Media-icmal 27.04.21

Azərbaycan mediası ABŞ prezidenti Co Baydenin 1915-ci ildə Osmanlı imperiyasında baş vermiş hadisələri “erməni soyqırımı” adlandırması fonunda ABŞ-Azərbaycan,  Azərbaycan -ATƏT-in Minsk Qrupu və Azərbaycan- Rusiya münasibətlərinin bundan sonrakı inkişafı barədə təhlillərə geniş yer verib.  

“Redaktor.az” saytı isə “Azərbaycan-ABŞ münasibətləri necə olacaq? – eskpert rəyi”  sərlövhəli məqalədə bəhs edilən suallara cavab axtarılır.

Deputat Arzu Nağıyev hesab edir ki, ABŞ prezidentinin “erməni soyqırımı” ifadəsində əsas  məqam bunun sırf siyasi xarakter daşımasıdır.

“Bu gün həm beynəlxaq, həm də regional baxımdan Ermənistandan vasitə kimi istifadə edilir. Ermənilər özləri də fikirləşməlidirlər ki, hansısa ölkənin prezidenti "soyqırım" ifadəsi işlədirsə, bunun hansı hüquqi əsası var? Məlum məsələdir ki, bu bəyanat ABŞ hökuməti səviyyəsində qəbul olunmayacaq. Erməni lobbisinin təsirindən istifadə etmək üçün belə addımların atılması heç Ermənistanın özünə də sərf etmir”, - deputat mövqeyini ifadə edir.  

Deputat bu düşüncədədir ki, Türkiyə ilə Ermənistan sərhədlərinin açılması Ermənistana həm iqtisadi, həm də siyasi tərəfdən çox ciddi divident gətirə bilərdi və bu proseslərdə uduzan Ermənistan olacaq.

Deputata görə, tərəflər arasında müəyyən narazılıqlar, hansısa siyasi gedişlər olsa da, ümumilikdə ABŞ regionda Türkiyə kimi tərəfdaşını itirməyəcək və bu  proses Ermənistanı yenidən problemlərlə üz-üzə qoyacaq səhv addımdır.

“Moderator.az”  saytı “Onlar “Fransa Dağlıq Qarabağın müstəqilliyini tanımalıdır”  açıqlamaları verirlər, biz isə..." sərlövhəli məqalədə Fransa və Rusiya prezidentlərinin Qarabağ probleminin həllilə bağlı telefon danışıqlarından doğan nəticələri politoloqlarla şərh edirlər.

Müəllif  deyir ki, aprelin 26-da Rusiya və Fransa prezidentləri bir sıra məsələlərlə yanaşı Qarabağı da müzakirə ediblər mediaya açıqlamada belə bir cümlə yer alıb: “Makron və Putin yaxın zamanlarda Dağlıq Qarabağ probleminin həlli ilə bağlı ATƏT-in Minsk Qrupu çərçivəsində yeni təşəbbüslər hazırlayacaqlar”.

Bu cümlədən irəli gələrək müəllif hesab edir ki, Azərbaycanın arxasından hansısa xoşagəlməz təşəbbüslər hazırlanır.

Müəllifə görə, “yeni təşəbbüslər” Azərbaycanın əleyhinə yönəlib: “Rusiya və Fransanın Qarabağ məsələsində indiyə qədərki fəaliyyətindən nə fayda əldə etdik ki, bundan sonra Parislə Moskvanın təşəbbüsləri bölgəyə barış gətirsin? Tam əksinə, müharibə bitib, Moskva Bakının arxasında separatçıların lideri ilə məsləhətləşir, Parisdən İrəvana gedənlər isə “Fransa Dağlıq Qarabağın müstəqilliyini tanımalıdır” açıqlamaları verirlər. Biz isə baş verənləri izləməklə məşğuluq..” deyə politoloqlar buna qaşrı əks siyasi gedişlərin olmadığından narahatlıq bildirirlər.

“Azpolitikainfo”  saytı “Rusiyadan çəkinməyə ehtiyac yoxdur”  sərlövhəli məqalədə Rusiya-Azərbaycan münaibətlərini jurnalist Arif Əliyevlə dəyərləndirir.

Arif Əliyev deyir ki, Azərbaycanın İkinci Qarabağ savaşından sonra əldə etdiyi hərbi müstəvidəki üstünlüyü duplomatik sahədə əldən verilir və ermənilərin üç rayondan geri çəkilməsindən başqa heç bir şərt yerinə yetirilmir. 

Jurnalistə görə, hazırda Rusiya-Azərbaycan münasibətlərində gərgin mərhələlərdən biri yaşanmaqdadır və əgər rəsmi Bakı dirəniş göstərərsə Moskva istəyinə çata bilməyəcək.

Arif Əliyev hesab edir ki, Rusiyanın Qarabağdakı sülhməramlı missiyası əksər hallarda ona verilən səlahiyyətləri nümayişkaranə şəkildə aşır. 

Jurnalist hesab edir ki, indi Qarabağın Rusiyanın məsuliyyət zonasında qalan hissəsi əslində məsuliyyətsizlik zonasına çevrilib, hətta Azərbaycan və Türkiyənin dövlət atributlarına hörmətsilzik belə nümayiş etdirilib.  

İndiki halda yaşanan gərginlik Azərbaycanın Rusiyanı öz üzərinə götürdüyü öhdəlikləri yerinə yetirməyə məcbur etmək cəhdidir

Arif Əliyev vurğulayır ki, rəsmi Kreml Azərbaycan Avrasiya İttifaqına, Kollektiv Təhlükəsizlik Müqaviləsi Təşkilatına üzv olmasına çalışır və rəsmi Bakı bu məsələlərdə dirəniş göstərsə Moskva istəyinə çata bilməyəcək.

Azərbaycanaın öz mövqeyində möhkəm dayanması üçün müttəfiqlərə ehtiyacı var və Türkiyə məhz həmin müttəfiqdir.

Yaxın dövrdə Rusiya-Azərbaycan münasibətlərinin gərgin keçəcəyini deyən jurnalist “düşünürəm ki, kəmərləri möhkəm bərkitmək zamanıdır” ifadəsilə də buna işarə edir. Eyni zamanda jurnalistə görə, yaxın zamanda Rusiyanın siyasətində ciddi dəyişiklik edəcəyi inandırıcı deyil.

Ona görə Rusiya  “yeni SSRİ qurmaq” fikrindən hələ vaz keçməyib, odur ki, ən azı yaxın 10 ildə kəmərləri möhkəmlətməliyik, diplomatiya, informasiya istiqamətində vəziyyəti kəksin şəkildə yaxşılaşdırmaq üçün ciddi addımlar atılmalıdır.