Media-icmal 26.11.19

Azərbaycan-Rusiya münasibətləri, icbari tibbi sığortanın tətbiqi vaxtları, bələdiyyə seçkiləri ətrafında müzakirələr və s. məsələlər medianın aparıcı mövzuları sırasındadır...

Yüksələn xətlə gedən əməkdaşlıq

“Azərbaycan” qəzeti “Yüksələn xətlə inkişaf edən ikitərəfli əməkdaşlıq” sərlövəhli məqalədə Azərbaycan-Rusiya münasibətlərini dəyərləndirir.

Müəllif deyir ki, qonşu ölkələrlə qarşılıqlı etimada əsaslanan münasibətlərin möhkəmləndirilməsi Azərbaycanın yürütdüyü xarici siyasətin prioritet istiqamətlərindəndir.

Müəllif əlavə edir ki, Ermənistan istisna olmaqla, Azərbaycanı bütün qonşu ölkələrlə qarşılıqlı faydalı əməkdaşlıq, qarşılıqlı hörmət bağları birləşdirir. “Bu baxımdan Azərbaycan-Rusiya əlaqələrinin hazırki mərhələsi səciyyəvidir. İki ölkənin maraq dairəsində olan məsələlərin spektri kifayət qədər genişdir və ona görə də Bakı və Moskva daim təmasda olur, bu və ya digər problemin həlli üçün qarşılıqlı səylər göstərir”, deyə müəllif Azərbaycan-Rusiya münasibətləri barədə bildirir. Yazı müəllifinin sözlərinə görə, Bakı ilə Moskva arasında əməkdaşlığın yetərli müqavilə-hüquqi bazası yaradılmış, 200-dən çox sənəd imzalanmışdır.

Daha sonra müəllif Birinci vitse-prezident Mehriban Əliyevanın son günlərdə Rusiyaya baş tutmuş səfərinə toxunur və səfərin uğurlu alındığını bildirir: “Bəri başdan qeyd etmək lazımdır ki, səfərin nəticələri gözləntiləri tamamilə doğrultdu”, müəllif nəticələri belə təqdim edir.

Yazıda vurğulanır ki, Rusiyada dövlət başçısı da daxil olmaqla, Azərbaycanın Birinci vitse-prezidenti yüksək vəzifə sahiblərilə görüşüb.

Bu əməkdaşlığın statistik tərəfinə toxunan müəllif deyir ki, keçən ilin yekunlarına görə, qarşılıqlı ticarət dövriyyəsi 19 faiz artaraq 2,6 milyard ABŞ dollarına bərabər olmuş, cari ilin 9 ayı ərzində isə artım 26 faizə çatmışdır.

Müəllifə görə, Azərbaycanda Rusiya kapitallı 700-ə yaxın müəssisə qeydə alınmış, Rusiya investisiyalarının həcmi 4,9 milyard ABŞ dollarına çatmışdır. Eyni zamanda, Azərbaycan Rusiya iqtisadiyyatına 1,2 milyard dollar sərmayə qoymuşdur.

Müəllif vurğulayır ki, sənayenin müxtəlif sahələrində əməkdaşlıq davam edir, “Şimal-Cənub” beynəlxalq nəqliyyat dəhlizi” layihəsi bu sahədə böyük əhəmiyyət kəsb edir, bu marşrut ilə tranzit daşımalarının həcmi 8 dəfə, cari ilin birinci yarısında isə 60 faizdən çox artmışdır.

Turizmə gəlincə, 2018-ci ildə Azərbaycana 900 minə yaxın rusiyalı turist səfər edib.

Yazının sonunda isə oxuyuruq: “Yəni ki, ikitərəfli əlaqələrin yeni vüsət alması üçün imkanlar kifayət qədərdir. Şübhə etməmək olar ki, Birinci vitse-prezident Mehriban Əliyevanın Rusiyaya rəsmi səfəri iki ölkə arasında əlaqələrin dərinləşməsinə təkan verəcək”.

Bakı və Sumqayıt axıra qaldı

“Modern.az ”da isə “Gələn il də icbari tibbi sığorta tam həyata keçirilməyəcək – səbəb” sərlövhəli məqalə oxumaq olar.

Müəllif İcbari Tibbi Sığorta üzrə Dövlət Agentliyinə istinadən  2020-ci ildə icbari tibbi sığortanın ölkə üzrə tətbiqi ilə bağlı təkliflərini diqqətə çatdırır.

Müəllifə görə, Agentlik icbari tibbi sığortaya keçiddə daha az risklərlə qarşılaşmaq, tibb müəssisələrini və əhalini sözügedən prosesə hazırlamaq və s. ilə bağlı tibb müəssisələrində icbari tibbi sığortanın tətbiqinin 4 mərhələdə həyata keçirilməsini təklif edir.

Təklifə əsasən, birinci mərhələdə icbari tibbi sığorta 20 regionda tətbiq olunacaq və bu proses yanvar-mart aylarını əhatə edəcək, tətbiq zonası Şəki şəhəri, Quba, Qusar, Xaçmaz, Şabran, Siyəzən, Xızı, Şamaxı, İsmayıllı, Ağsu, Qobustan, Balakən, Zaqatala, Qax, Oğuz, Qəbələ, Göyçay, Ucar, Zərdab və Kürdəmir rayonları olacaq.

Müəllif deyir ki, ikinci mərhələ aprel-iyun aylarını da 17 region – Gəncə və Naftalan şəhərləri, Göygöl, Goranboy, Daşkəsən, Samux, Şəmkir, Qazax, Ağstafa, Gədəbəy, Tovuz, Bərdə, Tərtər, Ağdam, Ağcabədi, Füzuli və Beyləqanı əhatə edəcək.

Müəllifin sözlərinə görə, iyul-sentyabr aylarında, yəni üçüncü mərhələdə 14 regionda - Lənkəran və Şirvan şəhərləri, Masallı, Lerik, Yardımlı, Astara, Cəlilabad, Salyan, Neftçala, Biləsuvar, İmişli, Saatlı, Hacıqabul və Sabirabad olmaqla, icbari tibbi sığorta 14 regionda tətbiq olunacaq.

Yazıda vurğulanır ki, oktyabr-dekabr aylarında dördüncü mərhələ olmaqla, icbari tibbi sığorta Bakı və Sumqayıt şəhərlərini, habelə Abşeron rayonunun əhalisini əhatə edəcək.

Məqalə müəllifi deyir ki, Agentlik sığorta olunanlara müvafiq növdə, həcmdə və şərtlərlə göstərilən icbari tibbi sığortanın təminat verdiyi tibbi xidmətlərin toplusunu (xidmətlər zərfi) hazırlayıb.

Müəllifin sözlərinə görə, sənəd hazırda müvafiq dövlət qurumları ilə razılaşdırılma mərhələsindədir və zərfə təxminən 3000 diaqnoz üzrə tibbi xidmətlər daxildir.

Müəllif deyir ki, icbari tibbi sığorta çərçivəsində təminat verilən, eləcə də verilməyən laborator və diaqnostik xidmətlərin siyahısı təsdiqləndikdən sonra Agentliyin rəsmi internet səhifəsində yerləşdiriləcək.

Nə qədər ki, demokratik seçkilər...

“Moderator.az”da isə “Bələdiyyə seçkilərində icra hakimiyyətlərinin dırnağarası iştirakı və müdaxiləsi rol oynayır...”  sərlövəhli məqalə diqqət çəkir.

Müəllif bu il ölkədə bələdiyyə seçkiləri fonunda bələdiyyələrin ölkə idarəçiliyində yeri haqda hüquqşünas Ələsgər Məmmədli ilə söhbətləşir.   

Ə.Məmmədli “modern.az”a açıqlamasında deyib ki, bələdiyyələrin yaradılmasından  iyirmi il keçsə də, onlar icra hakimiyyətlərinin yan qurumlarından o tərəfə keçə bilməyiblər.

Hüquqşünas əlvə edib ki, üstəlik bələdiyyələrə tam olaraq səlahiyyətlər verilməyib. “Bələdiyyələr 1999-cu ildə qurulandan onların statusu aydın və konkret deyil. Daha doğrusu, normalda bələdiyyə statusu olmalı məsələlər onların tabeçiliyinə verilməyib”.

Ə.Məmmədli deyir ki, bələdiyyələrin fəaliyyəti daha çox yerli icra hakimiyyətlərindən arxada qalan nələrisə istifadə etməyə yönəlib.

Hüquqşünas deyir ki, əslində bələdiyyənin səlahiyyətləri müstəsna və tam olmalıdır, amma Azərbaycanda, təəssüf ki, qanunda birbaşa bələdiyyəyə tanınan status və səlahiyyət yoxdur.

Ə.Məmmədli vurğulayır ki, icra hakimiyyətlərinin üstünlüyü birbaşa büdcədən vəsait alması, işləri icra etməsindədir, bələdiyyəyə isə az bir miqdarda dotasiya verilir və bu da bələdiyyənin özünü saxlamaq işlərinə sərf olunur. “Buna görə də bələdiyyələr üstündən iyirmi il keçsə də, icra hakimiyyətlərinin yan qurumlarından o tərəfə keçə bilməyiblər. Əlbəttə, burada bələdiyyə seçkilərində icra hakimiyyətlərinin dırnağarası iştirakı və müdaxiləsi də rol oynayır, çünki gerçək seçilənlər yox, daha öncədən təyin olunmuş üzvlər bələdiyyəni təmsil edir. Təssüf ki, Azərbaycanda keçirilən bələdiyyə seçkisinin əyani sübutu budur. Nə qədər ki, Azərbaycanda demokratik bələdiyyə seçkisi yoxdur bələdiyyənin varlığı da mövcud olaraq görünməyəcək”.

Xatırladaq ki, bu il dekabrın 23-də Azərbaycanda beşinci dəfə bələdiyyə seçkiləri keçiriləcək.