“Xocalı faciəsi”nin dünyaya tanıdılması, Qarabağ probleminə baxış, ölkənin idxaldan asılılığı bugünki medianın aparıcı mövzusudur...

Dünyaya tanıdılan Xocalı

“Azərbaycan” qəzeti “Dünya artıq Xocalı faciəsini bəşəriyyətə qarşı soyqırım kimi qəbul edir” sərlövhəli məqalə ilə çıxış edib.

(http://www.azerbaijan-news.az/index.php?mod=3&id=116897)

Müəllif 1992-ci il fevralın 25-dən 26-na keçən gecə Xocalı qəsəbəsində erməni hərbi birləşmələrinin törətdiyi faciənin dünya birliyi tərəfindən tanınması prosesini dəyərləndirir.

Müəllif deyir ki, Xocalı faciəsinin dünyada tanıdılması istiqamətində ardıcıl və sistemli tədbirlər həyata keçirilir. “Dünyanın bir çox ölkəsində Xocalı qurbanlarının xatirəsi anılır, mitinqlər, aksiyalar keçirilir, insanlığa qarşı vəhşilikləri əks etdirən fotoşəkillər, filmlər nümayiş etdirilir”.

Müəllif vurğulayır ki, Xocalı həqiqətlərinin dünyaya çatdırılmasında Heydər Əliyev Fondunun müstəsna rolu var.

Müəllifə görə, Fondun səmərəli fəaliyyəti sayəsində, əvvəlki dövrlərdən fərqli olaraq, indi beynəlxalq ictimaiyyət erməni qəsbkarlarının insanlığa sığmayan cinayətlərini kəskin şəkildə pisləyirlər.

Məqalədə İslam Əməkdaşlığı Təşkilatı (İKT) Gənclər Forumunun 2008-ci ildən “Xocalıya ədalət!” kampaniyası başladığı və kampaniyaya İKT Gənclər Forumunun rəhbəri Leyla Əliyevanın başçılıq etdiyi qeyd olunur.

Həm də İKT ölkələrində 26 fevral tarixinin humanitar fəlakət qurbanlarını anma günü olması haqda qərar qəbul ediliyi bildirilir: “Xocalı soyqırımının dünya ictimaiyyəti tərəfindən tanınması, ona hüquqi-siyasi qiymətin verilməsi, Ermənistan hökuməti tərəfindən bu soyqırıma görə rəsmi üzr istənilməsi, vurulmuş maddi-mənəvi ziyana görə kompensasiyanın ödənilməsi “Xocalıya ədalət!” beynəlxalq kampaniyasının əsas məqsədidir”.

Müəllif deyir ki, İKT 2012-ci ildən etibarən Xocalı qırğınını törədənlərin məsuliyyətə cəlb olunmasını tələb edir.

Yazı müəllifi qeyd edir ki, İƏT Xocalı soyqırımını tanıyan ilk təşkilatdır, bundan əlavə, 15 ölkə və ABŞ-ın 21 ştatı bu faciəni soyqırım kimi tanıyıb.

Məqalədə deyilir ki, “Xocalıya ədalət!” kampaniyası Xocalı faciəsinə beynəlxalq səviyyədə hüquqi-siyasi qiymət verilməsi, erməni yalanlarının ifşası istiqamətində olduqca uğurlu layihələrdəndir: “Bu cür tanınmalar isə cinayəti törədənlərə cəzasızlığın çox sürə bilməyəcəyi və gec-tez ədalətin zəfər qazanacağı barədə siyasi müraciətin ünvanlanması üçün vacibdir və göründüyü kimi, “Xocalıya ədalət!” kampaniyası hədəflərinə doğru inamla davam edir.

Ölkədə “atəşkəs müharibəsi”

“Azadlıq.info” saytı “Atəşkəs müharibəsi” sərlövhəli məqalədə (https://www.azadliq.info/178853.html) Qarabağ probleminə rəsmi Bakının  münasibəti fonunda şərh verir.

Müəllif hesab edir ki, ölkədə qürurun m qr csoyqırımı davam edir: “Həm hüquqsuzluğun, ədalətsizliyin, saxtakarlığın ölkəmizi işğal etməsindən, həm də 20 faiz torpağımızın düşmən tapdağında olmasından əziyyət çəkirik. Hər iki işğal utancverici, faciəvi, dəhşətlidir”.

Müəllif deyir ki, son günlər döyüş cəbhəsində atəşkəs yenidən pozulub, qarşı tərəf cavab atəşilə susdurulub və itkilər var.

Yazı müəllifi bütün parametrlər üzrə qarşı tərəfdən üstün olduğu halda məğlubiyyətə keşik çəkməyin insanı yandırdığı qənaətindədir. Onun fikrincə, hər dəfə atəşkəsi Azərbaycan tərəf pozmalı, hər dəfə də qarşı tərəfi cavab atəşi açmağa məcbur etməlidir: “Amma hər dəfə müşahidə edirik ki, düşmən atəşkəsi pozub, biz isə bu atəşin sayına uyğun cavab atəşi açmışıq. Sanki, 20 faiz torpağı işğal edilən Azərbaycan deyil, Ermənistandır. Bəli, ermənilər aprel döyüşlərində itirdikləri 800 hektar ərazinin qisasını almaq istəyirlər, hökumətimiz isə düşmənin xahişi ilə döyüşü dayandırıb. Üstəlik, Ermənistana atalıq edən Rusiyadan ədalətli qərar gözləyir”.

Müəllif keçən il aprelin 2-5-də baş vermiş əməliyyatları dayandırmağı zəfərə doğru gedən ordunu dayandırmaq adlandırır, yenə də 10 aydır ki, mənasız danışıqların davam etdirilməsinə diqqət çəkir.

Müəllifə görə, “biz sülhü təmin etmişik” deyənlər, 1 gün də atəşin kəsliməsinə nail olmayıblar.

Müəllif deyir ki, rəsmən atəşkəs rejimi olsa da, atəşkəs dövründə minlərlə əsgər şəhid olub, bunu atəşkəs adlandırmaq olmaz: “Göründüyü kimi, bunların “atəşkəs rejimi” də saxtadır, heç bir müqaviləyə əməl edilmir, nə müharibə etməyə hünərləri, nə də atəşkəsi təmin etməyə qətiyyətləri var. Bu qədər danışıqlardan sonra 1 gün güllə səsinin kəsilməsinə nail ola bilməyənlər, torpağı necə geri qaytaracaq?”.

Məqalədə vurğulanır ki, müharibə başlayırsa, elan edilsin ki, hamı silaha sarılsın, ya Ermənistan tərəfin xahişilə döyüş dayandırılacaqsa, bu, kasıb-kusubun balasını oyunlara alət etmək xəyanətidir. 

Müəllif bu hakimiyyətin dövründə Qarabağın azad olunmayacağını deyir, ölkədə faktiki “atəşkəs müharibəsi” getdiyini bildirir:.

“Analoqsuz hökumətin atəşkəs müqaviləsi də analoqsuzdur. Bəli, sülh danışıqları sədaları altında güllələr rəqs eləyir. Yenə də 3-4 günlük gərginlikdən sonra “danışıqların potensialı tükənməyib”, “düşmən layiqli cavabını aldı” təbliğatını eşidəcəyik”.

İdxaldan artan asılılıq

“Novoe Vremya” qəzetində isə “Azərbaycan ərzaq idxalını artırır” sərlövhəli  (http://www.novoye-vremya.com/w83347/.../#.WLLakjuLTIU) məqalədə müəllif ölkəyə ərzaq məhsulları idxalının artmasını müzakirə edir.

Müəllif rəsmi statistik rəqəmlərə istinadən deyir ki, Azərbaycanda özünütəminat səviyyəsi yüksəlib, belə ki, buğda, qarabaşaq, qarğıdalı, mal-qoyun əti, süd və süd məhsulları, yumurta, bitki yağları, kərə yağı və s. təminat 48-99% arasındadır.  

Yazı müəllifi vurğulayır ki, 2016-cı ildə Azərbaycan kənd təsərrüfatı məhsullarının ixracını 20%-dən çox artırıb, pul ilə ifadədə 426 milyon dollara çatdırıb.

Müəllif bildirir ki, kənd təsərrüfatı naziri Heydər Əsədov kartof və soğan istisna olmaqla, bütün növ məhsulların ixarc edildiyini deyir: 426 milyon dollarlıq kənd təsərrüfatı məhsullarının 108 milyon dolları pomidor-xiyar, 105 milyon dolları qoz-fındıq, 24 milyon dolları pambıq, 15 milyon dolları dəri xammalının və s. payına düşür”.  

Müəllif Dövlət Gömrük Komitəsinə istinadən deyir ki, ölkəyə idxal edilən kənd təsərrüfatı məhsullarının həcmi 2016-cı ildə 35% artıb, idxal sturkturunda ərzaq mallarının xüsusi çəkisi 11%-dən 15%-ə yüksəlib, ət idxalı 2 dəfə, çay idxalı 2 dəfəyə yaxın, buğda idxalı 18%-dən çox artıb”.

Müəllif bu mənfi meylin bu gün də davam etdiyini bildirir və ölkəyə idxal edilən kənd təsərrüfatı məhsullarının həcminin artmaqda olduğunu  vurğulayır.

Məqalədə bu ilin yanvar ayında ərzaq malları idxalının 23%-ə yaxın artdığı deyilir: “Beləliklə, paradoksal durum yaranır, kənd təsərrüfatının inkişafına vəsaitlər qoyulur, amma, bununla belə, ərzaq məhsullarının ölkəyə idxalı artır”.

Müəllif hesab edir ki, burada problem bu yatırımların nə dərəcədə səmərəli olmasındadır. Müəllif deyir ki, maliyyə əlçatmazlığı kənd təsərrüfatının çoxdankı problemidir və hələ də həllini tapmır.

Məqalədə deyilir ki, ekspertlər ixtisaslaşdırılmış kənd təsərrüfatı bankı yaradılması haqda danışsalar da, strateji yol xəritəsində buna dair hər-hansı plan yoxdur.

Müəllif deyir ki, ərzaq idxalı artdıqca manatın məzənnəsilə bağlı bu malların qiymətlərinin artması da qaçılmazdır.