Media-icmal 27.01.21

“Redaktor.az”  saytı  “Ermənilər postlarımıza hücuma hazırlaşır? – Ordumuz hazırdır və...” sərlövhəli məqalədə ermənilərin Qarabağda Azərbaycan postlarına hücim edə bilmələri ehtimalından yazır.

Müəllifin deməsinə görə, sosial şəbəkələrdə Azərbaycanda əsirlikdə olan 62 erməni əsgəri azad edilmədiyi halda ermənilər Azərbaycan postlarına hücumlar təşkil edəcəklərini açıqlayıblar. 

Hərbi ekspert Ramil Məmmədli bunu terror kimi  dəyərləndirir, əlavə edir ki, ermənilərin terror aktları törətməsi yeni məsələ deyil və müəyyən mənada bu, istisna olunmur. 

Ekspert deyir ki, Azərbaycanın həbsə aldığı 62 nəfər erməniyə (bu qanunsuz silahlı dəstə 2020-ci il noyabrın sonlarında Ermənistandan Azərbaycanın Qarabağ bölgəsinə göndərilib-red.) gəlincə, Azərbaycan tərəfi onları terrorçu, erməni tərəfi hərbi əsirlər adlandırır.

Ekspert həm də yada salır ki, Azərbaycan ordusuna qarşı istənilən əməliyyat terror aktı kimi qiymətləndiriləcək və ermənilərin terror hadisələri törətməsi, sadəcə, özlərinin əleyhinə işləyəcək.

R.Məmmədlinin fikrincə, hətta ermənilərin hər hansı terror aktı törətmək şansı da o qədər çox deyil: “Ermənilərin Azərbaycan postlarına hücumlar təşkil etmə şansları çox azdır. Çünki Azərbaycan ordusu çox hazırlıqlı və ayıq-sayıqdır. Bu sayıqlıq  sayəsində istənilən hücumun qarşısı anında alınacaq və ən sərt şəkildə cavab veriləcək. Bunu düşmən tərəfi də yaxşı başa düşür”, - ekspert vurğulayır.

“Yeniavaz.com”  saytında isə “Sayğacı dəyişdirilən vətəndaşa 10 gün ərzində 122 manat qaz pulu yazılıb”  sərlövhəli məqalədə qaz sayğacı dəyişdirildikdən sonra müştəriyə yazılan məbləğ dəyərləndirilir.  

Müəllif deyir ki, Xaçmaz rayon Susayqışlaq kənd sakini Nail Baratov iddia edir ki, qaz idarəsinin əməkdaşları ona 122 manat qaz pulunun səhv yazıldığını qəbul etsələr də ondan bu məbləği ödəməsini tələb edirlər.

N.Baratov bildirib ki, hadisə ona məxsus qaz sayğacının “Azəriqaz” İstehsalat Birliyi tərəfindən dəyişdirilməsindən sonra baş verib:

"Ötən il dekabrın 21-dən sonra gəlib bizim qaz sayğacını dəyişdilər. Dəyişməzdən qabaq mənə bildiriş verdilər ki, sənin 35 manat borcun var, mən də onu ödədim. Və bildirişdə göstərilirdi ki, mənim limiti keçməyimə hələ 142 kubmetr var. 1-2 gün sonra gəlib sayğacı dəyişdilər. Yeni sayğac 0-dan başladı yazmağa. Bu yaxınlarda terminalda pul ödəmək istəyirdim, gördüm ki, mənə 122 manat borc yazıblar”, -N.Baratov bildirir.

N.Baratov deyir ki, bu, sadəcə, dekabr ayının 31-nə kimi olan borcudur, yəni, 10 gündən də az müddətə 122 manat borc yazıblar.

N.Baratovun deməsinə görə, məbləğin pozulmasını tələb etsə də yerli idarədən yazılanın pozulmayacağını deyirlər,  bu halın 2-3 ay da davam edəcəyini söyləyiblər.

“Moderator.az”  saytı isə "Kiminsə hünəri varmı ki, harasa yardım edib bunu işıqlandırsın, dərhal üstünə düşürlər..." sərlövəhli məqalədə Azərbaycanda  xeyriyyəçilik ənənələrinin  vəziyyətini jurnalist Arif Əliyevlə şərh edir.

A.Əliyev isə ölkədə xeyriyyəçiliyin durumuna nikbin yanaşmır: “Azərbaycanda xeyriyyəçilik ənənələri necə ki ötən əsrin (XX əsr nəzərdə tutulur) əvvəllərində qırıldı, inkişaf etmir. Ona görə yox ki, azərbaycanlılar xəsisdirlər, yaxud da varlı pulunun üstündə oturub elə səhərdən-axşama kimi özünü düşünür”.

A.Əliyev deyir ki, bu vəziyyət xəsislik məsələsi deyil, sadəcə, Azərbaycanda xeyriyyəçilik üçün imkanlar yoxdur və bu sahə nəzarət altndadır: “Kiminsə hünəri varmı ki, harasa yardım edib, bunu işıqlandırsın? Dərhal bunun üstünə düşürlər”, - A.Əliyev bildirir.

Onun deməsinə görə, adam gətirib harasa köməklik edir və xahiş edir ki, heç yerdə adı çıxmasın.

İkinci tərəfdən də xeyriyyəçilik təşviq olunmalıdır, vergi ödəməyi təşviq edirlər, eləcə də xeyriyyəçilik təşviq olunmalıdır. 

“Yenisabah.az” saytı isə “Moskva da Bakı və Ankaranın təklifinin əleyhinə deyil - İrəvan Kreml qarşısında hesabat verməlidir” sərlövhəli məqalədə  Cənubi Qafqazda yeni siyasi platformanın yaradılması məsələsini politoloq Elxan Şahinoğlu ilə dəyərləndirirMüəllif deyir ki, Azərbaycan və Türkiyə prezidentləri Bakıda keçirdikləri son ortaq mətbuat konfransında müharibədən sonra bölgədə “altılıq formatı”nın (Azərbaycan, Gürcüstan, Ermənistan + Türkiyə, Rusiya və İran) yaradıla biləcəy ini söylədilər.

Politoloq vurğulayır ki, bu günlərdə Bakıda səfərdə olmuş İranın xarici işlər naziri C.Zərif də Tehranın bu formata tərəfdar olduğunu söylədi. Onun deməsinə görə, Gürcüstan prezidenti də son açıqlamalarının birində “altılıq formatı”na maraq göstərdiklərini deyib".

Politoloq  yanvarın 26-da Moskvada İran və Rusiya xarci işlər nazirlərinin görüşünə də diqqət yetirib.

Politoloqa görə, Moskva da Bakı və Ankaranın təklif etdiyi “altılıq formatı”nın (Azərbaycan, Gürcstan, Ermənitan + Türkiyə, İran, Rusiya) əleyhinə deyil.

Politoloqun deməsinə görə, bu məsələdə təkcə Ermənistan nala-mıxa vurur, regional əməkdaşlıqdan danışmaq istəmir. Politoloq yada salır ki, bu il yanvarın 11-də Moskvada imzalanmış bəyannaməyə görə, İrəvan Bakı ilə kommunikasiya xətlərinin açılması üçün müzakirəyə başlamalıdır. Onun sözlərinə görə, martın 1-də konkret palan liderlərin masası üzərində olmalıdır.