hələ bu barədə danışmaq tezdir”.

Müəllif deyir ki, deputat Azər Badamov da Böyük Şəhər bələdiyyələrinin yaradılması məsələsinə müsbət yanaşmır, hesab edir ki, Azərbaycanda bələdiyyələr tam oturuşa bilməyib, bələdiyyələrin lazımi şəkildə vəsaiti olmadan bütün şəhərin məsuliyyətini vermək düzgün deyil: “Görülən əksər işlər dövlət büdcəsindən həyata keçirilir. Bələdiyyələr isə özünüidarə qurumlarıdır. Bu qurumların büdcələri qaneedici şəkildə formalaşmadan, şəhərin infrastrukturunun gücünü üzərinə götürə biləcək şəkildə olmadığından böyük şəhər bələdiyyələrinin yaradılması məqəsdəduyğun deyil”.

A.Badamova görə, bələdiyyələrin fəaliyyəti üçün qanunvericilik bazasına nəzər saldıqda onların müstəqilliyini və fəaliyyətini təmin edən qanunvericiliyin formalaşdığını görmək olar, burada çatışmayan cəhət bələdiyyələrdə müasir təfəkkürün formalaşmamasıdır.

Deputat  deyir ki, bu da bələdiyyələrin daha geniş səlahiyyətlərlə fəaliyyətinə mane olur.