Media-icmal 26.06.20

Ölkədə pandemiya ilə bağlı vəziyyət, yoluxmaların artmasının səbəbləri, qlobal resessiyanın ölkə iqtisadiyyatına təsiri ehtimalları və s. məsələlər ölkə mediasının aparıcı mövzularıdır ...

Davam edən pandemiya

"Azərbaycan" qəzeti "Epidemiya vəziyyəti məhdudlaşdırıcı tədbirləri zəruri edir" sərlövhəli məqalədə Azərbaycanda koronavirus pandemiyası ilə bağlı vəziyyəti dəyərləndirir.

Müəllif deyir ki, pandemiya davam edir, havaların istiləşməsi nəticəsində virusun azalacağı, yaxud yox olacağı kimi ilkin mülahizələr də özünü doğrultmadı, yoluxma və ölüm sayı artır. 

Amma müəllif son vaxtlar Azərbaycanda da yoluxma hallarının artaraq 500 nəfəri keçdiyini vurğulayır, buna səbəb kimi isə müəyyən olunmuş qaydalara, sosial izolyasiya tədbirlərinə, xüsusilə maska taxılmamasına əməl olunmaması göstərilir.

Müəllifin fikrincə, sosial təcridə, gigiyena qaydalarına  əməl etmək, maska taxmaq elə bir əziyyət tələb etmir.

Müəllif əlavə edir ki, bu qaydalara əməl etməmək iyunun 20-dən sərt karantin rejiminin yenidən tətəbiqinə səbəb oldu.

Yazı müəllifinə görə, burada təhlükənin mənbəyi: məsuliyyətsizlik, eqoizm və biganəlikdir: "Koronavirus infeksiyası hava-damcı yolu ilə yayıldığı üçün pandemiya dövründə maska taxılması həyati vacib məsələdir. Bir halda ki, təhlükədən qorunmaq yolu çox sadədir, nə üçün buna əməl etməyək?!"

Resessiya nələrə təsir edə bilər?

Koronavirus pandemiyası dünya iqtisadiyyatına böyük zərər vurmaqda davam edir. Ekspert Rəşad Həsənov bunu bildirir (Müsavat.com "Koronavirus qlobal resessiyanı dərinləşdirir. Azərbaycanı nə gözləyir?").

İqtisadçı-ekspert Rəşad Həsənov deyir ki, dünya və eləcə də Azərbaycan iqtisadiyyatını resessiya gözləyir. Onun fikrincə, Çin kimi dünya üzrə ixracyönümlü dövlətdəki resessiya Azərbaycana da təsirsiz ötüşməyəcək.

"Müxtəlif qurumlar tərəfindən Azərbaycan üçün iqtisadi azalma səviyyəsinə dair proqnozlar fərqlidir. 2,2 faizdən 6 faizə qədər proqnozlar verilir. Hələlik 5 aylıq nəticə Azərbaycan iqtisadiyyatının 3 faizlik iqtisadi artımdan 1,7 faizlik azalmaya düşdüyünü göstərir".

Onun fikrincə, ilin sonuna qədər vəziyyətin belə davam etməsi çox ciddi problemlərin yaranmasına, iqtisadiyyatın əhəmiyyətli dərəcədə kiçilməsinə gətirib çıxaracaq.

Onun fikrincə, Azərbaycanda həm dövlət, həm biznes, həm vətəndaş 2015-ci illə müqayisədə xeyli yoxsul olduğu üçün, həm də tətbiq olunan məhdudiyyətlərə görə dollara tələbat yüksək deyil: "Buna görə də 2020-ci il üçün manatın məzənnəsində ciddi bir dəyişiklik gözləmirəm".

O hesab edir ki, əsas itki əhali və biznesdə olacaq: "Ölkədə faktiki olaraq orta aylıq əmək haqqı 680 manat olduğu halda 600 min nəfərə bundan 3 dəfə aşağı məbləğdə - 190 manat yardım edilib, bu da faktiki tələbin üçdə biri idi".

Ekspert deyir ki, biznesin əhəmiyyətli hissəsi dayanıb: "Turizm sektoru tamamən dayanıb, iaşə sektoru 30-40 faiz gücündə ancaq işləyə bilir, xidmət sektorunda tələb 30-35 faiz aşağı düşüb, tikinti sektoru Azərbaycan iqtisadiyyatı üçün ən riskli sahədir".

O hesab edir ki, 47 milyard dollarlıq valyuta ehtiyatları ilə Azərbaycan, uzunmüddətli resessiya olarsa, 5-6 il davam gətirə bilər və bu mənada dözüm əmsalı 5-7 ildir.

Ona görə, bu baxımdan, əsas zərbə əhaliyə və biznesə dəyəcək, 2015-2016-cı illərdə də belə oldu.

Yoluxma artır: səbəblər

"Yeni Sabah.az"da isə "Azərbaycanda virusa yoluxanların sayı niyə sürətlə artır?" sualına cavab axtarılır.

Müəllif deyir ki, iyunun 21-dən etibarən Azərbaycanda koronavirus pandemiyasına görə tətbiq edilən xüsusi karantin rejimi çərçivəsində paytaxt Bakıda və daha 7 inzibati rayonda sərt karantin rejimi tətbiq edilir.

Bununla belə, müəllif infeksiyaya yoluxma sayında azalma olmadığını, əksinə, yoluxmaların artaraq 600 həddinə yaxınlaşdığını vurğulayır.

Müəllif əlavə edir ki, buna səbəb kimi xüsusi karantin rejiminin sərtləşdirilməsi taktikasının effektiv olmadığını iddia edənlər də, vətəndaşların məsuliyyətsizliyini önə çəkənlər də, yoluxmanı artıran başqa səbəblərin olduğunu düşünənlər də var.

Həkim Rasif Bağırova görə, yoluxmanı artıran səbəblərdən biri ictimai nəqliyyatın iş qrafikinin düzgün tərtib edilməməsidir.

R.Bağırov hesab edir ki, indi sərnişin azlığı ilə bağlı paytaxt yollarında avtobusların sayı azalıb, interval 15-20 dəqiqəyə yaxın olub, bu da dayanacaqlarda sərnişin sayını artırır.

Həkim deyir ki, avtobusda olan şərnişinlər tibbi maskadan istifadə etmirlər. "Oxşar hal metroda da müşahidə olunur. Metro əvvəlki rejimdən fərqli olaraq bir qədər ləngiyir. Stansiyada sərnişinlərin sayı artır. Bu da qatarlarda basabasa səbəb olur. Belə halda, əlbəttə ki, yoluxanların sayı artacaq", - deyə R.Bağırov vurğulayıb.        

Həkim hesab edir ki, Operativ Qərargah bu məsələyə xüsusi diqqət yetirməlidir, ictimai nəqliyyat qaydasına salınmasa, karantin rejiminin sərtləşdirilməsi effektiv olmayacaq.