Media-icmal 27.07.19

Yaylaq festivalından gözləntilər, II-III ixtisas qrupları üzrə imtahanların nəticələrinə ekspert baxışı, ilin sonuna gözlənilən bahalaşmanın səbəbləri və s. məsələlər bugünki (27 iyul 2019-cu il) medianın aparıcı mövzularındandır...

Elat mədəniyyəti - turizm potensialı

"Azərbaycan" qəzeti "Gədəbəydə ilk dəfə Milli Yaylaq Festivalı keçirilir" sərlövhəli məqalədə iyulun 26-dan 28-dək keçiriləcək Yaylaq Festivalının mahiyyətini dəyərləndirir.

Müəllif Azərbaycanda yaylaq və elat ənənələrinin yaşadılması və təbliği məqsədilə iyulun 26-da ilk dəfə olaraq Gədəbəy rayonunda Milli Yaylaq Festivalına start verildiyini bildirir.

Müəllif deyir ki, Festifal Gədəbəy rayonunun ərazisində yerləşən Düzyurd-Miskinli yaylağında bir çox yerli və beynəlxalq qurumların dəstəyi, 16 ölkənin nümayəndələrinin, yerli və xarici turistlərin iştirakı ilə baş tutub.

"Festivalın təşkilinin əsas məqsədi Azərbaycan xalqının zəngin və çoxəsrlik mədəni irsini, yüz illərlə formalaşmış yaylaq və elat mədəniyyətinin, unikal mədəniyyət nümunələrinin və tarixi abidələrinin nümayiş etdirilməsi və ərazinin turizm potensialının üzə çıxarılmasından ibarət olduğunu diqqətə çatdırmaqdır", deyə yazıda vurğulanır.

Yazıda deyilir ki, festivalın təşkili həm tarixi adət-ənənələrə bağlılığın təcəssümü, həm də tək Gədəbəyin yox, Azərbaycanın gözəlliklərini, onun diyarlarını, təbiətini nümayiş etdirmək üçün bir fürsətdir.

Müəllifin dediyinə görə, Miskinli yaylağında orijinal üslubda salınan "Yaylaq yurdu" adlı etno-qəsəbədə yaşayış yurdları (alaçıqlar) ilə yanaşı, cıdır meydanı, yaylaq (kənd təsərrüfatı) bazarı, sənətkarlıq guşəsi, "Dədə Qorqud" ocağı (tamaşaçılar üçün səhnə), yaylaq yatağı (ev heyvanları üçün yerlər), pəhləvan meydanı, "Aşıq Ələsgər" ocağı, yaylaq süfrəsi və digər tematik sahələr yaradılıb.

Məqalədə vurğulanır ki, festival şərti olaraq mədəni-etnoqrafik, milli-yaylaq (idman) oyunları və eko-etnoturizm adlı üç hissədən ibarətdir.

Müəllif vurğulayır ki, mədəni-etnoqrafik hissədə aşıqların deyişməsi, milli rəqslər (yallılar, cəngilər), xalq mahnıları, müxtəlif xalq səhnələri və tamaşaları, əski xalq oyunları (dirədöymə, çilingağac, əzəldəyməz, müçük, aşıq-aşıq, molla mindi) təşkil olunacaq, yaylaq kulinariya nümunələri (odun üzərində bişən xörəklər - dovğa, çoban buğlaması, sacüstü kətələr, kabablar və sair) təqdim ediləcək.

Festivalın milli yaylaq (idman) oyunları şərti adı altında keçirilən hissəsində qədim kökə söykənən yorğa at yarışları (müxtəlif məsafə və kateqoriyalarda), milli güləş yarışı, çaparaq at yarışları, çoban güləşi (kəmər güləşi), nümunəvi çıxışlar, atüstü milli oyunlar - Çövkən, Baharbənd, Sürpapaq, Piyalə, Ər endir (atüstü güləş), Gərdək qaçırmaq, Zorxana, Kəndirbazlıq və ox atma təşkil olunacaq.

Yaylaq festivalının eko-etnoturizm hissəsində isə turistlər üçün köhnə ənənəvi üslubda düzəldilmiş yurdlarda qalmaq imkanı yaradılıb, şərti olaraq XVIII əsrin ənənəvi yaylağına səyahət də təşkil ediləcək, belə ki, burada turistlər gün ərzində adi kənd həyatını yaşayacaqlar: "Yəni, inək, qoyun-keçi otaracaq, onları sağacaq, ot biçəcək, taya düzəldəcək, atlara qulluq edəcək, nehrə çalacaq, tətbiqi sənətlə məşğul olacaq, milli xörəklərdən bişirəcək və dəyəndə gecələyəcəklər.

Həmçinin bölgənin məşhur yerlərinə - Koroğlu qalası, Mahrasa məbədi, Qız qalası və digər məkanlara turlar, at gəzintiləri, "Alman izləri" adlı xüsusi ekskursiyalar təşkil olunacaq.

Təhsildə dəfələrlə azalan "uğur nəticələri"

"Modern.az"da isə "II-III ixtisas qrupları üzrə yüksək bal toplayanların sayı azalıb-rəqəmlər" sərlövhəli məqalə oxumaq olar.

Sayt II-III ixtisas qrupları üzrə imtahanların nəticələrinə əsasən təhsil sahəsi üzrə ekspert Kamran Əsədovun bu nəticələri dəyərləndirməsinə yer verib.

Ekspert "bu il qəbul imtahanlarında II-III ixtisas qrupları üzrə yüksək bal toplayan abituriyentlərin sayı ötən illə müqayisədə dəfələrlə azdır", deyə nəticələrin heç də ürəkaçan olmadığını bəyan edir.

Ekspert K.Əsədov qəbul imtahanlarının nəticələrini paylaşıb, bu göstəriciləri ötən illə müqayisə edib və məlum nəticə bu olub ki, bu il yüksək bal toplayan abituriyentlərin sayı ötən il ilə müqayisədə dəfələrlə aşağıdır.

Daha sonra isə ekspert konkret nəticələri təqdim edir və nəticələrin azalma hədlərini göstərir.

"Ekspertin müqayisəsinə görə, II ixtisas qrupu üzrə 690-700 arası bal toplayan abituriyent cəmi 1 nəfər olub. Halbuki, 2018-ci ildə bu rəqəm 16 nəfər təşkil edirdi.

680-689 arası bal toplayan abituriyentlər isə 6 nəfər olub ki, bu da ötən illə müqayisədə 7 dəfə azdır. Ötən il həmin balı 42 nəfər toplamışdı.

670-679 arası bal toplayan abituriyentlərin sayı bu il 15 nəfər, keçən tədris ilində isə 82 nəfər təşkil edib.

Müvafiq olaraq, 660-669 arası bal toplayan abituriyentlər 2019-cu ildə 35 nəfər, 2018-ci ildə isə 129 nəfər olub.

Nəhayət, II ixtisas qrupu üzrə 650-659 arası bal toplayan abituriyentlər 69 nəfərdir, ötən il isə 182 nəfər idi".

K.Əsədov III ixtisas qrupu üzrə də nəticələri təqdim edir və burada da vəziyyətin yaxşı olmadığını bildirir.

Bu il III ixtisas qrupu üzrə 690-700 arası bal toplayan abituriyentlər cəmi 2 nəfər olub. Halbuki, keçən il bu rəqəm 39 nəfər təşkil edirdi.

680-689 arası bal toplayan abituriyentlər 2019-cu ildə 9 nəfər, 2018-ci ildə isə 86 nəfər təşkil edib.

670 - 679 arası bal toplayan abituriyentlər cari tədris ilində 28 nəfər, ötən il isə 149 nəfər olub.

660-669 arası ballıq nəticəni 52 nəfər göstərib ki, bu da ötən il üçün kifayət qədər az rəqəmdir. Çünki 2018-ci ildə eyni nəticəni 227 nəfər göstərib.

650-659 arası bal toplayan abituriyentlər 93 nəfər olub, keçən il isə 300 nəfər idi.

K.Əsədov ümumi göstəricilərə əsasən qeyd edib ki, 400 baldan yüksək nəticə göstərənlər əvvəlki ilə nisbətdə kəskin azalıb: "Bu da bizə II və III qrup üzrə keçid ballarının aşağı düşəcəyini deməyə imkan yaradır", deyə ekspert əlavə edib.

İlin sonuna qiymətlər bahalaşacaq

"Marja.az"da isə "İlin sonuna qiymətlərin qalxacağı proqnozu verildi - rəsmi" sərlövhəli məqalə oxumaq olar.

Müəllif iyulun 26-da Mərkəzi Bank rəhbərliyinin keçirdiyi mətbuat konfransına istinadən ölkə iqtisadiyyatında gözlənilən halları şərh edir.

Yazıda vurğulanır ki, Mərkəzi Bank bu ilin sonunda inflyasiyanın 6%-dək yüksələcəyini proqnozlaşdırır və inflyasiyanın səviyyəsinin artacağına başlıca təsir kimi ərzaq qiymətlərinin artımını göstərir.

"Dəqiqləşdirilmiş proqnozlara görə cari ilin sonuna qədər inflyasiyanın hədəf diapazonunda (4±2%) olacağı, lakin, daxili tələbin genişlənməsilə bağlı ilin sonuna hədəf intervalının yuxarı hissəsində formalaşacağı gözlənilir". "Marja" xəbər verir ki, bu, faiz qərarı ilə bağlı Mərkəzi Bankın dünən yaydığı press-relizdə deyilir.

Müəllifin sözlərinə görə, inflyasiya səviyyəsinə başlıca təsiri ərzaq qiymətlərinin artımı (4.3%) göstərir, tərəvəz məhsullarının, aksizli malların qiymət artımları ərzaq inflyasiyasının səviyyəsini şərtləndirən başlıca amillərdir. Qeyri-ərzaq (1.3%) və xidmətlər üzrə illik qiymət artımı (2.3%) inflyasiya hədəfi diapazonunun mərkəzindən aşağıda formalaşmışdır.

Məcmu tələbin genişlənməsi şəraitində anti-inflyasyon monetar şərait, habelə ikitərəfli və çoxtərəfli məzənnələrin dinamikası inflyasiya təzyiqini səngidir.

"Real sektor monitorinqinin nəticələrinə əsasən, iyunda qiymət gözləntiləri əvvəlki aya nəzərən ticarət və tikinti sektorlarında azalmış, qeyri-neft emal sənayesində və xidmət sahələrində isə artmışdır. Ev təsərrüfatları arasında iyun ayında aparılan sorğunun nəticələrinə görə inflyasiya tempinin yüksələcəyini gözləyən respondentlər azalmaqda davam edir və onların payı cəmi 2.3%-dir.

Bununla belə, aparılmış təhlillər inflyasiya gözləntilərinin həssas və asimmetrik olduğunu göstərir. 2019-cu ilin sonuna inflyasiyanın hədəf daxilində (4±2%) qalacağı, daxili tələbin genişlənməsilə bağlı ilin sonuna onun hədəf intervalının yuxarı hissəsində formalaşacağı proqnozlaşdırılır", deyə Mərkəzi Bank bildirir.