Media-icmal 29.03.21

Ermənilərin "daş atəşinə" tutulması, rus dilini “iknci rəsmi dil” sayması iddiaları ilə Qarabağda dolanan siyasi oyunlar, Acınohurda ərəb ovçuların düşərgələrinin sökülməsi, Azərbaycana vaksinlərin hələ də təqdim olunmamasının səbəbləri və s. məsələlər medianın aparıcı mövzuları sırasındadır... 

Qarabağda məskunlaşan ermənilər iddia edirlər ki, Azərbaycanın Əsgəran rayonu ərazisində “Azərbaycan hərbiçiləri” ermənilərin avtomobillərini “daş atəşi”nə tutub və beləliklə, rəsmi Bakı üçtərəfli razılaşmanı pozub. Bu barədə “Yenisabah.az” saytında yer alan “Qarabağdakı terrorçu rejimdən növbəti həyasız iddia – Bu ssenarini kim yazır?” sərlövhəli məqalədə danışılır.

Müəllifə görə, bundan öncə ermənilər Cəbrayıl rayonunda “kilsənin yoxa çıxması” hay-küyü qaldırmışdılar. Həm də müəllif diqqəti ona çəkir ki, nə üçünsə belə hadisələr Rusiya sülhməramlılarının təsir dairəsində olan ərazilərdə baş verir.

Ermənilərin iddiasına görə, “maşına daş atmaq” Xocalı rayonunun Dağyurdu kəndilə Əsgəranın “Karmir Qyux” kəndi arasındakı ərazidə baş verib, hətta sülhməramlı kontingentin komandanı Rüstəm Muradova müraciət edilib.

Müəllif deyir ki, martın 26-da yayılan məlumata görə, “Artsax Respublikası”nın daxili təhlükəsizliyi səbəbilə rus və erməni əməkdaşlarından ibarət əməliyyat və xilasetmə qrupu dövlət fövqəladə hallar xidmətinin Lisaqor bazasında birgə növbətçilik xidməti aparacaq.

“Azərbaycanlıların daş atması”nın ardınca sülhməramlıların anti-Azərbaycan qərarı göstərir ki, Xankəndindəki bütün ssenarilər əslində “rus dilində” yazılır və burada səhnələşdirilməsi üçün erməni terrorçularına təqdim edilir.

Qax Dövlət Təbiət Yasaqlığı ərazisində ərəblərin qurduğu çadırlar sökülüb, bununla bağlı Ekologiya və Təbii Sərvətlər Nazirliyi yanında İctimai Şura bəyanat yayıb. Bu haqda isə “Bizimyol-info.az” saytında yer alan “Ərəblərin Qaxdakı çadırları söküldü: Baş verənlərə görə kim cavab verəcək...” sərlövhəli məqalədə danışılır.

Yada salaq ki, bu günlərdə Azərbaycana gələn bir qrup ərəb, ov mövsümü bitməsinə baxmayaraq, Qax rayonundakı Acınohur qoruğunda qanunsuz ov etmişdi və bu hadisə medianın və sosial şəbəkələrin gündəminə çevrilmişdi.

Məqalədə vurğulanır ki, Qax Dövlət Təbiət Yasaqlığı ərazisində, Acınohurda ərəblərin nadir quşları və heyvanları ovlamasını əks etdirən görüntülər yayılmış, buna ictimaiyyət tərəfindən kəskin təpki göstərilmişdi, ərəb turistlər müvafiq qaydada cəzalandırılmışdılar.

Məqalədə bu iddia da vurğulanır ki, qadağan olunmuş ərazilərdə ovla məşğul olan ərəblərdən biri sosial şəbəkədə iddia etmişdi ki, onlar qoruq ərazisinə daxil olmaq üçün Ekologiya və Təbii Sərvətlər Nazirliyinə adambaşına 2500 dollar qeyri-rəsmi ödəniş edirlər. Həmçinin, o, əraziyə gətirilən hər şahin quşuna görə də 500 dollar ödənildiyini yazıb.

Koronavirus infeksiyası əleyhinə vaksinlərin dünya dövlətlərinə çatdırılmasında bəzi dairələrin ikili yanaşması, ədalət prinsipinə riayət etməməsi ümumən dünya, o cümlədən də Azərbaycan üçün problemlər yaradır. Bu mövzu isə “Müsavat.com” saytında dərc olunan “COVAX-ın vaksin oyunu: Azərbaycana qarşı bu cür qərəzin səbəbi nədir?” sərlövhəli məqalədə yer alır.

Müəllifə görə, virus əleyhinə vaksinin olmasına baxmayaraq, dünyada koronavirusa yoluxanların sayı yenə də artan xətt üzrə gedir və hazırda dünyada koronavirusa yoluxanların sayı 127 milyon 362 min 208 nəfərdir. Bu zamana qədər koronavirusdan 2 milyon 790 min 830 nəfər dünyasını dəyişib.

Müəllif deyir ki, vaksinlərin ədalətli bölgüsü və əlçatanlığı məqsədilə yaradılmış COVAX beynəlxalq təşəbbüsünə ilk qoşulan və dəstək verən ölkələrdən biri Azərbaycan olsa da, BMT bütün dövlətləri vaksinlə təmin edəcəyi vədi versə də, buna əməl olunmadı.  

Məqaləyə görə, varlı dövlətlər vaksin istehsalçıları ilə birbaşa danışır və bütün peyvəndləri alır, kasıb dövlətlər isə vaksini əldə etməkdən məhrum olurlar.

Azərbaycan tərəfinə vaksinlərin razılaşdırılmış qaydada çatdırılacağı deyilsə də, hələ ki, Azərbaycana vaksin təqdim edilməyib. Durumu təhlil edən ekspertlər isə belə yanaşmanı qeyri-ciddi sayırlar.

Qarabağın Rusiya sülhməramlı qüvvələrinin nəzarətindəki hissəsində rus dili “ikinci rəsmi dil” elan olunub və bununla bağlı erməni seprataçılarının “parlamenti” qanuna əlavə edib.

“Azpolitika.info” “Separatçıların “rus dili” təxribatının pərdəarxası - Qərar Rusiyanın razılığı ilə verilib” sərlövhəli məqalədə məsələyə aydınlıq gətirir.

Məqalədə Azərbaycan Xarici İşlər Nazirliyinin buna reaksiya vermədiyi vurğulanır.

Vəkil Fuad Ağayev hesab edir ki, “Dağlıq Qarabağ Respulbikası” adlı siyasi qurum olmadığı üçün onun “parlamenti” kimi təqdim edilən qurumun qərarının hüquqi qüvvəsi ola bilməz. Vəkil yada salır ki, “dqr”i bir dövlət belə tanımayıb, oyuncaq qurumdur, buna görə də qərarın legitimliyi, hüquqi qüvvəsi ola bilməz.    

Vəkil hesab edir ki, bu addımla separatçı ermənilər Rusiyaya yarınmaq istəyirlər.

Vəkil deyir ki, Azərbaycan parlamenti işğal atında olan ərazilərin idarə olunmasına dair qanun qəbul etməlidir və həmin ərazilər tədricən Azərbaycan qanunvericiliyi əsasında idarə olunmalıdır.