Media-icmal 26.09.20

“Made in Azerbaijan” brendinin təbliğ və təşviqi, sosial şəbəkələrin tənzimlənməsi ilə bağlı müzakirələr, insanların “çipləşdirilə” bilməsi ehtimalları, icra hakimiyyətlərinin sayının azaldılması təşəbbüsləri, psixoloqun hakimiyyətə tövsiyələri və s. bugünki medianın aparıcı mövzuları sırasındadır...

“Azərbaycan” qəzeti “Made in Azerbaijan” brendinin coğrafiyası genişlənir” sərlövhəli məqalədə bu brendin daha da şöhrət qazanması barədə dəyərləndirmə aparır.

Müəllif deyir ki, Azərbaycan kənd təsərrüfatı məhsulları dünyanın digər ölkələrində yetişdirilən meyvə-tərəvəzdən keyfiyyətinə, tamına, mikroelement bolluğu tərkibinə görə fərqlənir. Ona görə də bu gün Azərbaycan brendinin mükəmməl cilalanması və dünya bazarında layiqli təqdimatının təşkili xüsusi aktuallıq kəsb edir.

“Ən çox diqqət ayrılan sahələrdən biri də Azərbaycanın ənənəvi bazarlarda nüfuzunun bərpa edilməsidir. Yeni bazarlara çıxışın müxtəlif istiqamətləri üzərində işlər aparılsa da, ənənəvi bazarlardakı mövqelərimiz də diqqət mərkəzindədir”, deyə müəllif bildirir.

Müəllif deyir ki, Azərbaycan məhsulları Rusiyada, Almaniyada keçirilən sərgi və festifallarda “Made in Azerbaijan” vahid ölkə stendində nümayiş etdirilmişdir.

Faktiki olaraq Azərbaycan məhsullarının ixracının artması, ölkə iqtisadiyyatına xarici investisiyaların cəlb edilməsi, “Made in Azerbaijan” brendinin təşviqi istiqamətində ilboyu görülən işlər müsbət nəticəsini vermişdir.

Müəllif bildirir ki, 2020-ci ilin sonunadək Azərbaycan şirkətlərinin Şanxayda keçiriləcək “3-cü Çin beynəlxalq idxal” ərzaq sərgisində iştirakı nəzərdə tutulur.

“Yenisabah.az” saytı “YAP-dan sosial şəbəkələrlə bağlı mühüm açıqlama” sərlövhəli məqalədə hökumət rəsmisi Əli Əhmədovun sosial şəbəkələrlə bağlı fikrilərinə yer verilib.

Ə.Əhmədova görə, sosial şəbəkələrin müsbət tərəfi olsa da, fəsadları da var.

Onun sözlərinə görə, dünyada bu mövzuda aparılan müzakirələrdə də iki meyl var: “Bir tərəfdən sosial şəbəkələrin rolu yüksək qiymətləndirilib, onun istifadəçilərinin sayı genişlənir. Digər tərəfdən bu platformanın cəmiyyət həyatındakı fəsadları da ciddi narahatlıq doğurur”.

Ə.Əhmədov sosial şəbəkələrin yaratdığı mənfi halları belə təsnifləndirir: “Sosial şəbəkələrin yaratdığı mənfi halların birincisi sosial platformalar vasitəsilə yalan məlumatların kifayət qədər geniş yayılması, ikincisi, ziyanlı təbliğatın aparılmasına geniş imkanlar yaratması və üçüncüsü isə şəxsiyyətə qarşı mənəvi terror aparılmasıdır”.

Onun fikrincə, belə hallara qarşı ictimai qınaq effekt vermir, odur ki,  xoşagəlməz halların qarşısının alınması üçün sosial şəbəkələrin fəaliyyəti ilə bağlı hüquqi tənzimləmə mexanizmlərinin yaradılması zərurətə çevrilir.

“Redaktor.az” saytı “Azərbaycanda insanlar “çip”ləşəcək? TƏBİB-dən açıqlama” sərlövhəli məqalədə müəllif bu mövzuda TƏBİB Elmi Komitəsinin sədri, professor Akif Qurbanovla söhbətləşir.

Yeri gəlmişkən, bu mövzu koronavirus yayılmağa başladıqdan sonra müzakirə dövrəsinə daxil olub. Bu məsələdə dünyanın varlı şəxslərindən tutmuş, hansısa “yeraltı” qüvvələrin rolu olduğu barədə danışlır. Hətta “çipləşmə” insanın robotlaşdırılması ilə eyniləşdirilir.

Akif Qurbanov isə deyir ki, “çip”lə bağlı səslənən fikirlərin heç bir əsası yoxdur: “Çünki insanları “çipləmək” istəsələr, onu başqa üsullarla edərdilər. Ən azından körpələrə vurulan vaksinlərin tərkibində edilə bilərdi. Daha bu cür bütün kütləyə nəzərdə tutulan bir preparatla bu addmı atmazlar. Bunlar hamısı əsassızdır, kimlərin ortaya atdığını və burada nə kimi məqsədlərinin olduğunu deyə bilmərəm”. 

A.Qurbanovun sözlərinə görə, hazırda koronavirus infeksiyası əleyhinə vaksinə tələbat çoxdur, təqribən 7 milyard əhalinin 5 milyardı bu vaksini gözləyir. Həmin vaksin isə hazırda əldə yoxdur, bu “çipləşdirmə” yersiz söhbətlərin mövzusudur”. 

“Modern.az” saytı “İki icra hakimiyyəti ləğv olunsun - MM-in Komitə sədrindən ilginc təklif” sərlövhəli məqalədə icra hakimiyyətlərinin sayının azaldılması müzakirəyə çıxarılır. Milli Məclisin

əmək və sosal sisyasət komitəsinin sədri, deputat Musa Quliyev Gəncənin Nizami və Gəncə rayonları icra hakimiyyətlərinin ləğv olunmasını vacib sayır.

Onun sözlərinə görə, məsələyə Milli Məclisin Regional komitəsində baxılıb plenar iclasa tövsiyə oluna bilər.

Komitə sədri yada salır ki, hazırda Gəncədə ikisi rayon, biri şəhər olmaqla, üç İcra Hakimiyyəti fəaliyyətdədir: “1980-ci ilə qədər Gəncədə rayon olmayıb, yalnız o vaxtkı Şəhər Partiya Komitəsi tərəfindən idarə olunub. 1980-ci illərdə Gəncə və Kəpəz rayonları yaradıldı… Amma 40 il ərzində bu rayonların heç birinin əməli fəaliyyəti olmadı, formal olaraq fəaliyyət göstərdilər.

Onun fikrincə, bir şəhərdə 3 icra hakimiyyəti qurumunun olması, yersizdir, ona görə də məntiqlə üç icra hakimiyyəti birləşdirilə bilər.

“Mətbuat.az” saytında yer alan “Tanınmış psixoloqdan xəbərdarlıq:  “Qadağaları götürün, yoxsa yoluxma artacaq” sərlövhəli məqalədə psixoloq Gülnar Orucova pandemiya ilə bağlı məhdudiyyətlərin götürülməsini vacib sayır.

“Artıq insanlarda koronavirus xəstəliyinin olmasına inam da qalmayıb, bunun bir oyun olduğunu düşünürlər. İnsanlar daha heç bir qaydaya əməl etmək istəmirlər. Artıq şəhərdə insanların üzündə təbəssüm yox səviyyəsindədir. Çünki problemlərinin üstünə bir də karantin dərdi gəlib”, deyə fikrini ifadə edir.

Psixoloq yada salır ki, əvvəllər insanlar bu xəstəlikdən qorxurdular, amma indi qorxmurlar və insanlarda qorxudan çox aqressiya yaranb. İnsanlar normal həyatın davam etməsini istəyirlər.

Psixoloqa görə, insanları stresə salan hansı mənbədən yayıldığı bilinməyən informasiyalardır: “Hansısa mənbələrə əsaslanaraq bildirirlər ki, məsələn noyabrın 5-i məktəblər yenidən bağlanacaq, karantin olacaq”.

Psixoloq deyir ki, karantin davam etdikcə insanların maddi vəziyyəti daha da pisləşir, məyusluq, stres meydana gəlir: “Karantin uzandıqca insanlar aqressiv olur. Odur ki, bu payızda insanların depressiyaya düşmə riski daha çox olacaq”.