Media-icmal 28.11.2016

“Made in Azerbaijan” brendinin təşviqi, xarici investorların Azərbaycana maraq göstərməməsi, müxalif gənc siyasi fəalların həftəsonu həbsləri bugünkü medianın aparıcı mövzusudur.

Uğurlu təşviq: “Made in Azerbaijan”

“Azərbycan” qəzeti “Made in Azerbaijan” brendi xarici bazarlarda uğurla təşviq olunur (http://www.azerbaijan-news.az/ ) sərlövhəli məqalədə  bu yöndə atılan addımlardan bəhs edir.

Müəllif deyir ki, bu ilin əvvəllərindən etibarən həyata keçirilən yeni iqtisadi siyasətin əsas istiqamətlərindən biri də sahibkarlığın inkişaf etdirilməsidir. Bundan irəli gələrək bu sahədə yoxlamaların iki il müddətinə dayandırılması, lisenziya tələb edən fəaliyyət növlərinin sayının azaldılması, sahibkarların hüquqlarının qorunması ilə bağlı Apellyasiya şuralarının yaradılması və  həyata keçirilən islahatların tərkib hissəsi sayılır.

Məqalədə vurğulanır ki, bu yöndə reallaşan islahatların prioritetlərindən biri də ixracın genişləndirilməsi, “Made in Azerbaijan” brendi altında qeyri-neft məhsullarının istehsalı və xarici ölkələrə satışının təşviqidir.

Müəllif bu məqsədlə dövlət başçısı İlham Əliyevin 2016-cı ildə adı çəkilən sahəyə aid imzaladığı sənədləri xatırladır: “Dövlət başçısının tapşırıqlarına uyğun olaraq rəqabətqabiliyyətli və ixracyönlü yerli məhsulların xarici bazarlarda “Made in Azerbaijan” brendi altında təşviqi istiqamətində aidiyyəti dövlət qurumları tərəfindən kompleks tədbirlər görülməkdədir”.

Yazıda deyilir ki, bu sənədlərdə “Made in Azerbaijan” brendinin xarici bazarlarda təşviqi və marketinq fəaliyyətinin dəstəklənməsi geniş yer alır, qeyri-neft məhsullarının ixracının stimullaşdırılmasına əhəmiyyətli təkan verir.

Müəllif vurğulayır ki, artıq şərab istehsalı və ixracı sahəsində ilkin uğurlar var, Çində və Honkonqda keçirilən sərgilərdə “Savalan” şərabı qızıl medal alıb.

Müəllif hesab edir ki, son illərdə özəl bölmənin inkişafına dövlət dəstəyinin daha da gücləndirilməsi, yerli məhsullar istehsalını artırıb, ixrac imkanlarını genişləndirib: “Sənaye zonalarının, aqroparkların yaradılması ilə bağlı işlərin intensivləşdirilməsi və bu ilin əvvəlindən başlanan yeni islahatlar yerli istehsalın artırılmasına, ixracın genişləndirilməsinə əlavə stimul yaradıb. Bütün bunların nəticəsi olaraq getdikcə xarici iqtisadi fəaliyyət iştirakçılarının və ixrac olunan məhsul çeşidlərinin sayı artmaqdadır.    

Nə qədərki biznes mühitində dəyişiklik yoxdur ...

“Exo” qəzetində “Azərbaycan xarici biznesmenləri cəlb etmir” sərlövhəli məqalədə (http://ru.echo.az/?p=51850) ölkəyə xarici biznesmenlərin maraq göstərməməsini ekspert Rəşad Əliyevlə müzakirə edir.

“Hətta daşınmaz əmlak sahəsində belə Bakı xarici biznesmenləri maraqlandırmır, odur ki, regionlara maraq məsələsindən danışmağa belə dəyməz. Ölkədə normal şərait yaradılmayınca və biznes mühiti dəyişməyincə, Azərbaycanın mənzil bazarına tələbat ancaq yerli əhali tərəfindən olacaq”. Ekspert Rəşad Əliyev bu sahədəki durumu qəzetə belə dəyərləndirir.

Ekspert bir çox ölkələrin xarici investorlara ölkələrində daşınmaz əmlak almalarına icazə verdiyini, bundan sonra iş adamının həmin ölkədə biznes qurmağa başladığını vurğulayır. Ekspertə görə, Azərbaycanın regionlarında biznesin inkişafına şərait yaradılmayıb. R.Əliyev deyir ki, xarici iş adamları kapitalın çox olduğu, iş adamları üşün normal iqtisadi və hüquqi şərait olan ölkələrdə biznes qururlar.

Amma bununla belə müəllif yerli rieltorlara istinadən son zamanlar Azərbaycana səfərləri sıxlaşan ərəb turistlərin mənzıl bazarında qiymətlərlə maraqlandıqlarını bildirir. Məqalədə deyilir ki, onlar hələ mənzil almırlar. Amma müraciətlərin çoxalması belə mənzil bazarında canlanma yaradır. Məqaləyə görə, ərəb turistləri daha çox Bakının mərkəzindəki evlər maraqlandırır və daha çox mənzillərin icarəyə götürülməsinə üstünlük verilir.

Müəllifə görə, bu, sadəcə olaraq ərəb turistlərin şəxsi maraqları ilə bağlı olan müraciətlərdir və bunun arxasında hansısa konkret biznes maraqları dayanmır.

Məqaləyə görə,  ərəb turistlər daha çox Bakıdakı mənzilin qiymətlərilə öz ölkələrindəki  qiymətləri müqayisə edirlər.

Müəllif rieltorlara istinadən belə bir məqamı da yada salır ki, Azərbaycanın coğrafi baxımdan əlverişli mövqedə olması ailəvi baxımdan turist səfərinə çıxmaq üçün əlverişlidir. Bu fakt da xarici turistlərin Bakıda mənzil almaq istəklərinə isti yanaşmalarının səbəblərindən biridir.

Amma məqalədə bütün bu maraqların bizneslə bağlı olması kimi qəbul edilməsinin doğru olmadığı da nəzərə çatdırılır. Bundan uzağa gedən nəticələr çıxarmağa tələsməmək məsləhət görülür.

Vəkil: “İstirahəti də əlimizdən alıb”

“Azadlıqinfo” saytı “Hər cümə günü bir cəbhəçi tutulur” sərlövəhli məqalədə

(http://www.azadliq.info/167432.html) tanınmış vəkil Əsabəli Mustafayevin düşüncələrinə yer verib.

Vəkil saxlanılaraq 30 sutka həbs cəzası alan Xalq Cəbhəsi Partiyası Gənclər Komitəsinin üzvü İslam Sahiboğlu ilə görüşdüyünü bildirir. 

Ə.Mustafayev İ.Sahiboğlunun həbsini əsassız adlandırır, rəsmi tərəfin həbsə səbəb kimi gənc fəalın özünü nalayiq aparmasını, polisin tələblərinə tabe olmamasını “köhnə hamamdalı köhnə tas söhbəti” kimi dəyərləndirir. 

Vəkil eyham vurur ki, adətən belə həbslərlə bağlı Avropa Məhkəməsinə şikayətlər edilir, nəticədə də belə əsassiz həbslərə görə hökumət cərimə edilir. Bununla bağlı vəkil deyir: “Deyəsən, hökumət indiki və gələcək büdcələrdəki bütün avroları cəbhəçilərə xərcləmək istəyir”.

Daha sonra vəkil diqqəti daha bir maraqlı məqam üzərinə cəmləyir ki, bu da siyasi fəalların həftə sonu həbs olunmalarıdır. Həm də bu vəkil bu faktlara özünəməxsus şəkildə obrazlı yanaşma təqdim edir: “Hökumət cəbhəçilərin tutulması üçün qrafik tərtib edib. Son aylar hər cümə günü bir nəfəri tutur. Mən də məcbur olub şənbə günü gedirəm cəzaçəkmə müəssisəsinə həbsdə olanla görüşmək üçün”.

Vəkil bununla bağlı bir məsələni də xatırladır ki, bu həftəsonu həbslər istirahətini də əlindən alıb.

Vəkilin bildirdiyinə görə, bu həbslərlə bağlı apellyasiya şikayətlərini hazırlamaq üçün ancaq şənbə və bazar günü vaxtı olur, çünki bazar ertəsi artıq şikayət apellyasiya şikayəti instansiyasına çatdırılmalıdır. Belə şikayətlər üçün cəmi 3 gün müddət olduğu üçün şikayət bundan geç verilə bilməz.   

Vəkil bu məsələ ilə bağlı bir məqama da toxunur və bunu diqqətə çatdırır: “Topladığım məlumatlar əsasında şənbə və bazar günləri apellyasiya şikayəti tərtib edirəm ki, 1-ci gün məhkəməyə təqdim edim. Onsuz da bu həbslər və Avropa Məhkəməsindəki işlər son 5 ildə bayram və istirahət günlərini vəkillərin əlindən alaraq istirahətdən məhrum edib”.