Media-icmal 27.05.2016

Qaçqın və köçkünlərə qayğı, İlham Əliyevi “ilin adamı” elan edən biznes jurnalı haqqında bilgi, Azərbaycan-NATO əlaqələri, partiyalar haqqında qanuna nəzərdə tutulan dəyişikliklər, kreditin əlçatanlığı bugünkü medianın aparıcı mövzusudur.  

Qaçqın və köçkünlərin hamisi

“Azərbaycan” qəzeti “Qaçqın və köçkünlərin böyük hamisi” sərlövhəli məqaləsində bu kateqoriya insanlara yaradılan şəraitdən və bu məsələdə dövlət başçısı İlham Əliyevin rolundan danışır. Müəllif bu insanlar üçün 94 qəsəbənin salınması və 6 milyarddan çox vəsaitin xərclənməsi kimi statistik rəqəmlər göstərir.

Müəllifə görə, bu sahədəki əməli addımlar dünya üçün örnəkdir: “Azərbaycanın qaçqın və məcburi köçkünlərə münasibətdə yürütdüyü siyasət, bu qəbildən olan insanların sosial problemlərinin həlli istiqamətində atdığı addımlar, onların mənzil- məişət şəraitinin yaxşılaşdırılmasına xidmət edən çoxsaylı layihələrin həyata keçirilməsi dünyada ən yaxşı örnəklər sırasında yer alır”.

Daha sonra məqalədə bu il aprelin 2-5-də Qarabağ cəbhəsində baş vermiş hərbi əməliyyatlar zamanı zərərçəkən vətəndaşlara da dövlətin köməyi xatırladılır və bu məqam bu kateqoriya insanların problemlərinin daim dövlət başçısının diqqət mərkəzində saxlanması kimi dəyərləndirilir.

Bu haqda məqalədə belə deyilir: “Qeyd olunanlar bir daha belə reallığı da ortaya qoyur ki, Azərbaycan dövləti hər zaman vətəndaşlarının qayğısına qalır, onların problemlərinin həlli dövlət siyasətinin mühüm istiqamətini təşkil edir. Bu məqama toxunan prezident İlham Əliyev qeyd edir: “Azərbaycan dövləti məcburi köçkünlərin problemləri ilə mütəmadi qaydada məşğuldur və bu məsələlərin həlli üçün böyük vəsait ayrılır...”

“The Business Year” jurnalı-avtoritarların dostu

“Azadlıq” qəzeti dövlət başçısı İlham Əliyevi “Dünyada ilin adamı” elan edən “The Business Year” jurnalının yeri və rolu haqqında bilgi verir.

Məqalədə adı çəkilən jurnalın 29 ildir ki, nəşr edilməsinə baxmayaraq, onun tirajı, yayımı haqqında məlumat əldə etməyin mümkün olmadığı nəzərə çatdırılır.  

Daha sonra bu nəşrin kimlərə analoji mükafatlar verməsi açıqlanır: “Deməli, hökumətimizin sevimli “The Bisiness Year” jurnalı bu vaxta qədər Ekvador, Kolumbiya, Mozambik, Tanzaniya, Qazaxıstan, Nigeriya, Zambiya kimi ölkələrin hökumətlərilə əməkdaşlıq edib. Hətta “The Business Year” jurnalı Panamada da “gəzişib. Xatırladaq ki, bu günlərdə Panamadakı offşor şirkətlərlə bağlı ciddi faktlar ortaya çıxıb və bu sənədlərdə Azərbaycanın hakim ailəsinin adı hallanırdı”.

Bundan sonra məqalədə bu jurnalın fəaliyyəti avtoritar rejimlərlə əməkdaşlıq kimi dəyərləndirilir. Bu jurnaldan Azərbaycan hökumətinin təbliğatçıları olan “Azərbaycan”, “Səs”, “Yeni Azərbaycan” kimi qəzetlərin “nəfəsi” gəlməsi xüsusi vurğulanır.

Müəllifin düşüncəsinə görə, rəsmi Bakının belə bir reytinq axtarışna çıxması özünə inamsızlığı ilə bağlıdır: “Bir sözlə, dünyada etimad limiti bitmiş hökumət dünyanın ciddi qəbul etmədiyi bir jurnalın işığına toplaşıb. Özləri yazdırır, özləri seçir, özləri də təsəlli tapırlar. 2015-ci ildə Azərbaycanda adamların ili qara gəldi, bunlar isə 2016-cı ildə “ilin adamı” dərdinə düşüblər”.  

Bir səfər və Azərbaycan- NATO yaxınlığı

“Novoye Vremya ” qəzeti ABŞ-la Azərbaycan arasında hərbi əməkdaşlığın güclənməsi haqda yazır və bu, həm də ABŞ generalı Ben Hodcsin səfəri fonunda baş verir. Müəllif rəsmi Bakı ilə Ağ Ev arasında əlaqələrin daha da möhkəmlənməsini belə izah edir: “İlham Əliyevin bu ilin aprelində ABŞ səfərindən sonra Ağ Evlə münasibətlər istiləşib və əvvəlki strateji əməkdaşlıq həddinə çatıb və B.Hodcsin səfəri də bunun təsdiqidir”.

Daha sonra məqalədə ABŞ, Azərbaycan, Gürcüstan birgə hərbi təlimlərinin keçirilə bilməsi və bunun əhəmiyyəti haqda danışılır. Müəllif gözlənilən təlimlərin regional xarakterli olmasnı istisna etmir.

Müəllifin düşüncəsinə görə, ABŞ Azərbaycan və Gürcüstanla əməkdaşlıq fonunda həm də Qafqazda təkcə Xəzər dənizi akvatoriyasında deyil, bütün Qara dəniz hövzəsində əsaslı şəkildə güclənmək istəyir. Amma müəllifə görə, bu da nəzərdə tutulan strateji hədəfin hamısı deyil: “Azərbaycan-Türkiyə- Gürcüstan hərbi əməkdaşlığı Avropanı narahat zaman yaşayan islam dünyasından qorumaq üçün təhlükəsizlik zolağıdır”.

Müəllifin düşüncəsinə görə, yenə də bütün məsələlər geosiyasi maraqlara tabe edilir və bu əməkdaşlıq formatında Qarabağın azad edilməsi baxışı özünə yer almır. Müəllifin düşüncəsinə görə, Qarabağ münaqişəsinin həllində Azərbaycanın tərəfdaşları arasında Türkiyə istisna olmaqla, digərlərinin hər hansı əməli addım atmağa hazır olmadıqları da nəzərə çatdırılır.

Növbəti repressiya ünvanı: partiyalar

“Dünyanın hər yerində 2 il fəaliyyət göstərməyən partiyaların qeydiyyatı ləğv edilir və biz də bununla bağlı qanuna dəyişikliklər hazırlaşmışıq”. Deputat Siyavuş Novruzov  “Siyasi partiyalar haqqında” qanuna dəyişiklikləri  “Yeni Müsavat” qəzetinə belə şərh edib. S.Novruzov dəyişikliklər layihəsinin baxılmaq üçün artıq beynəlxalq təşkilatlara verildlyini də bildirib.

S.Novruzov dəyişikliklərin partiyaların maliyyə hesabatlarına və fəaliyyətlərinə aid olduğunu deyir, həm də partiyalara maliyyə mənbələrini gizlətmək ittihamı irəli sürür. “Partiyaların bəzilərinin məlumatlarında maliyyənin sıfıra bərabər olduğu göstərilir. Amma həmin partiyaların qərargahlarında onlarla insan çalışır, avtomobilləri, cangüdənləri var. Odur ki, təklif edirik ki, maliyyə hesabatı verməyən partiyalarla bağlı qanuni tədbirlər görülsün”.

Demokrat Partiyası nəzərdə tutulan bu dəyişiklikləri müxalifət partiyalarına təzyiq üçün bəhanə, onları sıxdırmaq kimi dəyərləndirir.

Vətəndaş və İnkişaf Partiyasına görə, bu, artıq siyasi repressiyanın partiyalara tətbiq olunmasıdır.  Müsavat Partiyası hesab edir ki, bu dəyişikliklər onsuz da mürtəce olan qanunun daha da eybəcərləşdirilməsidir. Milli İstiqlal Partiyası isə bu dəyişikliklərin partiyaların sıradan çıxarılmasına hazırlıq olduğu qənaətindədir.

Kreditin şərti: 410 manat maaş

“Bu o deməkdir ki, əhalinin 77%-i kredit ala bilməyəcək”. “Bizim Yol” qəzeti bəzi bankların maaşları 410 manatdan aşağı olan şəxslərə kredit veməmək qərarını ekspert Rövşən Ağayevin  belə şərh etdiyini bildirir. 

R.Ağayevin fikrincə, bu halda ancaq əhalinin 23 %-i kredit almaq imkanına malik ola biləcək. “Aydın məsələdir ki. banklar krediti qeyri-leqal əməkhaqqı əsasında yox, rəsmi maaşlara görə verəcək. Dövlət statistikasında olan son məlumata görə, maaş cədvəlinə qol çəkənlərin 77%-nin əmək haqqı 400 manatdan aşağı olub. Deməli, maaşla işləyən insanların ən yaxşı halda 23%-i kredit əldə edə biləcək”.