Media-icmal 29.07.2016

Ölkədə iqtisadi inkişaf, referendumun tələsik keçirilməsi səbəbləri, təhsildəki problemlər, turizm sahəsindəki bahalıq bugünkü medianın aparıcı mövzusudur.       

Azərbaycan –iqtisadi inkişaf məkanı

“Azərbaycan” qəzeti ölkənin daxili dinamik inkişafına dair “Azərbaycan bölgədə təhlükəsizlik, sabitlik və inkişaf  məkanıdır” sərlövhəli məqalə ilə çıxış edib. (http://www.azerbaijan-news.az/index.php?mod=3&id=101955).

Məqalədə ölkənin yerləşdiyi regionda qeyri-sabitlik olduğu, amma buna baxmayaraq, bu ilin 6 ayında da ölkədə makroiqtisadi sabitliyin təmin edildiyi deyilir. Ölkədə iqtisadiyyatın şaxələndirildiyi, dayanıqlı inkişafın təmin olunduğu qeyd edilir. Ötən 6 ayda qeyri-neft sahəsinin 2,4% artdığı, ölkə iqtisadiyyatına 6,3 milyard manat sərmayə qoyulduğu vurğulanır. Bütün bu iqtisadi uğurların əldə edilməsi yürüdülən siyasətin və dövlət başçisı İlham Əliyevin iradəsinin nəticəsi kimi dəyərləndirilir: “Bu gün Azərbaycanın dayanıqlı və sabit inkişafı üçün proqressiv proqram və konsepsiyalar həyata keçirilir. Cənab İlham Əliyevin siyasi iradəsinə uyğun olaraq hökumətin fəaliyyəti ilə bağlı müntəzəm hesabat verməsi cəmiyyətdə şəffaflığın və sosial ədalət normalarının qorunmasını təmin edir”.

Ölkə iqtisadiyyatının sosialyönlü olduğu, insan amilini nəzərə aldığı xüsusi vurğulanır, qlobal böhran şəratində onun inkişafı neqativ proseslərə müqavimət gücü göstərməsi kimi dəyərləndirilir. Son 6 ayda qəbul edilən sərəncam və qərarların ölkə iqtisadiyyatının inkişafına təsiri xüsusi qeyd olunur.

Məqalədə qarşıdakı illərdə də bu siyasətin xalqı uğurlu gələcəyə aparacağına ümid edildiyi vurğulanır. 

Bahalaşan dollar və tələsik referendum

Azadlıq” qəzetindəki  “Referendumun tələsik keçirilməsinin pərdəarxası” sərlövhəli məqalədə (http://www.azadliq.info/148977.html) müəllif  Konstitusiyaya dəyişikliklərin tələsik həyata keçirilməsi suallarına cavab axtarır.

Müəllifə görə, bu tələsikliyə ilkin səbəb ölkədə davam etməkdə olan ağır iqtisadi böhrandır. Məqalədə bu məqam belə izah edilir: “Hazırda ölkə dərin iqtisadi böhran keçirir, manat hər gün ucuzlaşır, ekspertlərin sözlərinə görə, mayın 26-dan iyulun 26-dək dollar 10 qəpik bahalaşıb”. Bundan irəli gələrək müəllif bu ilin oktyabr-noyabr aylarında 1 dolların ən yaxşı halda 1.80 qəpik olacağının gözlənildiyini deyir, amma manatın ucuzlaşmasının  sürətlənə bilməsini istisna da etmir.  Müəllif vurğulayır ki, rəsmi Bakı bütün bunların fərqindədir və referendumu tez keçirməyi daha məqsədəuyğun sayır.

Müəllifin bildirdiyinə görə, qarşıda hakimiyyətin hüquq-mühafizə orqanları və silahlı qüvvələrlə bağlı narazılığa səbəb olacaq qərarı var və söhbət hüquq-mühafizə orqanlarında və silahlı qüvvələrdə xidmət müddətinin artırılmasından gedir. Bu barədə ölkə başçısı Ilham Əliyev ötən ay sərəncamlar imzalayıb. Qeyd edək ki, dəyişikliklərdə hüquq-mühafizə orqanları və silahlı qüvvələrdə xidmət müddəti artırılır. Bu, “Əmək pensiyaları haqqında” qanuna dəyişikliklərlə bağlıdır. Müəllif yazır ki, “Azadlıq” hələ bir müddət öncə bildirmişdi ki, “Əmək pensiyaları haqqında” qanunda dəyişikliklərin edilməsi layihəsi baş nazir Artur Rəsizadəyə təqdim edilib. Layihədə hüquq-mühafizə orqanları əməkdaşlarının və silahlı qüvvələrdə xidmətkeçmə müddətinin artırılması təklif olunur.

Müəllifə görə, hakimiyyət düşünür ki, referendumu bundan sonra keçirmək doğru deyil və bu halda hüquq-mühafizə orqanlarının narazılığı referenduma etirazların qarşısını almaqda çətinlik yaradar. Müəllifin fikrincə, bu məqam hakimiyyətin hüquq-mühafizə orqanlarına etibar etməməsinin göstəricisidir.

Geridə qalan təhsil

“Exo” qəzeti isə “Təhsil mürəkkəb sosial sistemdir” sərlövhəli məqalədə

(http://www.echo.az/article.php?aid=103294) Müstəqil Müəllimlər Birliyinin rəhbəri Məlahət Mürşüdlü ilə abituriyentlərin bu il təhsildə qazandıqları nəticələri müzakirə edir.

M.Mürşüdlüyə görə,  ölkə məktəbləri proqram tərtibi sahəsində məktəblərimiz geri qalır: “Abituriyentlərə proqram tərtib etməkdə geri qalırıq və bu, daha çox şagirdin düşüncə tərzini göstərən məsələlərə aiddir. M.Mürşüdlü builki qəbul imtahanlarında II və III qrup abituriyentlərinin yarıdan çoxunun 200 baldan çox toplya bilməməsini belə izah edir.

M.Mürşüdlü ilbəil abituriyent göstəricilərinin nəinki yaxşılaşmadığını, əksinə get-gedə daha da pisləşdiyini deyir: “Bu daha çox onunla bağlıdır ki, suallar tərtib edildikdə onların çoxu məktəb proqramı ilə üst-üstə düşmür, bu isə abituriyentlərə çətinliklər yaradır.

Təhsil üzrə digər ekspert Şahlar Əsgərov deyir ki, ölkə təhsilində kardinal dəyişikliklər baş verməyib, buna görə də ölkə təhsili müasir tələblərə cavab vermək gücündə  deyil. Ş.Əsgərov qısa zamanda bu sahədə durumun yaxşılaşacağını gözləməyin əbəs olduğunu deyib. Ş. Əsgərova görə, İmtahan Mərkəzi və Təhsil Nazirliyi qəbul imtahanları ilə bağlı suallar üzərində birgə çalışmalıdırlar. Ekspertlərə görə, abituriyentlərin 56%-nin 200 və daha aşağı bal toplaması düşünməyə vadar edir.  

Qiymət baha, xidmət sıfır

“Bizim Yol” qəzetində  ölkənin turizm sahəsindəki durumu  araşdıran “Nabranda bahalı qiymət, sıfır xidmət” sərlövhəli məqalə dərc edilib. (http://www.bizimyol.info/news/81979.html)

Müəllif Azərbaycanın turizm məkanlarından biri kimi Nabranın “Malibu Resort” istirahət mərkəzində baş verənləri nəzərə çatdırır. Burada iki nəfərlik otaq 50 manatdır və bu, yalnız otaqda qalmağa aiddir. Əgər yemək istəyirsənsə əlavə olaraq daha 40 manat ödəməlisən. Otağa saat 14.00-dan sonra daxil olub, səhərisi gün saat 12-də çıxa bilərsən, əlavə olaraq otaqda qalmaq istəyirsənsə buna da əlavə ödəniş edirsən.

Müəllif yazır ki, istirahət mərkəzi daxilindəki hovuzdan istifadə üçün də pul ödəmək lazım gəlir. 1 saatlıq bilyard oyunu 10 manata başa gəlir. Diskotekada iştirak adambaşı 5 manat pul deməkdir.

Müəllif vurğulayır ki, istirahət mərkəzinin idman zalı, futbol meydançası yararsız haldadır, İnternet olsa da ondan istifadə demək olar ki, mümkün deyil.

Bütün bunlardan sonra müəllif ölkədə turizmin inkişafı barədə öz yekun qənaətini belə ifadə edir: “ Uzun müddətdir ki, Azərbaycanda turizm sektorunda qiymətlərin baha və xidmətin aşağı səviyyədə olması əhalini narahat edir. Ekspertlər və səyahətçilər məhz buna görə də istirahət mövsümlərində insanların ölkə daxilində dincəlməkdənsə, xaricə getməyə üstünlük verdiyini bildirirlər. Hətta yol xərci əlavə olunsa belə yenə də xaricdə istirahət etmək Azərbaycandakından ucuz başa gəlir, həm də yüksək səviyyədə xidmətlə qarşılanırsan”.